Qaxda yeni yaradılan aqropark rayon iqtisadiyyatının güclənməsinə böyük təkan verəcək VİDEO
Qax, 28 oktyabr, Mustafa Dadaşov, AZƏRTAC
Prezident İlham Əliyevin qeyri-neft sektorunun inkişafının sürətləndirilməsi, aqrar sahədə intensiv texnologiyaların tətbiqi ilə bağlı tapşırığına uyğun olaraq, ölkəmizdə aqroparkların yaradılması istiqamətində işlər uğurla davam etdirilir. Rəqabətqabiliyyətli kənd təsərrüfatı məhsullarının istehsalında, ixrac potensialının artırılmasında xüsusi əhəmiyyət kəsb edən aqroparkların yaradılması kənd təsərrüfatı sahəsində əlaqələndirilmiş vahid sistemin, eləcə də istehsalçı-emalçı-istehlakçı münasibətlərinin formalaşmasında, yeni iş yerlərinin açılmasında əhəmiyyətli rol oynayacaq.
Dövlətimizin başçısı Nazirlər Kabinetinin 2017-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında aqroparkların yaradılmasının əhəmiyyətinə toxunaraq deyib: “Ölkəmizdə 38 aqroparkın yaradılması prosesi gedir. Onlardan ikisi artıq fəaliyyət göstərir. Qalan aqroparklarda işlər gedir. Bu işlər tam nəzarət altındadır, mənə müntəzəm olaraq məlumat verilir. Hesab edirəm ki, bu aqroparkların uğurlu fəaliyyəti bizim bütün sahibkarların diqqətini cəlb edəcək. Bu, həm sahibkarlar, həm dövlət, həm də bizim valyuta ehtiyatlarımızın artırılması üçün çox gəlirli sahədir”.
Qaxda yaradılan aqroparkda taxılçılıq, bitkiçilik və meyvəçilik təsərrüfatları fəaliyyət göstərəcək
Belə aqroparklardan biri də Qax rayonunun Ağyazı kəndinin ərazisindədir. Qax şəhərindən 30 kilometr aralıda, Ağyazı çölündə yaradılan aqroparkın ümumi ərazisi 2044 hektardır. Aqroparkın infrastrukturunun qurulması istiqamətində qısa müddətdə xeyli iş görülüb.
“Ulu-Aqro” MMC-nin icraçı direktoru Məhərrəm Məhərrəmov AZƏRTAC-a müsahibəsində aqroparkın tərkibinə daxil olacaq obyektlər, təsərrüfat sahələri barədə məlumat verib, indiyədək görülmüş işlərdən və nəzərdə tutulan tədbirlərdən söz açıb.
Müsahibimiz bildirib ki, taxılçılıq, bitkiçilik və meyvəçilik təsərrüfatlarını özündə birləşdirəcək aqroparkın ərazisində gələcəkdə heyvandarlıq kompleksinin yaradılması da nəzərdə tutulur. Aqroparkın ərazisinin suvarma suyu ilə təmin olunması üçün hazırda Əyriçay dəryaçasından 1200 millimetr diametrli borularla 4,5 kilometr uzunluğunda su xətti çəkilir. Tezliklə ərazidə “pivot” suvarma sisteminin quraşdırılmasına başlanılacaq. İndiyədək aqroparkın ərazisində 9 vaqon ev, 1 tərəzi quraşdırılıb, 3 ofis binası tikilib. Taxıl, qarğıdalı, soya və digər kənd təsərrüfatı məhsullarının saxlanması üçün inşa edilən və ümumi tutumu 8 min ton olan 4 anbar binasından üçünün tikintisi artıq başa çatdırılıb. Aqroparkın maddi-texniki bazasının yaradılması məqsədilə indiyədək 23 ədəd müxtəlif təyinatlı kənd təsərrüfatı texnikası gətirilib.
Tezliklə bağçılıq təsərrüfatının yaradılmasına başlanılacaq
Məhərrəm Məhərrəmov diqqətə çatdırıb ki, aqroparkın ərazisində 2017-ci ilin məhsulu üçün payızlıq taxıl əkilmiş 244 hektar buğda sahəsindən cari mövsümdə 922 ton məhsul tədarük edilib. Hər hektardan orta məhsuldarlıq 38 sentnerə yaxın olub. Bundan əlavə, 43 hektar günəbaxan sahəsindən 82 ton məhsul götürülüb. Soya bitkisinin biçini isə davam edir. Eyni zamanda, 2018-ci ilin məhsulu üçün ərazidə 1900 hektar sahədə şum aparılıb, indiyədək 800 hektar sahəyə arpa və buğda səpilib.
Bağçılıq təsərrüfatının yaradılması üçün aqroparkın ərazisində 287 hektar sahədə qoz və badam, 128 hektarda isə alma, armud, şaftalı və gilas ağaclarının əkilməsi planlaşdırılır. Meyvə ağaclarının əkilməsi üçün artıq yerlər müəyyənləşdirilib və tezliklə tinglərin əkininə başlanılacaq.
Aqroparkda 300-dək iş yeri açılacaq
Aqroparkda aparılan tikinti-quraşdırma işlərini “Körpü Bina Tikinti” MMC-nin kollektivi yerinə yetirir. Sahə rəisi Söhrab Əliyev AZƏRTAC-a bildirib ki, su xəttinin çəkilməsi üçün maneçilik törədən 5 təpə ağır texnikanın köməyi ilə qazılaraq hamarlaşdırılır. Əraziyə 16 kilometr uzunluğunda elektrik xəttinin çəkilişi davam etdirilir.
Aqroparkda 300-dək daimi və mövsümi iş yerinin açılması nəzərdə tutulur.
Şübhə yoxdur ki, yeni yaradılan aqropark rayon iqtisadiyyatının sürətli inkişafına, aqrar sahənin ixrac potensialının artmasına, əhalinin məşğulluğunun təmin olunmasına öz töhfəsini verəcək.
Bölmənin digər xəbərləri
