Daşınmaz Əmlakın Kadastrı və Ünvan Reyestri Xidməti ilə “Azərkosmos” ASC arasında Anlaşma Memorandumu imzalanıb VİDEO
Bakı, 21 fevral, Elvira Məmmədova, AZƏRTAC
Əmlak Məsələləri Dövlət Komitəsi (ƏMDK) yanında Daşınmaz Əmlakın Kadastrı və Ünvan Reyestri Xidməti ilə “Azərkosmos” ASC arasında Kosmik Məsafədən Müşahidə peyk xidmətləri sahəsində Anlaşma Memorandumu imzalanıb.
AZƏRTAC xəbər verir ki, bu münasibətlə fevralın 21-də “Azərbaycanda torpaqların elektron kadastr uçotu informasiya sisteminin yaradılmasında Kosmik Müşahidə peyk xidmətlərindən istifadə” edilməsinə həsr edilmiş ictimai təqdimat keçirilib.
Daşınmaz Əmlakın Kadastrı və Ünvan Reyestri Xidmətinin rəisi Ramiz Quliyev və “Azərkosmos” ASC-nin sədri Rəşad Nəbiyev hər iki təşkilatda torpaq fondunun öyrənilməsi ilə bağlı icra olunan layihələr barədə təqdimatla çıxış ediblər.
Bildirilib ki, Azərbaycanda torpaqların elektron kadastr uçotu və rəqəmsal kadastr xəritələrinin yaradılmasında ölkəmizin kosmik imkanlarından - süni peyklərinin məlumatlarından da istifadə olunacaq.
Dövlət başçısının bununla bağlı Fərman və tapşırıqlarında torpaq uçotu işlərində müasir avadanlıqlardan istifadə və “Azərkosmos”la əməkdaşlıq da xüsusi vurğulanır. Bu tapşırıqların icrasına uyğun olaraq, komitə artıq “Azərkosmos”la birgə əməkdaşlığa başlayıb.
R.Quliyev çıxışında torpaqların uçot sisteminin və elektron kadastrın tərtibinin əmlak sahibləri və dövlət orqanları üçün vacibliyini, eləcə də bu sahədə dəqiq məlumatların mühüm əhəmiyyət daşıdığını bildirib.
Qeyd edilib ki, zaman keçdikcə torpaqların və onlar üzərindəki daşınmaz əmlakların göstəricilərində baş verən dəyişikliklərin vaxtında aşkara çıxarılması, qiymətləndirilməsi məqsədilə ölkənin torpaq fondunun vəziyyəti müntəzəm müşahidə olunmalıdır. Xidmət rəhbəri bildirib ki, “Azərkosmos” ASC ilə bağlanmış saziş və bu saziş çərçivəsində əməkdaşlıq tələb olunan yüksək dəqiqliyi və işlərin keyfiyyətli yerinə yetirilməsini təmin edəcək.
Qeyd olunub ki, torpaqların elektron uçotu və kadastrının tərtibi ilə bağlı iki qurum arasında əməkdaşlıq hələ ötən ildən başlanıb. 2016-cı ildə Sumqayıt şəhərinin kadastr məlumatlarının yenilənməsi işlərində “Azərkosmos” ƏMDK-ya stereo təsvirlər təqdim edib. Bu təsvirlərə istinadən qısa müddətdə yeni tikililər və digər dəyişikliklər təsbit olunaraq vektorlaşdırılıb, çöl işləri yerinə yetirilib və əldə olunan məlumatlar Elektron Kadastr Uçotu İnformasiya Sisteminin yenilənməsi üçün istifadə olunub.
Hazırda, digər ərazilərin torpaq sahələrinin və yaşayış məntəqələrinin Elektron Kadastr Məlumatları bazasının yığılması və yenilənməsi üçün ortofotoplanların hazırlanması, torpaqları təyinatı üzrə istifadəsinə nəzarətin həyata keçirilməsi, kəmiyyət və keyfiyyət göstəricilərındə baş vermiş dəyişikliklərin tədqiqi üzrə monitorinqlərin aparılması, eləcə də torpaq ehtiyatlarının mühafizəsi, torpaqların eroziyasınin və səhralaşmanın analizi (spektral analizlər) məqsədi ilə kosmik təsvirlərdən istifadə edilməsinə dair Əmlak Məsələləri Dövlət Komitəsi və “Azərkosmos” ASC arasında təkliflər planı hazırlanır.
Tədbirdə iki qurum arasında Kosmik Məsafədən Müşahidə peyk xidmətləri sahəsində Anlaşma Memorandumu imzalanıb.
Memoranduma əsasən, iki qurum arasında əməkdaşlıq torpaqların elektron kadastr uçotu məlumatlarının, habelə torpaq sahələrinin və yaşayış məntəqələrinin Elektron Kadastr Məlumat bazasının periodik yenilənməsi üçün ortofotoplanların hazırlanması, torpaqların təyinatı üzrə istifadəsinə nəzarətin həyata keçirilməsi sahələrini əhatə edəcək. Eləcə də kəmiyyət və keyfiyyət göstəricilərində baş vermiş dəyişikliklərin tədqiqi üzrə monitorinqlərin aparılması, torpaq ehtiyatlarının mühafizəsi, torpaqların eroziyasının və səhralaşmanın analizi (spektral analizlər) məqsədi ilə kosmik təsvirlərdən istifadə olunacaq.
Xatırladaq ki, ƏMDK ölkədə Torpaqların Elektron Kadastr Uçotu İnformasiya Sisteminin yaradılması və rəqəmsal kadastr xəritələrinin tərtibi ilə bağlı işlər aparır. Bu tədbirlər Azərbaycan Respublikası Prezidentinin torpaqların elektron uçotunun aparılması və rəqəmsal kadastr xəritələrinin hazırlanması ilə bağlı tapşırıqlarına və 2016-cı il 7 mart tarixli Fərmanına əsasən həyata keçirilir. Bu işlər çərçivəsində artıq Bakı, Sumqayıt, Gəncə şəhərlərinin, 12 rayonun torpaqlarının uçotu işi yekunlaşıb, bu torpaqlar üzərindəki daşınmaz əmlaklar barəsində müfəssəl baza yaradılıb. Layihə çərçivəsində, həmçinin pay torpaqları ilə bağlı uyğunsuzluqlar aradan qaldırılır. Uçot işinin ölkə üzrə 2019-cu ilin sonunadək yekunlaşdırılması nəzərdə tutulur.
Bölmənin digər xəbərləri
