Yük maşınları Polşadan Ukraynaya keçmək üçün bir ay gözləməli olur
Bakı, 26 dekabr, AZƏRTAC
Yük maşınlarının sürücüləri Doroxusk sərhəd-keçid məntəqəsindən Polşa-Ukrayna sərhədini keçmək üçün 30 gündən çox növbə gözləmək məcburiyyətində qalırlar.
AZƏRTAC xəbər verir ki, PAP agentliyi bu barədə Lyüblin şəhərinin Xəzinədarlıq Palatasına istinadla məlumat yayıb.
Məlumata görə, hazırda Doroxusk keçid məntəqəsində 1,5 mindən çox yük avtomobilindən ibarət növbə yaranıb. Növbənin uzunluğu 40 kilometrdən çoxdur. Sərhədi bağlayan etirazçılar əvvəllər nəzarət-buraxılış məntəqəsindən saatda üç avtomobil buraxdıqları halda, indi hər üç saatda yalnız bir yük maşınının Ukraynaya keçməsinə icazə verirlər.
Polşa yükdaşıyıcıları noyabrın 6-dan başlayaraq Ukrayna ilə sərhədi bağlayıb. Etirazçılarla aparılan danışıqlar hələ ki, nəticə vermir. Onlar Avropa İttifaqının ukraynalı həmkarlarına verdiyi güzəştlərin ləğvini, xüsusən Ukrayna yükdaşıma kompaniyaları üçün məcburi lisenziya prosedurunun bərpasını tələb edirlər. Sərhədin bağlanması səbəbindən Polşadan Ukraynaya yük çatdırılmasının qiyməti üç dəfədən çox artıb. Avropa kompaniyaları artıq Ukraynaya sifarişlərin həcmini azaltmağa başlayıblar.
Bölmənin digər xəbərləri
