YUNİSEF-İN AZƏRBAYCANDAKI NÜMAYƏNDƏLİYİ RƏHBƏRİNİN DÖRDİLLİK FƏALİYYƏTİ BAŞA ÇATMIŞDIR
İyulun 1-də Təhsil Nazirliyində YUNİSEF-in Azərbaycandakı nümayəndəliyinin rəhbəri xanım Hana Singerin respublikamızdakı 4 illik fəaliyyətinin başa çatması ilə bağlı mərasim keçirilmişdir.
Təhsil Nazirliyindən AZƏRTAC-a bildirmişlər ki, beynəlxalq təşkilatların nümayəndələrinin, təhsil işçilərinin iştirak etdikləri mərasimdə nazir Misir Mərdanov YUNİSEF-in həyata keçirdiyi tədbirlərin, o cümlədən uşaqların sağlamlığı və inkişafı üzrə layihələrin əhəmiyyətini qeyd etmiş və bu layihələrin reallaşdırılmasında xanım Hana Singerin səmərəli xidmətləri olduğunu söyləmişdir.
Ölkəmizdə aparılan təhsil islahatlarına göstərdiyi dəstəyə görə xanım Hanaa Singerə təşəkkürünü bildirən nazir, eyni zamanda, müvafiq qurumla əməkdaşlığın davamlı olacağına əminliyini qeyd etmişdir.
Xanım Hana Singer Təhsil Nazirliyinin Fəxri fərmanı ilə təltif edilmişdir.
Sonra Təhsil Nazirliyinin şöbə müdiri Fərzəli Qədirovun “Təhsil Nazirliyi və YUNİSEF: birgə uğurlu əməkdaşlıq” mövzusunda məruzəsi dinlənilmişdir.
YUNİSEF-lə birgə həyata keçirilən layihələr, ümumilikdə, 200-dən çox təlim-tərbiyə müəssisələrini əhatə etmişdir.
Xanım Hana Singer cəmiyyətin inkişafında təhsilin mühüm rolunu vurğulamış və ona göstərilən diqqətə görə təşəkkürünü bildirmişdir.
Bölmənin digər xəbərləri
