Qazax və Ağstafada 30 min əhalinin istifadə etdiyi 5 avtomobil yolu yenidən qurulub VİDEO
Bakı, 10 noyabr, AZƏRTAC
Qazax rayonunda 2, Ağstafa rayonunda isə 3 avtomobil yolu “Azəravtoyol” ASC tərəfindən yenidən qurularaq istifadəyə verilib. Yenidən qurulan yolların ümumi uzunluğu 41.3 kilometr təşkil edir.
ASC-nin mətbuat xidmətindən AZƏRTAC-a bildirilib ki, buraya Qazax rayonunda 2.7 kilometr uzunluğunda olan yerli əhəmiyyətli Qazax-Düzqışlaq yolunun Hüseynbəyli hissəsi və Qazax-Yuxarı Əskipara yolunun 5-ci kilometrdən ayrılan 2.7 kilometr uzunluğunda Kommuna yolu, Ağstafa rayonunda isə Bakı-Ələt-Qazax-Gürcüstan ilə dövlət sərhədi avtomobil yolunun 458-ci kilometrdən ayrılan 9.8 kilometr uzunluğa malik Ağstafa-Aşağı Kəsəmən-Zəlimxan yolu və 16.6 kilometr uzunluğunda Vurğun-Köhnəqışlaq yolu, həmçinin respublika əhəmiyyətli Ağstafa-Poylu-Gürcüstan ilə dövlət sərhədi avtomobil yolunun 33-cü kilometrindən ayrılan 9.5 kilometrlik Soyuqbulaq-Tinglik yolu daxildir.
Sözügedən yollar yerli əhəmiyyətlidir və 3-cü texniki dərəcəyə uyğun olaraq 2 hərəkət zolağı enində yenidən qurulub. Yolların hərəkət hissəsinin eni 6 metr, çiyinlərin eni isə hər bir istiqamət üzrə 2 metr olmaqla yol yatağının eni 10 metr təşkil edir.
Layihə çərçivəsində yollar boyu yeni yol yatağı və yol əsası inşa edilib, 2 qat olmaqla yeni asfalt-beton örtüyünün döşənməsi işləri aparılıb.
Yenidənqurma işləri zamanı Vurğun-Köhnəqışlaq yolunun 14.5-ci kilometrində uzunluğu 32 metr olan Sağ Sahil magistral kanalı körpüsü inşa olunub, yolun 12.5-ci kilometrində isə uzunluğu 64 metr olan körpü əsaslı təmir edilib.
Layihəyə uyğun olaraq, yaşayış məntəqələri ərazisində kommunikasiya xətlərinin yerləri dəyişdirilib və 88 ədəd müxtəlif diametrli (300 mm-1250 mm-dək) dairəvi və düzbucaqlı suötürücü boruların tikintisi həyata keçirilib.
Bundan başqa, hərəkətin normal təşkili üçün yollar boyu 296 ədəd məlumatverici lövhə və yol nişanları quraşdırılıb, 874 ədəd işıq əksetdirici dirək qoyulub və yol boyu yol xətlənməsi işləri aparılıb. Tikinti 3 ay ərzində tamamlanıb və yollar yerli sakinlərin istifadəsinə verilib.
Yenidənqurma işləri nəticəsində 17 yaşayış məntəqəsinin 30 minə yaxın əhalisinin gediş-gəlişi xeyli rahatlaşıb, yük və sərnişin daşınması isə asanlaşıb.
Bölmənin digər xəbərləri
