YUNANISTAN PREZİDENTİ KONSTANTİNOS STEFANOPULOSUN BƏYANATI
Mən cənab Prezident Əliyevə çox gözəl qonaqpərvərliyə görə minnətdarlığımı bildirirəm.
Yunanıstan bu səfərə böyük önəm verir. Bizim məqsədimiz, sadəcə, səfər etmək deyil, eyni zamanda, bütün sahələrdə əlaqələri genişləndirməkdir. İstərdik ki, ölkələrimiz arasında, universitetlər arasında münasibətlər genişlənsin. Alimlər mübadilə aparsınlar və bütün mümkün sahələr əhatə olunsun.
Ümid edirik ki, biznes forum öz işini çox uğurla davam etdirəcəkdir. Çox keçməz ki, biz bu uğur haqqında, əməli nəticə haqqında eşidəcəyik. Sabah mənim Slavyan Universitetində çox maraqlı görüşlərim olacaqdır. Sizə demək istəyirəm ki, məni burada biznesmenlərlə bərabər, akademiklər, alimlər də müşayiət edirlər. Treys və Fatra universitetlərindən alimlər də gəlmişdir. Mən sabah Slavyan Universitetində görüşlər keçirəcəyəm, orada mənə fəxri doktor adı veriləcəkdir. Mən bütün bunlarla çox fəxr edirəm. Mən çıxışımın sonunda istərdim ki, mərhum Prezidentlə, indiki Prezidentin atası ilə keçirdiyim görüşləri xatırlayım. 1995-ci ildə Nyu-Yorkda, Birləşmiş Millətlər Təşkilatının 50 illiyində onunla ilk dəfə görüşümüz oldu. Bu, çox uzunsürən bir görüş oldu. Birləşmiş Millətlər Təşkilatı bu görüş üçün bizə bir otaq ayırmışdı. Mən orada Prezidentlə görüş keçirdim. Prezident Heydər Əliyev Azərbaycanın ən ağrılı problemi - Dağlıq Qarabağ problemi haqqında mənə ətraflı, geniş məlumat verdi. Mən Dağlıq Qarabağ haqqında məlumatı ilk dəfə ondan aldım. Daha sonra biz Buxarestdə görüşdük. Orada da Prezidentlə çox gözəl, çox dostyana söhbətimiz oldu. Onun işə ciddi yanaşması və nəhəng təcrübəsi həmişə mənim xatirimdə qalacaqdır. Demək istəyirəm ki, onun layiqli davamçısı bu ciddi yanaşmanı və nəhəng təcrübəni burada uğurla davam etdirir. İndi biz Azərbaycanın uğurunu müşahidə edirik. Sizi inandırmaq istəyirəm və zənnimcə, Azərbaycan tərəfi də bu və fikirdədir ki, Yunanıstan tərəfi bu gün keçirilən və sabah keçiriləcək görüşlərə çox ciddi yanaşacaqdır. Məni müşayiət edən nazirlər bu işə ciddi yanaşacaqlar. Bizim tərəfimizdən Azərbaycana maraq çox böyükdür və bu, qarşılıqlı maraqdır. Ümid edirəm, bu səfərin nəticəsi kimi, biz tezliklə uğurlu nəticəni müşahidə edəcəyik. Cənab Prezident, Sizə demək istəyirəm ki, yunan tərəfi Sizi Afinada, Yay Olimpiya oyunlarında səbirsizliklə gözləyir. Eyni zamanda, biz Sizin qarşılıqlı səfərinizi də gözləyirik. Ümid edirik ki, Siz Yunanıstana dövlət səfəri edəcəksiniz və bu səfər də çox uğurlu alınacaqdır. Cənab Prezident, bizə göstərilən qonaqpərvərliyə, bizə qarşı münasibətinizə görə bütün nümayəndə heyətinin adından Sizə bir daha dərin minnətdarlığımı bildirirəm. Çox sağ olun.
X X X
Sonra Prezidentlər jurnalistlərin suallarına cavab verdilər.
SUAL: Mənim sualım Azərbaycan Prezidentinədir. Lakin suala keçməzdən əvvəl Prezident İlham Əliyevə minnətdarlığımı bildirirəm ki, nümayəndə heyətinə və mətbuat işçilərinə bu qədər diqqət ayırmış və işləmək üçün onlara gözəl şərait yaratmışdır. Sualım belədir: Siz Avropa Birliyinin Azərbaycana marağını necə izah edərdiniz? Məlumdur ki, ötən il Yunanıstan Avropa Birliyinə sədrlik edən dövrdə Azərbaycan Avropa Birliyinə yeni qonşular siyahısına daxil olmuşdur. Avropa Birliyinin Azərbaycana olan bu böyük marağını nə ilə izah edirsiniz?
CAVAB: Həqiqətən, Avropa Birliyi ilə Azərbaycan arasında əlaqələr çox sürətlə inkişaf edir. Biz bu əlaqələrə böyük əhəmiyyət veririk. Biz istəyirik ki, Avropa Birliyi ilə Azərbaycan arasında əlaqələr bütün sahələrdə inkişaf etsin. İlk növbədə, iqtisadi əməkdaşlıq daha da güclənsin.
Azərbaycan öz siyasətini bu istiqamətdə aparır. Biz Avropa ailəsinə, Avropa strukturlarına inteqrasiya edirik və bu proses çox uğurla davam edir. Eyni zamanda, Azərbaycan da Avropa üçün çox önəmli bir ölkədir. Azərbaycanın siyasi meylləri, Azərbaycanda aparılan xarici siyasət, ölkəmizin coğrafi-siyasi vəziyyəti və təbii sərvətləri Azərbaycanı Avropa Birliyi üçün çox cəlbedici ölkəyə çeviribdir.
Mən bu yaxınlarda Avropa Birliyinə səfər etmişəm və bu səfər çox uğurlu olmuşdur. Çox müsbət haldır ki, Avropa Birliyi Cənubi Qafqaz üzrə xüsusi nümayəndə təyin edibdir və Azərbaycanı yeni qonşular siyahısına salıbdır. Biz ümid edirik ki, atılan bütün bu addımlar bizi Avropa ilə daha da sıx bağlayacaqdır.
SUAL: Mənim sualım Yunanıstan Prezidentinədir. Cənab Prezident, Sizi bu səfərdə çoxlu sayda iş adamları müşayiət edir. Ümumiyyətlə, Siz Azərbaycanda neft sektorundan savayı, hansı sahələrdə əməkdaşlıq etmək və işbirliyi qurmaq fikrindəsiniz?
CAVAB: Mən elə bilirəm ki, biznes imkanları çox genişdir. Mənim səfərimin əsas uğuru da elə biznes forumun nəticələrindən asılı olacaqdır. Bizim biznesmenlər bunda nə qədər uğurlu iştirak etsələr, nə qədər uğurlu əlaqə yaratsalar, mənim səfərimin qiyməti də bir o qədər artıq olacaqdır. Mən Yunanıstan hökuməti adından demək istəyirəm ki, hökumət biznesmenlərin bu fəaliyyətinə hər cür dəstəyini əsirgəməyəcəkdir. Əminəm ki, neftdən kənarda da sektorlar mövcuddur. Bu sektorları bizim biznesmenlər azərbaycanlı həmkarları ilə birlikdə arayıb axtaracaq və tapacaqlar. Əsas məqsəd ondan ibarətdir ki, qarşılıqlı maraq vardır. Biznesmenlərin fəaliyyəti ölkələr arasındakı münasibətlərdə əsas lokomotiv, mühərrik rolunu oynayır.
CAVAB: İlk növbədə, demək istəyirəm ki, həqiqətən, artıq bütün dünya ictimaiyyəti bilir ki, Ermənistan Azərbaycan torpaqlarını işğal edibdir. Dağlıq Qarabağı və onun inzibati sərhədindən kənarda Azərbaycanın digər yeddi bölgəsini işğal edibdir. Bu işğal nəticəsində 1 milyona yaxın azərbaycanlı qaçqın-köçkün vəziyyətinə düşübdür. Azərbaycan torpaqlarının 20 faizi işğal altındadır, ölkəmizin ərazi bütövlüyü pozulubdur. Biz haqlı olaraq tələb edirik ki, Azərbaycanın ərazi bütövlüyü bərpa olunsun, işğalçı qüvvələr həmin torpaqlardan çıxsınlar. Beynəlxalq hüquq normaları bunu tələb edir. Əlbəttə, dünyanın hər bir yerində beynəlxalq hüquq zəfər çalmalıdır. Biz ümid edirik ki, bu münaqişə öz həllini tapacaq, Azərbaycanın ərazi bütövlüyü bərpa olunacaq, işğaldan əziyyət çəkən Azərbaycan vətəndaşları öz doğma torpaqlarına qayıdacaqlar.
O ki qaldı digər məsələyə, bununla əlaqədar Azərbaycanın rəsmi mövqeyi bir neçə dəfə açıqlanmışdır. O cümlədən mən də bir neçə dəfə bəyanatlar vermişdim və bunlar Azərbaycan mətbuatında öz əksini tapmışdır. Bilirəm ki, bu məsələ ilə bağlı müəyyən mətbuat orqanlarında qeyri-sağlam ajiotaj yaradılıbdır. Bunun səbəbləri də bizə bəllidir. Mən bu detallara toxunmaq istəmirəm. Amma onu bir daha demək istəyirəm ki, Azərbaycanın rəsmi mövqeyini Azərbaycan Prezidenti və Xarici İşlər Nazirliyi ifadə edir. Müxtəlif mülahizələr ola bilər. Müxtəlif mətbuatda hansısa fərziyyələr irəli sürülə bilər. Amma sizə bu suala görə təşəkkür edirəm ki, ilk mənbədən buna bir daha cavab alacaqsınız.
Biz ümid edirdik ki, Kiprdə keçirilən referendum bu məsələyə son qoyacaqdır. Biz çox istəyirik ki, dünyada, bölgədə əməkdaşlıq olsun, mövcud problemlər öz həllini tapsın. Əlbəttə, biz çox ümid edirdik ki, Kiprdə keçirilən referendumda bu məsələ birmənalı şəkildə öz həllini tapacaqdır. Əfsuslar olsun ki, buna imkan olmadı.
Azərbaycanın mövqeyi ondan ibarət idi ki, əgər referendumdan sonra yeni bir vəziyyət yaranarsa, əlbəttə, Birləşmiş Millətlər Təşkilatı və Avropa dövlətləri öz siyasətlərində düzəlişlər etməli olacaqlar. Əgər belə bir düzəlişlər olarsa, Azərbaycan bunu dəstəkləyəcək və bu məsələdə fəal iştirak edəcəkdir. Hər hansı başqa bir məsələdən söhbət getmirdi və siz bunu keçmişdə verilən bəyanatlarda da görə bilərsiniz.
SUAL: Cənab Stefanopulos, Azərbaycanla Yunanıstanın beynəlxalq təşkilatlar çərçivəsində əməkdaşlığının perspektivini necə qiymətləndirirsiniz?
CAVAB: İndiyədək Azərbaycanla bizim münasibətlərimizdə heç bir problem olmayıbdır. Beynəlxalq təşkilatlar çərçivəsində birgə əməkdaşlıq etmişik. Mən bu əməkdaşlığa görə Azərbaycan Respublikasının Prezidentinə öz minnətdarlığımı bildirirəm. Cənab Prezidentə təşəkkür etmək istəyirəm ki, Birləşmiş Millətlər Təşkilatı çərçivəsində Yunanıstanı qeyri-daimi üzv kimi dəstəkləmisiniz. Buna görə çox sağ olun. Yunanıstan isə öz növbəsində, Azərbaycana daim dəstək vermişdir. Siz Avropa Şurasına qəbul olunarkən Yunanıstanın dəstəyini hiss etmisiniz. Avropa Birliyi çərçivəsində Yunanıstan əlindən gələni edir ki, Azərbaycanla əməkdaşlıq artsın. Yunanıstan Avropa Birliyinin bundan sonra genişlənməsində Azərbaycanı da nəzərdən keçirir. Mən cənab Əliyevin son şərhi ilə bağlı öz fikrimi demək istəyirəm. Prezident Kiprdə yaranacaq yeni vəziyyətlə bağlı danışdı. Bu barədə bildirmək istəyirəm ki, həqiqətən, referendumdan sonra yeni vəziyyət yaranmışdır. Hazırda Şimali Kipr Avropa qurumları tərəfindən dəstəklənir və bunun da səbəbi iqtisadi səbəblərdir. Çünki Şimali Kipr hərbi təcavüz nəticəsində bir o qədər yaxşı inkişaf etmir. Kiprin yunan tərəfində isə inkişaf kifayət qədər hamar gedir. Amma biz istəməzdik ki, şimal tərəf xoşbəxt olmasın, biz bütün adanın inkişafını istəyirik. Biz Yunanıstan olaraq, Şimali Kiprin inkişafı üçün əlimizdən gələn maliyyə yardımını əsirgəməyəcəyik. Çox sağ olun.
X X X
Mətbuat konfransında Azərbaycan Prezidenti Administrasiyasının rəhbəri Ramiz Mehdiyev, Yunanıstanın Bakıdakı səfiri Merkurios Karafotias, nazirliklərin, komitələrin rəhbərləri, Yunanıstan nümayəndə heyətinin üzvləri iştirak edirdilər.
Bölmənin digər xəbərləri
