VII Xəzər Beynəlxalq Yol İnfrastrukturu və İctimai Nəqliyyat “Road&Traffic 2017” sərgisi öz işinə başlayıb YENİLƏNİB VİDEO
Bakı, 26 aprel, Elvin Camalov, AZƏRTAC
VII Xəzər Beynəlxalq Yol İnfrastrukturu və İctimai Nəqliyyat “Road&Traffic 2017” sərgisi öz işinə başlayıb.
AZƏRTAC xəbər verir ki, sərginin açılış mərasimində nəqliyyat, rabitə və yüksək texnologiyalar naziri Ramin Quluzadə bildirib ki, Azərbaycan Respublikasının Prezidenti İlham Əliyevin nəqliyyat sektoruna göstərdiyi diqqət nəticəsində dəmir yolu, su və hava nəqliyyatı vasitələri ilə yükdaşımaların həcmi artıb. Şərq və Qərb arasında körpü rolunu oynayan Azərbaycan mühüm tranzit daşımalara əsas tərəfdaş kimi qəbul edilir. Hazırda Xəzərin sahilində ən böyük liman Bakı Beynəlxalq Dəniz Ticarət Limanıdır və onun tərkibində Azad Ticarət Zonası yaradılır ki, bu da ölkəmizə investisiya qoyulması üçün geniş şərait yaradır. İrəlidə görüləcək işlər çoxdur. İnanıram ki, qarşıya qoyulan vəzifələri layiqincə yerinə yetirəcəyik.
R.Quluzadə qeyd edib ki, ənənəvi olaraq hər il keçirilən bu sərgiyə maraq ildən-ilə artır. Ən son texnologiyaların və yeniliklərin nümayiş olunduğu builki sərgi də həmişə olduğu kimi təcrübə mübadiləsinə və yeni əməkdaşlığın qurulmasına xidmət edəcək.
“ITE Group” şirkətinin regional direktoru Edvard Stron bildirib ki, artıq illərdir ki, iqtisadiyyatın bütün sahələrini əhatə edən sərgiləri Azərbaycan hökuməti ilə birgə təşkil edirik. Bu sektorlar sırasında nəqliyyat mühüm yer tutur və Azərbaycan hökuməti bu sahəyə böyük investisiyalar qoyur. Bir çox ölkələrdə bizim şirkət nəhəng sərgilər təşkil edir. Bu sərgilər sırasına “TransRussia” (Moskva), “TransPoland” (Varşava), “TransUzbekistan” (Daşkənd), “TransUkraine” (Kiyev) və “TransitKazakhstan” (Almatı) kimi ixtisaslaşmış nəqliyyat-logistika sərgiləri, eləcə də “BreakBulk” beynəlxalq sərgilər (Antverpen, Hyuston, Şanxay, Əbu-Dabi, Kuala-Lumpur) və digərləri daxildir.
“Ümid edirəm ki, bu sərgi nəqliyyat sektorunun mühüm rolunu Azərbaycanda vurğulayacaq. Qeyd etmək lazımdır ki, burada keçirilən “TransCaspian/Translogistica-2017” sərgisində 14 ölkədən 88, “ROAD & TRAFFİC” sərgisində 11 ölkənin 26 şirkətin nümayəndələri iştirak edir. Şirkətlərin 30 faizi bu sərgidə ilk dəfə iştirak edir”, - deyə E.Stron vurğulayıb.
Qeyd edək ki, “TransCaspian/Translogistica-2017” sərgisi kommersiya şirkətləri ilə yanaşı, “Azərbaycan Dəmir Yolları” QSC, “Bakı Beynəlxalq Dəniz Ticarət Limanı” QSC, “Azərbaycan Xəzər Dəniz Gəmiçiliyi” QSC, Azərbaycan Respublikası Dövlət Dəniz Administrasiyası, “Ukrzaliznıtsya” Ukrayna Dəmir Yolları şirkəti, “Həştərxan Dəniz Limanı” QSC və digər bu kimi dövlət nəqliyyat strukturlarını bir araya toplayıb.
Sərgidə nəqliyyat sahəsi üzrə məhsul və xidmətlərin geniş çeşidi təqdim olunur. “Yükdaşımaları və Logistika” sektorunda yük sahiblərinə yüklərin dəmiryol və dəniz vasitəsilə daşınması üçün optimal variantlar təklif olunur. “Dənizçilik sənayesi” sektoru çərçivəsində çoxfunksiyalı qəza-xilasetmə gəmiləri, qayıq və çoxtəyinatlı sürət katerlərinin modelləri, eləcə də dəniz və çay gəmilərinin layihələndirilməsi, modernləşdirilməsi və yenidən təchiz olunması, habelə konversiya üzrə mühəndislik təminatı, ponton, yanalma körpüsü və yaxta limanlarının istifadəyə hazır şəkildə tikintisi təklif edilir. Bu sektorda Türkiyə Gəmiqayırma Şirkətləri Assosiasiyası da iştirak edir. Ənənəvi “Dəmiryol infrastrukturu və Hərəkət heyəti” sektorunda lokomotiv və vaqon modelləri, dəmiryol nəqliyyatının təmir və istehsalı üzrə xidmətlər, eləcə də avtomatik idarəetmə məhsulları, yanacaq sərfiyyatının qeydiyyat sistemi və lokomotiv dizelinin avtomatik buraxılması və dayandırılması, habelə diaqnostika üçün texnoloji avadanlıqlar təklif olunur.
Sərgi çərçivəsində işgüzar proqramın keçirilməsi planlaşdırılıb. Sərgi proqramı çərçivəsində “AVP Texnologiya” MMC, “RIRTCD” ASC ilə birlikdə “Lokomotiv təsərrüfatı üçün qabaqcıl texnologiyalar” mövzusunda seminar təşkil edib. “Rusaqrotrans” ASC şirkəti isə öz stendində taxıl yüklərinin Rusiyadan Azərbaycan, İran, Gürcüstan və Türkiyə istiqamətlərində daşınması üzrə təqdimat keçirəcək.
“TransCaspian/Translogistica” sərgisi ilə eyni platformada oxşar sektor üzrə daha iki sərgi: VII Xəzər Beynəlxalq Yol İnfrastrukturu və İctimai Nəqliyyat “Road&Traffic 2017” və IV Xəzər Beynəlxalq Kater və Yaxtalar “CIBS 2017” sərgiləri keçirilir. İştirakçı və ziyarətçilərə bir-biriləri ilə görüşərək işgüzar əlaqələr qurmaq üçün imkan yaradan daha bir işgüzar platforma, yəni “B2B” formatlı görüşlər sərgilərin işgüzar proqramının əsasını təşkil edir. Bu görüşlərdə sərgilərin yerli ziyarətçi şirkət və eksponentləri iştirak edəcəklər. “B2B” formatlı görüşlər sərgi çərçivəsində ilk dəfə təşkil olunur və eksponentlərə öz həmkarları ilə bir masa ətrafında görüşlər keçirmək və eyni zamanda bir neçə əsas ziyarətçi ilə danışıqlar aparmaq baxımından unikal imkan yaradır. “B2B” formatlı görüşlər aprelin 27-də saat 10:00 - 13:00-da Bakı Ekspo Mərkəzində keçiriləcək.
Beləliklə, “TransCaspian/Translogistica” sərgisi həm Azərbaycanın, həm də region ölkələrinin dövlət nəqliyyat strukturlarını təmsil edən rəhbər və mütəxəssislərlə görüşmək, perspektiv dövlət infrastruktur layihələri ilə tanış olmaq, eləcə də yeni işgüzar müqavilələr imzalamaq üçün yük sahibləri, sənaye müəssisələrinin rəhbərləri, avtomobil parklarının sahibləri və müvafiq profilli sektorları təmsil edən digər maraqlı tərəflərlə görüşmək üçün unikal imkandır. Sərgi peşəkar ziyarətçilər üçün 26-28 aprel tarixində, tələbələr üçün isə aprel ayının 28-də açıq olacaq. Sərgidə xüsusi uşaq guşəsi fəaliyyət göstərir. Sərgiyə uşaqlarla gəldiyiniz zaman, onları “Aqil və Bilgi” şirkətinin nümayəndələrinə etibar edə bilərsiniz. Siz sərgi iştirakçıları ilə görüşlər keçirərkən, həmin peşəkar şəxslər uşaqlarınızı faydalı və maraqlı əyləncə növləri ilə məşğul edəcəklər. 2017-ci ildə “Iteca Caspian” şirkətinin tərəfdaşları arasında rəsmi səyahət agentliyi “Premier Tour” şirkətləri, o cümlədən “Hyatt Regency” və “Qafqaz Point Hotel” mehmanxanaları (rəsmi otellər), yer alır. Sərginin təşkilatçıları qismində “Iteca Caspian” və onun böyük britaniyalı tərəfdaşı “ITE Group” şirkətləri çıxış edirlər.
Sərgi Azərbaycan Respublikası Nəqliyyat, Rabitə və Yüksək Texnologiyalar Nazirliyi və TRASEKA tərəfindən dəstəklənir.
Bölmənin digər xəbərləri
