Zəfər Günündə paytaxtın Nərimanov rayonunda 400-ə yaxın ağac əkilib
Bakı, 8 noyabr, AZƏRTAC
8 Noyabr - Zəfər Günü münasibətilə təşkil olunan tədbirlər çərçivəsində paytaxtımız Bakı şəhərinin bütün rayonlarında genişmiqyaslı ağacəkmə aksiyaları keçirilib. Bu il ilk dəfə qeyd edilən Zəfər Günündə Bakı Şəhər İcra Hakimiyyətinin təşkilatçılığı və qurumun idarələrinin əməkdaşlarının iştirakı ilə mövcud karantin rejiminin tələblərinə riayət edilməklə paytaxtın Nərimanov rayonundakı Məmməd Araz və Aşıq Molla Cümə küçələri boyunca olan ərazidə ağacəkmə aksiyası təşkil olunub.
Bakı Şəhər İcra Hakimiyyətinin mətbuat xidmətindən AZƏRTAC-a verilən xəbərə görə, əsas məqsədi Bakı şəhərində yaşıllıq zolaqlarının salınması, ekoloji tarazlığın bərpası və ətraf mühitin mühafizəsi olan həmin aksiya zamanı ərazi yararsız tullantılardan təmizlənərək burada 400-ə qədər yeni, əsas etibarı ilə Eldar şamı, kiparis, şam, çinar və digər ağaclar əkilib. Aksiya həmin ərazidə ekoloji tarazlığın bərpası və ərazinin gözəlləşməsi istiqamətində görülən işlərin davamıdır.
Aksiya zamanı əkilən ağaclara gələcəkdə qulluq göstərilməsi üçün suvarılma məsələləri həll edilib, cavabdehlər müəyyənləşdirilib.
Ekoloji aksiya paytaxtımızın yaşıllaşdırılması və daha da gözəlləşməsinə bir töhfə olub.
Bölmənin digər xəbərləri
