ZAQATALADA HƏRBÇİ AİLƏLƏRİNƏ YENİ MƏNZİLLƏRİN ORDERLƏRİ TƏQDİM OLUNMUŞDUR
AZƏRTAC xəbər verir ki, sentyabrın 26-da Zaqatala Sərhəd Dəstəsinin yeni yaşayış şəhərciyində zabitlər üçün inşa edilmiş hər biri 16 mənzildən ibarət iki yaşayış binasının təntənəli açılış mərasimi keçirilmişdir.
Mərasimi giriş sözü ilə hərbi hissənin komandiri polkovnik Elşən Verdiyev açaraq şimal-qərb sərhədlərimizin etibarlı mühafizəsi sahəsində görülən işlər barədə danışmış, ümummilli liderimiz Heydər Əliyevin uğurlu siyasətinin ardıcıl həyata keçirilməsi nəticəsində bu gün orduya dövlət qayğısının ən yüksək həddə çatdığını xüsusi vurğulamışdır.
Hərbçi ailələrini yeni xidməti mənzillər almaları münasibətilə təbrik edən Dövlət Sərhəd Xidməti rəisinin müavini general-mayor Məhəmməd Abasquliyev ölkəmizdə ordu quruculuğu sahəsində həyata keçirilən tədbirlərdən, Sərhəd Qoşunlarının formalaşması və inkişafına göstərilən yüksək dövlət qayğısından danışmış, hazırda Sərhəd Xidmətinin tabeliyində olan bütün qarnizonların, sərhəd zastavalarının yüksək döyüş hazırlıqlı peşəkar zabit korpusuna malik olduğunu, ən müasir texnika ilə təchiz olunduğunu nəzərə çatdırmışdır. 2008-ci ilin sonunadək 600 sərhədçi ailəsinin yeni mənzillərlə təmin olunacağını qeyd edən general-mayor M.Abasquliyev hərbçi ailələrinə yeni mənzillərdə xoşbəxt həyat və firavan günlər arzulamışdır.
Mənzil sahiblərinə orderlər təqdim olunduqdan sonra yeni mənzillərə baxış olmuşdur. Bir, iki və üçotaqlı mənzillərin hər biri mebellə, mətbəx cihazları ilə təchiz olunmuş, binalarda müasir istilik sistemi quraşdırılmışdır. Gələcəkdə şəhərcikdə əlavə yaşayış binalarının, uşaq bağçasının tikilməsi də nəzərdə tutulur.
X X X
Elə həmin gün Balakən rayonunda Zaqatala Sərhəd Dəstəsinin tabeliyinə daxil olan “Yeni Şərif” sərhəd zastavasının da açılış mərasimi olmuşdur. Mərasimdə çıxış edən Dövlət Sərhəd Xidməti rəisinin müavini general-mayor Məhəmməd Abasquliyev, Balakən Rayon İcra Hakimiyyətinin başçısı Asif Məmmədov və digər natiqlər sərhədçiləri əlamətdar gün münasibətilə təbrik etmiş, onlara xidmətdə uğurlar arzulamışlar. Rəmzi qırmızı lent kəsildikdən sonra qonaqlar binada yaradılan şəraitlə tanış olmuşlar.
######
 |
 |
