Bayram yarmarkaları: alan da razı, satan da razı REPORTAJ VİDEO
Quba, 28 dekabr, Elxan Yusifli, AZƏRTAC
Qubada açılan bayram satış yarmarkasından həm alıcılar, həm də satıcılar razılıq edir.
AZƏRTAC-ın bölgə müxbiri xəbər verir ki, dekabrın 27-dən Quba şəhərinin mərkəzi meydanında təşkil olunan yarmarkada ərzaq və kənd təsərrüfatı malları sakinlərə bazardakı qiymətdən 15-20 faiz ucuz təklif olunur.
Artıq ikinci gündür ki, rayon sakinləri yarmarkadan bayram bazarlığı edirlər. Yarmarkada ət satışı ilə məşğul olan Sadıq İsayev alıcıların çox olduğunu bildirir. “Alıcı ona görə çoxdur ki, qiymətlər münasibdir. Bazarda ətin bir kiloqramı 11 manat olduğu halda, biz burada 9 manatdan satırıq. Keyfiyyətli, təzə ətdir. Öz təsərrüfatımızın heyvanıdır. Bizə də sərfəlidir, alıcıya da”, - deyə satıcı vurğulayır.
Yarmarkada rayonun ən ucqar yaşayış məntəqəsindən olan təsərrüfatçılar da öz məhsullarını satırlar. Xınalıqdan gələn Anar Niftəliyev və digər həmkəndliləri yarmarkaya əsasən bal, pendir, şor və kərə yağı çıxarıblar. “Bu, bizim üçün əla fürsətdir. Məhsullarımızı sərfəli qiymətə sata bilirik. Həm də bazardakından xeyli ucuz. Xınalığın motal pendiri, kərə yağı dadına görə seçilir. Bazarda nehrə yağı 14-15 manatdır, biz isə 8 manata satırıq. Pendir də həmçinin”, - deyə Anar Niftəliyev bildirib.
Bayram yarmarkasından əli dolu çıxan Nadir Gərayev də qiymətlərdən razılıq edir: “Kiloqramı 9 manata ət aldım. Bazardakından 2-3 manat ucuzdur. Özüm pensiyaçıyam. Qiymətlərin ucuz olması bizə çox sərf edir. Kiloqramı 8 manata nehrə yağı, 30 qəpiyə kələm almışam. Yarmarkanın təşkilindən çox razıyam”.
Alıcı Elçin Dəniyarov da yarmarkaya bayram bazarlığı üçün gəlib. Meyvə və tərəvəz məhsulları alan Quba sakini qiymətlə yanaşı, məhsulların keyfiyyətinin də yaxşı olduğunu deyir: “Adətən ucuz ət keyfiyyətsiz olur. Burada isə ucuz qiymətə təzə kəsilmiş mal əti satılır. Ona görə də növbə yaranıb. Meyvə-tərəvəz də almışam. Bayram yarmarkasının açılması çox gözəl təşəbbüsdür. Tanışlarıma da bu yarmarka barədə məlumat vermişəm”.
Yarmarkanın satıcılarından biri - Müslüm Həlimov rayonun Zərqova kəndindəndir. O, alıcılara ucuz qiymətə quru meyvələr və ədəvalar təklif edir. Deyir ki, bazarda qoz ləpəsi 12 manat olduğu halda, yarmarkada 9 manata satır. Şabalıd da bazardakından 2 manat ucuzdur. İlboyu topladığı itburnu qurusu, sumax da yarmarkada yaxşı satılır.
Qeyd edək ki, rayon icra hakimiyyətinin təşəbbüsü ilə keçirilən yarmarkaya, ümumilikdə, 35 çeşiddə 10 tondan çox məhsul çıxarılıb.
Bölmənin digər xəbərləri
