Zelenski: Kimsə məni elə indi əvəzləmək istəyirsə, heç cür alınmayacaq
Kiyev, 19 fevral, AZƏRTAC
Ukrayna Prezidenti Volodimir Zelenski bəyan edib ki, ukraynalılar arasında mənim etimad reytinqimin guya 4 faiz təşkil etməsi barədə xəbər Rusiyadan qaynaqlanır.
AZƏRTAC xəbər verir ki, bunu dövlət başçısı bu gün keçirdiyi mətbuat konfransında deyib.
ABŞ Prezidenti Donald Trampın ukraynalılar arasında etimad reytinqinin guya 4 faiz təşkil etməsi ilə bağlı bəyanatına cavab verən Zelenski qeyd edib ki, sosial sorğuları şərh etmir, lakin Kiyev Beynəlxalq Sosialogiya İnstitutunun son reytinqinə görə, ukraynalıların 57 faizi ona etimad göstərir: “Kimsə məni elə indi əvəzləmək istəyirsə, heç cür alınmayacaq”.
Onun sözlərinə görə, 4 faiz barədə məlumat ABŞ və Rusiya arasında müzakirə olunub: “Biz bunu başa düşürük və bildirmək istəyirik ki, bu rəqəmlərin ABŞ və Rusiya arasında müzakirə edildiyinə dair sübutumuz var. Çox hörmət etdiyimiz bir xalqın lideri kimi ehtiram göstərdiyimiz Prezident Trampın dezinformasiya məkanında yaşaması təəssüf doğurur”.
O vurğulayıb ki, hazırda əsas məsələ etimad reytinqi deyil, Ukraynanın Rusiya hücumlarından necə qorunması və hərbi əsirlərin geri qaytarılmasıdır.
“Patriot” sistemlərinin sayının artırılması ilə bağlı sualıma ABŞ-dan cavab gəlmədi, baxmayaraq ki, hər dəfə bu mövzunu qaldırıram”, - deyə Zelenski əlavə edib.
O qeyd edib ki, müharibə şəraitində yaşayan Ukrayna xalqı heç bir güzəştə getməyəcək: “Rusiyaya hər şeydə güzəştə getmək” perspektivini əhalinin yalnız bir faizi dəstəkləyir”.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
