Bakı, 13 may, AZƏRTAC

Heydər Əliyev Fondunun təşəbbüsü ilə keçirilən Bakı marafonu böyük əhəmiyyətə malik bir təşəbbüsdür. Bu marafon hər şeydən əvvəl sağlam həyat tərzini təşviq edir. Bu, həmçinin müxtəlif peşə sahibi olan insanların bir məqsəd ətrafında birliyinin nümunəsidir. Bu cür tədbirlər vətəndaş birliyinə, dövlətin vətəndaşların bütün maraqlarını təmin etmək üçün həyata keçirdiyi siyasətə verilən bir dəstəkdir. Heydər Əliyev Fonduna təşəkkürümü bildirirəm ki, yaşından, mənsubiyyətindən, dünyagörüşündən, vəzifəsindən asılı olmayaraq insanları bir araya gətirmək, bir məqsədə doğru yönəltmək, maneələri dəf etmək üçün özünəinam aşılamaq kimi məsələləri özündə əks etdirən belə bir layihənin müəllifidir.

AZƏRTAC xəbər verir ki, bu fikirləri Heydər Əliyev Fondunun təşəbbüsü ilə keçirilən “Bakı Marafonu 2018”in iştirakçısı Milli Məclisin sədr müavini Bahar Muradova deyib.

Bahar Muradova qeyd edib ki, marafona olan maraq onun iştirakçılarının sayının ildən-ilə artacağını deməyə əsas verir. “Sevindirici haldır ki, Azərbaycan vətəndaşları sağlam həyat tərzini və vətəndaş həmrəyliyini təşviq edən bu cür layihələrə, çağırışlara çox fəal şəkildə qoşulurlar”, - deyə parlament sədrinin müavini vurğulayıb.