Geologiya və Geofizika İnstitutunun əməkdaşı məşhur xeyriyyəçinin ailəsi haqqında kitab nəşr etdirib
Bakı, 29 yanvar, AZƏRTAC
AMEA-nın Geologiya və Geofizika İnstitutunun (GGİ) aparıcı elmi işçisi, geologiya-mineralogiya üzrə fəlsəfə doktoru Səidə Mirizadənin məşhur azərbaycanlı milyonçu, xeyriyyəçi, neft maqnatı Hacı Zeynalabdin Tağıyev ailəsinin bəzi dövrlərinə həsr etdiyi “Keçmişə səyahət” (rus dilində) kitabının təqdimatı keçirilib.
İnstitutdan AZƏRTAC-a bildirilib ki, tədbirdə müəssisənin direktorunun elmi işlər üzrə müavini, AMEA-nın müxbir üzvü Dadaş Hüseynov yeni nəşrin məziyyətlərindən danışıb. Səidə Mirizadə isə kitabın yazılma tarixindən, istifadə etdiyi foto, məktub və xatirələrdən, məşhur xeyriyyəçi ilə bağlı görüşdüyü insanların təəssüratlarından söz açıb. Hacı Zeynalabdinin nəvəsinin həyat yoldaşı olan müəllif bildirib ki, tarixi sənədləri araşdırarkən Tağıyevlə bağlı sənədlər, azərbaycanlı milyonçu haqqında Azərbaycan və çar Rusiyası mətbuatında yazılmış rəylər onda qürur hissi yaşadıb.
AMEA-nın Milli Azərbaycan Tarixi Muzeyinin elmi katibi Fərhad Cabbarov, GGİ-nin əməkdaşı, geologiya-mineralogiya üzrə elmlər doktoru Oqtay Babazadə və başqaları çıxış edərək kitab haqqında təəssüratlarını bölüşüblər. Həmçinin iştirakçıların sualları cavablandırılıb. Təqdimat mərasimində belə bir təklif də səsləndirilib ki, Səidə Mirizadənin həyat yoldaşı olmuş H.Z.Tağıyevin nəvəsi, geologiya-mineralogiya üzrə elmlər doktoru, professor, Azərbaycan Neft və Kimya İnstitutunun (indiki Azərbaycan Dövlət Neft və Sənaye Universiteti) kafedra müdiri Rəsmi Abdullayev və oğlu yer elmləri üzrə fəlsəfə doktoru, BP-nin aparıcı mütəxəssisi Nazim Abdullayev haqqında da bir nəşr hazırlansın.
Bölmənin digər xəbərləri
