Zükerberq qarışıq reallıq qarniturunun işlənib hazırlanmasını “LG” rəhbəri ilə müzakirə edəcək
Bakı, 27 fevral, AZƏRTAC
“Meta” şirkətinin baş direktoru Mark Zükerberq “LG Electronics” şirkətinin baş direktoru Ço Ju Van ilə görüşərək, qabaqcıl qarışıq reallıq qarniturunun birgə işlənib hazırlanmasını müzakirə edəcək.
AZƏRTAC Koreya mediasına istinadla xəbər verir ki, səfərin təfərrüatları məlum olmasa da, görüşün fevralın 28-də baş tutması ehtimal edilir.
Görüşdə Zükerberq və Çonun inkişaf etməkdə olan bazarda rəqabət aparmaq üçün özündə reallıq və virtual reallıq texnologiyasını birləşdirən qabaqcıl qarışıq reallıq qarniturunun birgə işlənib hazırlanmasını müzakirə edəcəkləri gözlənilir.
Qlobal texnologiya nəhəngləri, iddia edildiyinə görə, bütün İT sənayesini dəyişdirə biləcək yeni cihaz təqdim etmək üçün güclərini birləşdirəcəklər. Bu ayın əvvəlində “Apple” şirkəti ilk “Apple Vision Pro” AR-qarniturunu təqdim edib. “Samsung Electronics” isə “Qualcomm” (mobil telefonlar və digər elektronik qurğular üçün çip dizaynı və istehsalı şirkəti – red.) və “Google” ilə birləşərək XR (genişlənmiş reallıq) texnologiyasını işləyib hazılamaq və bu il öz XR qarniturunu buraxmaq qərarına gəlib.
Hələ heç bir şirkət öz qərarını rəsmi olaraq təsdiqləməsə də, yayılan şayiələrə görə, “LG” və “Meta” şirkətləri artıq keçən il “qarışıq reallıq” yaratmaq üçün əməkdaşlıq barədə razılığa gəliblər. Əməkdaşlıq çərçivəsində “LG”, ekranlar və batareyalar daxil olmaqla, cihazlar üçün komponentlərin istehsalına görə məsuliyyət daşıyacaq. Proqram təminatının yaradılması üzərində birgə işin aparılması da nəzərdə tutulur.
Smart qarniturun 2025-ci ildə təxminən 2000 dollara satışa çıxarılacağı gözlənilir. Onun bu ayın əvvəlində ABŞ-da “Apple” şirkətinin 3500 dollara təqdim olunan Vision Pro cihazından daha ucuz olacağı nəzərdə tutulur.
“Meta” 2016-cı ildə VR qulaqcıqlarını buraxan ilk texnoloji nəhənglərdən biridir. Şirkət 2020-ci ildə “Meta Quest 2”, 2022-ci ildə isə “Meta Quest Pro” qarniturunu buraxıb.
“LG” şirkəti, bu yaxınlarda XR texnologiyasını işləyib hazırlayan televizor istehsalı əməkdaşlarından ibarət qrupunu işə götürüb və bu ilin əvvəlindən bu sahədə ixtisaslaşmış peşəkar mütəxəssisləri cəlb edib.
Bölmənin digər xəbərləri
