Zəngilan Şəhəri Gününü böyük fəxarət hissi ilə qeyd edirik – AÇIQLAMA
Bakı, 20 oktyabr, AZƏRTAC
Bu gün Azərbaycan Ordusunun 2020-ci il sentyabrın 27-də başladığı əks-hücum nəticəsində işğaldan azad olunmuş Zəngilan Şəhəri Günüdür. Hazırda böyük fəxarət hissi ilə üç il əvvəl oktyabrın 20-də Zəngilanın düşmən işğalından xilas olunması gününü qeyd edirik.
Bunu AZƏRTAC-a hərbi jurnalist, ekspert, ehtiyatda olan polkovnik Üzeyir Cəfərov deyib.
Hərbi jurnalist bildirib ki, bizim qəhrəman övladlarımız sentyabrın 27-dən başladıqları döyüş əməliyyatlarının miqyasını genişləndirərək, Vətən müharibəsinin 24-cü günü Zəngilan rayonu ərazisinə daxil oldular. Həmin ərazidən mənfur düşmən ordusunu geri çəkilməyə məcbur etdilər. Oktyabrın 20-də Zəngilan rayonunun bir neçə yaşayış məntəqəsi işğaldan azad olundu və bunu Azərbaycan Prezidenti, Silahlı Qüvvələrin Ali Baş Komandanı öz tviter səhifəsində xalqa müraciətində elan etdi.
Prezident İlham Əliyev Azərbaycan xalqına müraciətində Zəngilan rayonu ərazisinə ordumuzun daxil olması məlumatını çatdıraraq demişdi: “Zəngilan rayonu. Şanlı Azərbaycan Ordusu Zəngilan rayonu ərazisinə də daxil olub, girib və yaşayış məntəqələrinin azad olunması təmin edilib. Zəngilan rayonu ərazisində yerləşən yaşayış məntəqələrinin adlarını çəkirəm: Havalı kəndi, Zərnəli kəndi, Məmmədbəyli kəndi, Həkəri kəndi, Şərifan kəndi, Muğanlı kəndi və Zəngilan şəhəri! Zəngilan bizimdir! Qarabağ bizimdir!
Əziz xalqım, əziz zəngilanlılar, füzulililər, xocavəndlilər, cəbrayıllılar və işğal edilmiş digər rayonların sakinləri, biz öz missiyamızı yerinə yetiririk. Düşmənə layiqli cavab veririk. Düşməni cəzalandırırıq. Düşmən bizim qarşımızda acizdir. Düşmənin belini qırırıq, qıracağıq!
Qarabağ bizimdir! Yaşasın Azərbaycan! Eşq olsun Azərbaycan xalqına!”
Ekspertin sözlərinə görə, Silahlı Qüvvələrimiz Zəngilanı azad edərkən ermənilərə çox ağır zərbə vurdu və düşmən xeyli canlı qüvvəsini və texnikasını itirdi. Zəngilan rayonu azad olunmaqla Ordumuz Ermənistanla sərhədə çıxdı. Həmin vaxtdan sonra rayonun azad olunmasında iştirak edən qəhrəman əsgərlərimizə “Zəngilanın azad olunmasına görə” medalı təsis olunaraq təqdim olunub.
Dövlətimizin başçısının bu ilin iyulunda imzaladığı Sərəncama əsasən şəhərin işğaldan azad edildiyi 20 oktyabr tarixi hər il Zəngilan Şəhəri Günü kimi qeyd olunur. Sərəncam işğaldan azad edilmiş şəhər günlərinin təsis olunması Vətən müharibəsində qazanılmış tarixi Qələbəni əbədiləşdirmək məqsədi daşıyır.
“Xatırladım ki, 1993-cü il oktyabrın 29-da Ermənistan silahlı qüvvələri Zəngilan rayonunu işğal etmişdi. O vaxt hələ ordumuz kifayət qədər formalaşmamışdı. Zəngilan rayonu uzun müddət ermənilərin işğalı altında qaldı və düşmən Zəngilan şəhərini və rayonun kəndlərini viran qoydu. Orada olan müqəddəs məzarlıqları, dini və tarixi-mədəni abidələrimizi dağıtdı. Hazırda Zəngilanda dövlətimiz tərəfindən bərpa-quruculuq işləri aparılır. Orada artıq aeroport tikilib.
Bir sözlə, bu gün bizim üçün əziz və Qarabağın ayrılmaz hissəsi olan Zəngilanın azad olunması günüdür. Qarabağ müharibəsinin iştirakçısı kimi Zəngilandan olan müqəddəs şəhidlərin ruhu qarşısında baş əyirəm. Yəni, nə qədər ki, Azərbaycan var, qoy Zəngilanda və digər işğaldan azad olunmuş ərazilərimizdə dalğalanan bayrağımız, eləcə də ölkəmizin suverenliyi, ərazi bütövlüyü daim və əbədi olsun”, - deyə ehtiyatda olan polkovnik vurğulayıb.
Bölmənin digər xəbərləri
