Kamran İmanov: Ölkəmizin innovasiyalarla bağlı imkanlarından daha səmərəli istifadə etməliyik
Bakı, 9 noyabr, AZƏRTAC
Nəqliyyat, Rabitə və Yüksək Texnologiyalar Nazirliyinin dəstəyi, ABŞ-ın Azərbaycan Respublikasındakı səfirliyinin və “Microsoft” şirkətinin birgə təşkilatçılığı ilə “Əqli mülkiyyət hüquqları və kibertəhlükəsizlik” mövzusunda seminar keçirilib.
Əqli Mülkiyyət Agentliyinin mətbuat xidmətindən AZƏRTAC-a bildiriblər ki, tədbirdə Agentliyin İdarə Heyətinin sədri Kamran İmanov geniş məruzə ilə çıxış edib. Ölkəmizin “Doing Business-2019” reytinqində 190 ölkə arasında 25-ci yerdə olduğunu, o cümlədən “Biznesin başlaması”na görə 9-cu, “Kiçik investorların maraqlarının qorunması”na görə isə 2-ci yerdə qərarlaşdığını qeyd edən K.İmanov yeni dərc olunmuş “Doing Business-2020” hesabatında Azərbaycanın islahatçı 20 ölkə sırasına daxil edildiyini diqqətə çatdırıb.
O, Dünya İqtisadi Forumunun “Qlobal Rəqabətqabiliyyətlilik İndeksi-2019” hesabatında Azərbaycanın 11 pillə irəliləyərək, 141 ölkə arasında 58-ci yeri tutduğunu və 12 indikatordan 8-i üzrə irəlilədiyini vurğulayıb, bu cür kardinal dəyişikliklərin əqli mülkiyyətin qorunmasında da öz əksini tapdığını, Azərbaycanın həmin hesabatın “Əqli mülkiyyətin qorunması” göstəricisinə görə 141 ölkə arasında 30-cu yerdə qərarlaşdığını xüsusi olaraq diqqətə çatdırıb.
Agentliyin sədri qeyd edib ki, bütün bunlar Azərbaycan Respublikasının Prezidenti İlham Əliyevin rəhbərliyi altında aparılan islahatların davamlılığına verilən beynəlxalq dəyərdir, bir tərəfdən dövlətimizin başçısının düzgün iqtisadi strategiyasının, digər tərəfdən institusional islahatların həyata keçirilməsinin nəticəsidir. Əqli mülkiyyət sahəsi həyata keçirilən islahatların innovasiyalı əsasları ilə dəqiq rezonans yaradır ki, bu da əhəmiyyətli institusional və funksional dəyişikliklərlə müşahidə olunur. Məhz buna görə əqli mülkiyyət sisteminin qarşısında duran vəzifələr ölkənin innovasiya siyasəti ilə müəyyən edilir və ölkədə həyata keçirilən iqtisadi islahatlara xidmət edir.
Oktyabrın 15-də Azərbaycan Respublikasının Prezidenti İlham Əliyevin yanında keçirilən iqtisadi müşavirədə dövlət başçısı iqtisadi artımın təmin edilməsini müsbət hal kimi qeyd edərək, qarşımızda vacib məsələ qoyub: “Əlbəttə, biz istərdik ki, artım daha da yüksək olsun. Hesab edirəm ki, buna nail olmaq üçün kifayət qədər imkanlar, potensial var. Sadəcə olaraq, biz bu potensialdan maksimum səmərə ilə istifadə etməliyik”.
Prezidentin tapşırığına əsaslanan K.İmanov ölkəmizin innovasiyalarla bağlı ehtiyatlarından daha səmərəli istifadəsi məsələləri üzərində xüsusi dayanaraq “Qlobal İnnovasiya İndeksi-2019” hesabatında Azərbaycana aid məlumatların təhlilini aparıb. O qeyd edib ki, hesabatdakı rəqəmlər iki yekun nəticəyə gətirir: “Birincisi, ümumi imkanlarımız ümumi nəticələrimizi 13 pillə üstələyir. Deməli ehtiyatlarımızı səmərəli işlətməliyik. İkincisi, bizi geriyə salan “elmi-texnoloji məhsullar” göstəricisidir - 101-ci yer. Bu isə o deməkdir ki, yeniliklər kommersiyalaşmır, bazara innovasiyalı məhsul kimi çıxarılmır”.
K.İmanov Əqli Mülkiyyət Agentliyinin ABŞ-ın şirkət və təşkilatları ilə müvafiq sahədə əməkdaşlığına toxunaraq ABŞ Ticarət Departamenti Kommersiya Hüququnun İnkişafı Proqramı (CLDP) və Birləşmiş Ştatların Azərbaycandakı səfirliyinin dəstəyi ilə ötən il sentyabrın 10-11-də “Əqli Mülkiyyət mübahisələrinin həlli” mövzusunda hakimlər üçün təlim təşkil edildiyini, Microsoft, Trimble Tekla, Oracle kimi iri şirkətlərin nümayəndələri ilə ikitərəfli görüşlərin keçirildiyini və onların üzləşdiyi çətinliklərin aradan qaldırılması istiqamətində birgə tədbirlər görüldüyünü bildirib: “Dövlət qurumları və müəssisələrinə rəsmi sorğu məktubları ilə müraciətlər olunub və artıq alınan cavablar əsasında həmin təşkilatlarla ABŞ şirkətlərinin yerli nümayəndələrinin birbaşa görüşlərinə nail olunaraq lisenziyaların yenilənməsi və yenilərinin alınmasına dair danışıqlara başlanılıb. “Oracle” Korporasiyasının müraciətinə əsasən bəzi dövlət orqanlarına və şirkətlərinə Agentlik tərəfindən “Oracle”nin məhsullarından istifadə etmələrinə dair ünvanlanmış sorğulara cavablar daxil olmaqdadır. Məsələ təhlil olunur və gələcəkdə araşdırmaların nəticələrindən asılı olaraq birgə monitorinqlərin keçirilməsi də istisna edilmir”.
“Microsoft Corporation” şirkəti ilə əlaqədar ölkə başçısının xüsusi önəm verdiyi layihə çərçivəsində müvafiq dövlət qurumları və müəssisələri ilə aparılan təxirəsalınmaz işlər və görülən tədbirlər nəticəsində kütləvi lisenziyaların əldə olunmasına start verildiyini bildirən K.İmanov deyib: “Azərbaycanda əqli mülkiyyəti yaradan və onları innovasiyalı məhsula çevirən çoxsaylı tərəfdaş, startap və kompaniyaların açıq və rəqabətli bazarının formalaşmasında böyük potensialı var. Bu isə o deməkdir ki, ölkəmizin iqtisadi qüdrətini artıran, beynəlxalq reytinqlərdə daha yüksək mövqeləri əldə edən imkanlarını əqli mülkiyyətə hörmətlə yanaşaraq istifadə etməliyik”.
Bölmənin digər xəbərləri
