DÜNYA
YOŞKA FİŞER: ANKARANIN APARDIĞI İSLAHATLAR ALMANİYANIN VƏ BÜTÜN AVROPANIN MƏNAFELƏRİNƏ CAVAB VERİR
AZƏRTAC-ın İTAR-TASS agentliyindən aldığı xəbərə görə, AFR-in xarici işlər naziri Yoşka Fişer aprelin 27-də Berlində bildirmişdir ki, Ankaranın apardığı islahatlar təkcə almanların deyil, həm də bütün Avropanın mənafelərinə cavab verir, habelə Türkiyənin Avropa Birliyinə yaxınlaşmasını sürətləndirir.
Almaniya xarici siyasət idarəsinin başçısı Berlində jurnalistlərlə söhbətində vurğulamışdır ki, “uzunmüddətli planda Türkiyəni Avropa Birliyinin tərkibində görür”. O xatırlatmışdır ki, cari ilin sonunda Avropa Komissiyası Türkiyənin AB-yə qoşulmasına dair Ankara ilə danışıqlara başlayıb-başlamamaq barədə prinsipial qərar qəbul edəcəkdir.
Y.Fişer demişdir: “Əgər Türkiyə hökuməti ölkəni modernləşdirmək və demokratikləşdirmək prosesini uğurla başa çatdırsa, bu da dünya birliyinin beynəlxalq terrorizmlə mübarizəsinə mühüm töhfə olacaqdır”.