İQTİSADİYYAT
Berlində “Transxəzər Şərq-Qərb ticarət və tranzit dəhlizinin imkanları” mövzusunda biznes-forum keçirilib VİDEO
Berlin, 22 noyabr, AZƏRTAC
Azərbaycan Respublikasının Almaniya Federativ Respublikasındakı səfirliyinin təşkilatçılığı, Alman-Azərbaycan Forumu, Alman İqtisadiyyatının Şərq Komitəsi və “Deutsche Bank”ın dəstəyi ilə noyabrın 22-də Berlində Azərbaycanın nəqliyyat, tranzit və logistika potensialına həsr olunmuş “Transxəzər Şərq-Qərb ticarət və tranzit dəhlizinin imkanları” mövzusunda biznes-forum keçirilib.
AZƏRTAC xəbər verir ki, tədbirdə Almaniyanın dövlət qurumlarının, özəl sektorun və kütləvi informasiya vasitələrinin 100-ə yaxın nümayəndəsi iştirak edib. Almaniyanın “Deutsche Bahn Engineering and Consulting GmbH”, “Airbus”, “Kühne & Nagel”, “Kocks Ardelt Kranbau GmbH”, “Uniper” və digər qabaqcıl şirkətləri toplantıda təmsil olunublar.
Alman-Azərbaycan Forumunun idarə heyətinin üzvü, “Deutsche Bank”ın Mərkəzi və Şərqi Avropa ölkələri üzrə icraçı direktoru Peter Tils qonaqları salamladıqdan sonra Azərbaycanın Almaniyadakı səfiri Ramin Həsənov və Alman İqtisadiyyatının Şərq Komitəsinin icraçı direktoru Mixael Harms giriş nitqləri söyləyiblər.
Səfir Ramin Həsənov çıxışında ölkəmizin iqtisadiyyatının şaxələndirilməsində və qeyri-neft sektorunun inkişafında nəqliyyat sektorunun əhəmiyyətini vurğulayıb və Azərbaycanın transregional nəqliyyat bağlantılarının daha da gücləndirilməsinə verdiyi töhfə barədə danışıb. O, Azərbaycanın həyata keçirdiyi regional layihələr və alman şirkətləri üçün yaranan biznes perspektivlərini qeyd edib. Ramin Həsənov, həmçinin Ermənistanın təcavüzü nəticəsində Azərbaycan torpaqlarının 20 faizinin işğal olunduğunu, 1 milyondan artıq insanın qaçqın və məcburi köçkün vəziyyətində yaşadığını və işğal olunmuş ərazilərimizdə nəqliyyat infrastrukturunun vəhşicəsinə dağıdıldığını iştirakçıların diqqətinə çatdırıb, işğalın regional əməkdaşlığa və davamlı inkişafa əsas maneə olduğunu vurğulayıb.
Mixael Harms çıxışında cari ildə Azərbaycanda səfərdə olduğunu və təmsil etdiyi Alman İqtisadiyyatının Şərq Komitəsinin gələn il ölkəmizə yüksək səviyyəli nümayəndə heyətinin səfərini həyata keçirəcəyini bildirib. Natiq ölkəmizdə dinamik inkişafın şahidi olduğunu, müxtəlif sahələrdə iqtisadi islahatların aparıldığını və nəticədə Azərbaycanın nəqliyyat və logistika sahələrində əməkdaşlıq üçün yeni imkanların yarandığını qeyd edib.
Daha sonra Azərbaycan Respublikasının Tranzit Yükdaşımalar üzrə Koordinasiya Şurası ofisinin rəhbəri Elçin Əhmədov “Trans-Xəzər nəqliyyat dəhlizinin perspektivləri”, Dövlət Dəniz Administrasiyası Aparatının rəhbəri Əhməd İsmayılov “Trans-Xəzər dəhlizi vasitəsilə dəniz nəqliyyatı”, Dövlət Gömrük Komitəsinin Gömrük Nəzarətinin Təşkili Baş İdarəsinin ticarət dövriyyəsində yüklərə nəzarət şöbəsinin baş inspektoru Fərid Vəliyev “Gömrük və sərhəd keçidinin asanlaşdırılması”, Bakı Beynəlxalq Dəniz Ticarət Limanının baş direktorunun müşaviri Tural Əliyev “Bir kəmər-bir yol təşəbbüsünün reallaşdırılmasında Ələt azad ticarət zonası əsas alət kimi”, “ADY Konteyner” MMC-nin direktoru Natiq Cəfərov “Şərq-Qərb, Şimal-Cənub, Cənub-Qərb dəmir yolu şəbəkələri vasitəsilə yeni tranzit imkanları” mövzularında məruzələrlə çıxış ediblər. Sonra tədbir iştirakçılarının sualları cavablandırılıb.
Biznes-forumda Trans-Xəzər nəqliyyat dəhlizi haqqında videoçarx nümayiş olunub.
Tədbir çərçivəsində, eyni zamanda, Almaniyanın özəl sektorunun nümayəndələri ilə keçirilmiş işçi nahar zamanı “B2B” danışıqları və biznes şəbəkələşməsi müzakirələri baş tutub.
Vüqar Seyidov
AZƏRTAC-ın xüsusi müxbiri
Berlin