Zelenski: Hazırda Ukrayna ərazilərinin 26 faizi işğal altındadır
Kiyev, 5 fevral, AZƏRTAC
Hazırda Ukrayna ərazilərinin 26 faizi Rusiyanın işğalı altındadır.
AZƏRTAC xəbər verir ki, bu barədə Ukrayna Prezidenti Volodimir Zelenski “Rai-1” telekanalına müsahibəsində bildirib.
“İki ildən sonra dövlətimizi müdafiə etməyi bacarmağımız vacibdir. Milli ərazinin təxminən 26 faizi hələ də işğal altındadır, lakin biz görürük ki, Rusiya ordusu ciddi irəliləyiş əldə edə bilmir. Biz onları dayandırdıq”, - deyə Zelenski vurğulayıb.
Eyni zamanda, prezident əlavə edib ki, Ukrayna dünya liderlərini birləşdirə bilib, ona görə də ukraynalılar tək deyil.
“Bu gün ölkə müharibənin nə olduğunu bilir. Təəssüf ki, bir çox ailələr yaxınlarını itirib, yaralananlar var, çoxları cəbhədədir. Lakin biz tək deyilik, dünya liderlərini birləşdirə bilmişik”, - deyən Zelenski bildirib ki, Rusiya Federasiyasının Ukraynaya genişmiqyaslı hücumunun ilk günləri indikindən çox fərqli olub.
“Müharibənin ilk günləri çox fərqli idi, insanlar çox qorxurdular. Əvvəlcə böyük xaos, gözlənilməz işğal, gecələr şəhərlərə hücumlar oldu. İnsanlar şokda idilər. İndi hər şey başqa cürdür, biz öz torpağımızı, ailəmizi müdafiə etməyə başladıq”, - deyə Zelenski qeyd edib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
