Bakı, 17 yanvar, AZƏRTAC

F.Köçərli adına Respublika Uşaq kitabxanasında 20 Yanvar hadisələrinin 28-ci ildönümü ilə əlaqədar “Həqiqət uğrunda ölümləriylə, ölümü kamına çəkdi şəhidlər” adlı tədbir keçirilib.

Kitabxanadan AZƏRTAC-a bildirilib ki, tədbirdə 20 Yanvar faciəsində canlarından keçmiş şəhidlərimizin xatirəsi bir dəqiqəlik sükutla yad edilib.

Kitabxananın direktoru Şəhla Qəmbərova deyib ki, SSRİ rəhbərliyinin göstərişi ilə törədilmiş dəhşətli cinayət Azərbaycan xalqının müstəqillik uğrunda mübarizə əzmini nəinki qıra bilmədi, əksinə, milli azadlıq mübarizəsini daha da gücləndirdi. Buna görə də 20 Yanvar xalqımızın tarixinə təkcə ümumxalq hüzn günü kimi deyil, qəhrəmanlıq salnaməsi kimi də həkk olunub. Çünki bütün dünya xalqımızın qəhrəmanlığının, mübarizliyinin, azadlıq ruhunun yenilməzliyinin şahidi oldu. Sovet ordusunun qarşısına silahsız, əliyalın çıxaraq canlarından keçən 20 Yanvar şəhidləri xalqımızın qəhrəmanlarıdırlar.

O, çıxışında 20 Yanvar faciəsinə ilk siyasi qiymətin həmin vaxt Moskvada yaşayan ulu öndər Heydər Əliyev tərəfindən verildiyini diqqətə çatdırıb. Yanvarın 21-də ümummilli lider Heydər Əliyevin böyük cəsarət nümayiş etdirərək Azərbaycanın Moskvadakı daimi nümayəndəliyinə gəlib təcavüzə kəskin etirazını bildirməsi, qanlı faciəni törədənləri dünya ictimaiyyəti qarşısında ittiham etməsi xüsusi vurğulanıb. 20 Yanvar hadisələrinə siyasi-hüquqi qiymətin yalnız ulu öndər Heydər Əliyevin hakimiyyətə qayıdışından sonra - 1994-cü ildə verildiyi qeyd olunub.

Tədbirdə ulu öndər Heydər Əliyevin siyasi kursunu layiqincə davam etdirən İlham Əliyevin hər zaman 20 Yanvar şəhidlərinin xatirəsinin uca tutulmasına və şəhid ailələrinin sosial məsələlərinin yoluna qoyulmasına xüsusi diqqət göstərdiyi qeyd edilib.

Tədbir zamanı iştirakçılara 20 Yanvar faciəsi ilə bağlı sənədli film təqdim olunub. Kitabxananın rəssam oxucuları tərəfindən çəkilən 1990-cı il 20 Yanvar hadisələrini əks etdirən rəsm əsərləri sərgilənib.

Sonda H.Sarabski adına Bakı şəhəri 7 nömrəli Uşaq Musiqi məktəbinin şagirdlərinin ifasında konsert proqramı təqdim olunub.