Yunis Hüseynov: Olimpiadada iştirak etmək, çempion olmaq istəyərdim - MÜSAHİBƏ
Bakı, 3 fevral, AZƏRTAC
Fevralın 1-də 60 yaşı tamam olan veteran futbolçu Yunis Hüseynov AZƏRTAC-ın suallarını cavablandırıb. Həmin müsahibəni təqdim edirik.
- Yunis bəy, sizi ad günü münasibətilə təbrik edir, uzun ömür, cansağlığı arzu edirik. Maraqlıdır, doğum gününüzdə kimlərdən təbrik aldınız?
- Çox sağ olun. Təbrikləri gözlədiyim hamıdan aldım. Məni məyus edən hansısa məqam olmadı. Qohumlar, ailəm, futbol ictimaiyyəti, bir sözlə, bütün tanışlarım məni yad etdi və xoş arzularını çatdırdılar.
- Ad gününüzü necə qeyd etdiniz?
- Ad günü qeyd etməyi heç vaxt xoşlamamışam. Amma bu dəfə ailəmlə birlikdə evdə qeyd etdik. Bacı və qardaşlarımla bir araya toplaşdıq və gözəl gün keçirdik. Həmin gün Tovuzda oyunumuz olduğu üçün ertəsi gün qeyd etməli olduq.
- Kimlərdən hədiyyə aldınız?
- Ailə üzvlərimdən hədiyyə aldım. AFFA rəhbərliyi mənə üzərində ad və soyadım yazılan köynək bağışladı. Açığı, doğum günlərində hədiyyə gözləyən biri deyiləm. Ən önəmlisi, əzizlərimin məni yada salıb təbrik etməsidir. Bunun özü mənim üçün ən böyük hədiyyədir.
- 60 yaş sizin üçün nə ifadə edir?
- Həyatdır, düşünürəm ki, doyunca yaşamaq lazımdır. Təbii ki, bu 60 ildə başıma xoşagəlməz hadisələr də gəlib. Amma yaşımın üzərinə yaş gəldiyi üçün kədərlənmirəm. Çünki özümü ruhən cavan hiss edirəm. Sanki heç 60 yaşım yoxdur. Həyatımı yaşayıram. “Yaşım keçir, qocalıram” kimi fikirlər heç vaxt beynimdən keçməyib. Həmişə ailəmlə birlikdəyəm. Övladlarım var. Buna görə çox xoşbəxtəm. Onlarla keçirdiyim hər bir an mənim üçün unudulmazdır. Peşmanlıqlarım olsa da, hazırkı həyatımda hər şeydən razıyam.
- Peşmanlıqlarınız nələr olub?
- Karyeramda peşman olduğum məqamlar olub. Bu, 1988-ci ildə baş verib. Həmin il Olimpiadada iştirak etmək, çempion olmaq istəyərdim. Əgər keçmişə qayıtmaq şansım olsa idi, bu anı dəyişərdim. O dövrlər cavan idim. Bir çox şeyi dərk etmirdim. Amma həmin vaxt indiki ağlım olsaydi, bəzi insanlara imkan verməzdim ki, qarşımı kəssinlər. Bunu etsəydim, bu gün Olimpiya çempionu idim. Həmin hadisə yaddaşımda silinməz olaraq qalacaq.
- Yolunuzu kəsənlərə nə demək istərdiniz?
- O insanların bəziləri yəqin ki, hazırda həyatda deyil. Digərlərindən isə ümumiyyətlə xəbərim yoxdur. Həmin insanlara heç vaxt haqqımı halal etməmişəm. Yəqin ki, o biri dünyada cavabını verəcəklər. Uğura gedən yolda qarşımı kəsən insanları heç vaxt yaxşı xatırlaya bilmərəm. Düşünürəm ki, belə insanlar pis qəlbə sahibdirlər.
- Özünüzü bu 60 ildə heç başqa sahədə təsəvvür etmisinizmi?
- Heç vaxt təsəvvür etməmişəm, indi də edə bilmirəm. Çünki həddindən artıq futbola bağlı insanam. Futbolu seçdiyim üçün peşman olmamışam. Mənim qardaşlarım da futbolçu olub. Yeganə peşmanlığım xarici ölkələrdən gələn təklifləri rədd etməyimlə bağlıdır. Gənc olduğum üçün səhv qərarlar vermişəm. Gərək başqa ölkələrdə futbol oynayardım. Azərbaycandan gedib, legioner həyatı da yaşaya bilərdim. Bundan başqa, heç bir peşmanlığım olmayıb. Mən həmişə futbolla yaşamışam.
- Öz doğum gününüzdə Azərbaycan futbolu ilə bağlı da arzu tutdunuz?
- Arzu etdim ki, milli komandamız həmişə yaxşı nəticələr əldə etsin, Azərbaycanı beynəlxalq arenada yaxşı futbol ölkəsi kimi tanıtsın. Klublarımız avrokuboklarda uğurlu çıxış etsin, “Qarabağ”dan başqa digər komandalarımız da Avropa və Çempionlar Liqasının qrup mərhələlərində mübarizə aparsınlar. Bir sözlə, futbolumuzun inkişafını arzuladım. Çempionatımızda rəqabət artsın, oyunlar yüksək səviyyədə keçirilsin, çempionluğa oynayan klublarımızın sayı artsın. Ümid edirəm ki, bu arzularım reallaşar.
Bölmənin digər xəbərləri
