ZƏRDABDA YAZ-TARLA İŞLƏRİ UĞURLA DAVAM ETDİRİLİR
Zərdab, 13 aprel (AZƏRTAC). İqtisadiyyatının əsasını kənd təsərrüfatı təşkil edən Zərdab rayonunda yaz-tarla işlərinin qızğın çağıdır. Fermerlər və digər torpaq mülkiyyətçiləri qısa müddətdə 151 hektarda kartof, 60 hektarda pambıq, 3.228 hektarda yonca, 147 hektarda bostan məhsulları, 33 hektarda tərəvəz əkmişlər. Yazlıq bitkilərin əkini də sürətlə davam etdirilir.
Hazırda payızlıq taxıl əkinlərinin becərilməsi də diqqət mərkəzindədir. Cari ilin məhsulu üçün 19 min 229, 4 hektarda taxıl əkilmişdir. Bu, əvvəlki ilə nisbətən 4.449,4 hektar çoxdur. Cari mövsumdə sahələrdən 40 min 200 tondan çox məhsul toplanacağı proqnozlaşdırılır. Hazırda taxıl sahələrinə azot gübrəsi verilir, alaq otlarına qarşı mübarizə tədbirləri aparılır. Taxılçılara güzəştli qiymətlərlə 80,2 ton azot satılmışdır. Sahələrin suvarılması da yüksək keyfiyyətlə həyata keçirilir. İndiyədək 17 min 780 hektarda bu mühüm aqrotexniki tədbir başa çatdırılmışdır.
Bu günlərdə taxıl biçininə hazırlıq işləri də sürətlənir. Kombayn və yedəkli traktorlar, habelə yük maşınları təmir edilərək saz vəziyyətə gətirilir.
Bölmənin digər xəbərləri
