Yan Uiqers: Dövlət İmtahan Mərkəzi tərəfindən keçiriləcək “IAEA 2019” konfransından gözləntilərimiz böyükdür VİDEO
Bakı, 1 fevral, AZƏRTAC
Bakıya səfərimin məqsədi sentyabrın 22-dən 27-dək Dövlət İmtahan Mərkəzi tərəfindən burada “Qiymətləndirmə və qərar qəbuletmə: fərdi və institusional həll yolları” mövzusunda keçiriləcək “IAEA 2019” konfransı ilə bağlı məsələləri müzakirə etmək, hazırlıq işləri ilə yaxından tanış olmaqdır.
AZƏRTAC xəbər verir ki, bu fikirləri Təhsilin Qiymətləndirilməsi üzrə Beynəlxalq Assosiasiyanın (IAEA) idarə heyətinin üzvü və qiymətləndirmə üzrə təhsil eksperti Yan Uiqers jurnalistlərə müsahibəsində deyib:
- Konfransla bağı Dövlət İmtahan Mərkəzinin Direktorlar Şurasının sədri Məleykə Abbaszadə, habelə konfransın təşkilat komandası ilə görüşdüm. Konfransa hazırlıq işlərini, həyata keçiriləcək tədbirləri müzakirə etdik. Konfransın təşkil ediləcəyi “Fairmont Baku” otelinə getdim. İndiki mərhələyədək işlər yüksək səviyyədə təşkil edilib.
-IAEA haqqında bir qədər ətraflı məlumat verməyinizi xahiş edirik. Bu təşkilata üzv olmağın ölkə üçün nə kimi əhəmiyyəti var?
-Təhsilin Qiymətləndirilməsi üzrə Beynəlxalq Assosiasiya 1974-cü ildə yaradılıb. IAEA ali və orta təhsil müəssisələrində, iş yerlərində təhsilin qiymətləndirilməsində iştirak edən qurumlar üçün yaradılmış qlobal forumdur. Dünyanın 50-dən çox ölkəsindən imtahan təşkil edən qurumlar, universitet fakültələri, tədqiqatla məşğul olan təşkilatlar, o cümlədən dövlət qurumları Assosiasiyanın üzvləridir. IAEA-nın 90-dan çox institusional, eləcə də fərdi tədqiqatçıların daxil olduğu 40-dan çox üzvü var.
IAEA-ya üzv təşkilatın əldə etdiyi təcrübə ölkədə təhsilin keyfiyyətinin daha da artmasına kömək edir
IAEA-nın əsas məqsədi təhsilin ümumi keyfiyyətini artırmaq üçün təhsil üzrə qiymətləndirmə vasitələrinin təkmilləşdirilməsi və müvafiq şəkildə tətbiq edilməsində təhsil qurumlarına kömək etməkdir. Bu məqsədə çatmağın ən yaxşı yolu beynəlxalq tərəfdaşlıqdır. Odur ki, IAEA dünyadakı müvafiq qurumlar və fərdlər arasında əlaqələrin inkişaf etdirilməsinə çalışır.
Qeyd edim ki, qarşılıqlı məqsədlərə nail olmaq üçün IAEA-nın UNESCO-da məsləhətçi statusu var. Assosiasiya 2016-cı ildən etibarən Təhsildə Keyfiyyətə Nəzarət üzrə Şəbəkənin (NEQMAP) müxbir üzvüdür. IAEA-nın Afrikada və Avropada təhsilin qiymətləndirilməsi üzrə assosiasiyalarla da yaxın əlaqələri var.
Assosiasiya ildə bir dəfə üzv ölkələrdən birində konfrans keçirir. Məsələn, Sinqapur, ABŞ, Cənubi Afrika, Gürcüstan, Böyük Britaniya və digər ölkələrdə konfranslar təşkil edilib. Xatırladım ki, 2007-ci il sentyabrın 16-dan 21-dək Tələbə Qəbulu üzrə Dövlət Komissiyası (indiki Dövlət İmtahan Mərkəzi) Bakıda IAEA-nın (International Association for Educational Assessment) “Milli qiymətləndirmə sistemlərinin və təhsil standartlarının qarşılıqlı asılılığı” mövzusunda 33-cü Beynəlxalq Konfransının təşkilatçısı olub, 2008-ci ildə IAEA-nın İcraiyyə Komitəsinin üzvü seçilib.
Konfranslar çərçivəsində iştirakçılar arasında məlumat mübadiləsi (üzvlər və qeyri-üzvlər) və qiymətləndirmə alətlərinin inkişafı üçün təlim IAEA-nın məqsədlərinə çatması üçün çox vacib görüşlərdir.
Assosiasiyaya üzv olmağın əhəmiyyəti ilə bağlı qeyd edə bilərəm ki, təşkilatlar IAEA-ya ünsiyyət platformasına daxil olmaq məqsədilə üzv olurlar. Bu ünsiyyət platforması, yəni illik konfranslar, həmçinin Assosiasiyanın elmi nəşrləri, saytı onun üzvləri arasında əlaqələrə dəstək verir. Üzv təşkilatın əldə etdiyi təcrübə, imkanlar, eyni zamanda, ölkəyə şamil olunur. Məktəblərdə, ali təhsil ocaqlarında bu təcrübə paylaşılır və nəticədə ölkədə təhsilin keyfiyyətinin daha da artmasına kömək edir. Nəzərə almaq lazımdır ki, Assosiasiyanın illik konfranslarında müxtəlif ölkələrin təhsil nazirliklərinin əməkdaşları da iştirak edirlər. Onlar qiymətləndirmə alətlərinin təhsil prosesinə təsirini öyrənmiş olurlar.
Konfransa hazırlıqla bağlı heç bir anlaşılmayan sual qalmayıb
-Bakıda keçiriləcək “IAEA 2019” Azərbaycanda təhsilin qiymətləndirilməsinə hansı töhfəni verəcək?
-Bu barədə çox müsbət fikirdəyəm. Dövlət İmtahan Mərkəzi tərəfindən keçiriləcək “IAEA 2019” konfransından gözləntilərimiz böyükdür.
Qeyd edim ki, istənilən konfransın uğuru iki amildən - təşkilatçılıq və konfransa təqdim edilən elmi işlərin məzmunundan asılıdır. Konfrans, həmçinin Azərbaycanda olan mütəxəssislərə qiymətləndirmə sahəsi üzrə beynəlxalq səviyyəli tədbirdə iştirak imkanı yaradır. Biz Assosiasiya olaraq yerli təşkilatların konfransa qatılmağı üçün daha az məbləğli bir rüsum müəyyən etmişik ki, onlar da iştirak imkanı əldə etsinlər.
-Dövlət İmtahan Mərkəzinin konfransa hazırlığını necə dəyərləndirirsiniz?
-Bildiyiniz kimi, konfrans Azərbaycanda ikinci dəfə keçiriləcək. Səfərim çərçivəsində müşahidələrimin yekunu olaraq 3 həftə sonra IAEA-nın idarə heyətində təqdimat edəcəyəm. Əminliklə deyirəm ki, konfransa hazırlıq yüksək səviyyədədir. Biz təşkilatçı qurumun rəhbəri ilə görüşdük, müzakirələr apardıq. Heç bir anlaşılmayan sual, indiki mərhələyə qədər görülməmiş iş qalmayıb. 2007-ci ildə də konfrans yüksək səviyyədə keçirilmişdi.
- Yeri gəlmişkən, həmin səfərinizdən sonra indi Bakıda hansı dəyişikləri görürsünüz?
-Yanvarın 31-dən şəhərinizdəyəm və fevralın 2-si səfərimin sonuncu günüdür. Aeroportdan tutmuş yol infrastrukturu, eləcə də görüş keçirdiyim məkanlar, yaxından tanış olduğum “Fairmont Baku” oteli, ümumiyyətlə, şəhərin gözəlliyi, bir sözlə, müşahidələrim, pozitiv fikirlər söyləməyə əsas verir.
“IAEA 2019” qiymətləndirmə və qərar qəbulunun fərdi və institusional həll yollarını göstərəcək
Qeyd edək ki, Bakıda keçiriləcək “Qiymətləndirmə və qərar qəbuletmə: fərdi və institusional həll yolları” mövzusunda “IAEA 2019” konfransı qərar qəbulunda qiymətləndirmənin tətbiqi (tələbə qəbulu, kadr seçimi və s.), qərarların verilməsində qiymətləndirmənin etibarlılığı və validliyi, tələbə qəbulu və kadr seçimi siyasətində mövcud olan çətinliklər və imkanlar məsələlərini əhatə edəcək. Bununla yanaşı, elmi araşdırmalar əsasında proqnozların verilməsi təcrübəsi paylaşılacaq, tələbə qəbulu və kadr seçimi sahəsində qiymətləndirmə alətlərinin gələcəyi, qiymətləndirmə nəticələri və qərar qəbuletmə məsuliyyəti, elektron qiymətləndirmə və mütərəqqi texnologiya əsaslı platformalar, qiymətləndirmə və qərar qəbuletmə prosesində obyektivlik prinsipi barədə müzakirələr aparılacaq.
Bölmənin digər xəbərləri
