Bakıda keçirilən “Açıq İnnovasiyalar üzrə Startap Turu” Azərbaycanın ən yaxşı startaplarını müəyyən edəcək YENİLƏNİB VİDEO
Bakı, 17 aprel, Elvira Məmmədova, AZƏRTAC
Aprelin 17-də Bakıda ilk dəfə Nəqliyyat, Rabitə və Yüksək Texnologiyalar Nazirliyi və Rusiya Federasiyasının "Skolkovo" Fondunun təşkilatçılığı ilə "Açıq İnnovasiyalar üzrə Startap Turu” (Open Innovations Startup Tour) keçirilir.
AZƏRTAC xəbər verir ki, tədbirdə Rusiyadan "Skolkovo" texnoparkının nümayəndələri, startapçılar, biznes qurumlarının təmsilçiləri iştirak edirlər.
Roud-şou formatında keçirilən tədbir startapçılar, biznes nümayəndələri arasında əlaqələrin yaradılması, təcrübə mübadiləsi üçün əlverişli platformadır. Bu tur artıq 4 ildir keçirilir və Rusiya, eləcə də MDB məkanında texnoloji mədəniyyətin populyarlaşdırılması və perspektivli layihələrin müəyyənləşdirilməsi üzrə irimiqyaslı tədbir hesab edilir. Cari ildə bu turun 14 şəhərdə keçirilməsi planlaşdırılıb. Tədbirin əsas məqsədi yüksək texnologiyalar sahəsində perspektivli və innovativ layihələrin həyata keçirilməsinə dəstək verməkdir.
“Layihənin coğrafiyası ildən-ilə genişlənir. Bu isə o deməkdir ki, layihə iştirakçılarımızla birlikdə inkişaf edir. Düşünürəm ki, fəaliyyətə yeni başlayan şirkətlərin gələcək inkişafı üçün təkcə maliyyə dəstəyi deyil, ilhamlanmaq böyük əhəmiyyətə malikdir. Bizim əvvəlki startap turlarımızın qaliblərinin uğur tarixçəsi də məhz bu ilham mənbəyidir. Çünki onlar bir daha sübut edirlər ki, layihə laureatlarının və “Skolkovo” Fondu qrupunun birgə işi yüksək nəticələr verir. İnanırıq ki, azərbaycanlı startapçılar da bu uğurlara imza atacaq”, - deyə “Skolkovo” Fondunun nümayəndəsi Pekka Vilyakaynen vurğulayıb.
Nəqliyyat, rabitə və yüksək texnologiyalar nazirliyinin şöbə müdiri Tahir Məmmədov bildirib ki, hazırda müsabiqəyə qatılan startapçılarımız öz layihələrini təqdim etməklə beynəlxalq prosesdə iştirak edəcəklər. “Bu Startap Turu təkcə Rusiyanın regionlarında deyil, eyni zamanda, Azərbaycanla yanaşı, bir sıra qonşu ölkələri əhatə edir. Finalda Azərbaycanda bir neçə startap layihəsinin qalib gəlməsi gözlənilir. Fürsətdən istifadə edərək Azərbaycanda fəaliyyət göstərən startapçılara, öz innovativ ideyalarına dəstək almaq istəyən gənclərə bir daha müraciət edərək bildirmək istəyirəm ki, İnformasiya Texnologiyalarının İnkişafı Dövlət Fondu tərəfindən artıq növbəti qrant müsabiqəsi elan olunub. Bu istiqamətdə də aktiv olsunlar, fondun saytında onlayn şəkildə qeydiyyatdan keçməklə öz layihələrini təqdim etsinlər. Öz layihələrini Azərbaycan dövlətinin dəstəyi ilə reallaşdırmaq üçün yaranmış şəraitdən faydalansınlar”, - deyə T.Məmmədov bildirib.
"Skolkovo" texnoparkının baş direktoru Renat Batırov və Azərbaycan Yüksək Texnologiyalar Parkının direktoru vəzifəsini icra edən Kənan Bayramov Azərbaycanın ən yaxşı startaplarını müəyyən edəcək müsabiqənin iştirakçılarına uğurlar arzulayıblar.
İki gün davam edəcək Startap turu çərçivəsində qlobal tendensiyalar və beynəlxalq təcrübələr haqqında maarifləndirmə sessiyaları, sahibkarların şəxsi və peşəkar keyfiyyətlərinin inkişafı üçün treninqlər və yerli startapçılar üçün müsabiqə keçiriləcək. Müsabiqədə iştirak edəcək layihələr üçün biotibb, informasiya texnologiyaları və sənaye istiqamətləri əsas hesab edilir. Həmçinin xarici layihələrin Azərbaycan bazarına tanıtımını təmin etmək məqsədilə tədbir çərçivəsində "Demo Günlər"in də keçirilməsi planlaşdırılır.
Müsabiqədə birinci yeri tutan qalib mükafatla yanaşı, "Skolkovo" Texnoparkında təşkil olunacaq texnoloji sahibkarlar üçün "Startup Village" startap-konfransında iştirak hüququ əldə edəcək, ikinci və üçüncü yerləri tutan qaliblər isə digər mükafatlara layiq görüləcək.
Qeyd edək ki, müsabiqənin 2016-cı il üzrə qalibi “Daxili orqanların kompleks terapiyası üçün antimikrob preparatlarının mikrokapsullaşdırılmış formalarının hazırlanması” layihəsi ilə “Kənd təsərrüfatında və sənayedə biotexnologiyalar” istiqaməti üzrə Rusiyanın Krasnodar vilayətindən olan Valeriya Şaxova olub. Layihənin əsas ideyası dərman maddələrinin heyvanların orqanizmində çətin yerlərə ünvanlı çatdırılması üçün preparatın hazırlanmasıdır. Layihə üzərində iş 2009-cu ildə başlanılıb, 5 il sonra qrup Stavropol Taun Əleyhinə İnstitutu ilə əməkdaşlıq qurmaq imkanı əldə edib.
Bölmənin digər xəbərləri
