Zelenski Yaxın Şərq ölkələrinin İranla müharibə ilə bağlı yardım istəklərindən danışıb
Kiyev, 13 mart, AZƏRTAC
Ukrayna İranla bağlı mümkün müharibə vəziyyətində Yaxın Şərq ölkələrindən altı yardım sorğusu alıb. Eyni zamanda dövlət başçısı Ukrayna nümayəndə heyətinin Körfəz bölgəsindən qayıtmasını gözlədiyini bildirib ki, həmin ölkələrin hansı həcmdə yardım gözlədikləri müəyyənləşdirilsin.
AZƏRTAC Ukrinform agentliyinə istinadən xəbər verir ki, bunu Ukrayna Prezidenti Volodimir Zelenski Fransa Prezidenti Emmanuel Makron ilə mediaya birgə açıqlaması zamanı deyib.
“Bu həftənin sonunda hərbi qulluqçular və Milli Təhlükəsizlik və Müdafiə Şurasının katibi Körfəz bölgəsindən qayıdacaqlar və tam hesabat təqdim olunacaq. Biz üç ölkəyə ekspert qiymətləndirmələri göndərmişik. Amerika tərəfindən İordaniya ilə bağlı ayrıca bir sorğu da var. Ukrayna komandası qayıtdıqdan sonra bu yardımın həcmini müəyyən edəcəyik”, – deyə Zelenski əlavə edib.
Prezident qeyd edib ki, Yaxın Şərqdə, ABŞ-də və Avropa İttifaqı ölkələrində müəyyən sayda tutucu dron mövcuddur. Lakin onun sözlərinə görə, Ukrayna pilotları, hərbi personalı və ixtisaslaşmış proqram təminatı olmadan bu sistemlərin heç biri effektiv fəaliyyət göstərə bilməz.
“Bu sistem yalnız bizdə mövcuddur və rəsmi olaraq Ukrayna Silahlı Qüvvələrinin istifadəsindədir. Buna görə də hamı başa düşür ki, hətta onlarla və yüzlərlə tutucu ilə vəziyyəti dəyişmək mümkün olmayacaq. Bu, sistemli müdafiə tələb edir. Məhz sistemli müdafiə üzrə ekspertlər – kiçik hava hücumundan müdafiə sistemlərinin tətbiqi üzrə peşəkarlar – Yaxın Şərq ölkələrinə ezam olunublar”, – deyə Zelenski vurğulayıb.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
