Madrid, 21 fevral, AZƏRTAC

Beynəlxalq münasibətlər və diplomatiya sahəsində İspaniyanın tanınmış araşdırmalar institutlarından biri sayılan Beynəlxalq və Strateji Araşdırmalar üzrə Fondda (FESEI) “Azərbaycanda 2019-cu ildə əldə olunan nailiyyətlər və 2020-ci il üzrə hədəflər” mövzusunda seminar təşkil olunub.

AZƏRTAC xəbər verir ki, ölkəmizin İspaniyadakı səfiri Anar Məhərrəmov seminarda çıxış edərək əvvəlki illərdə olduğu kimi, 2019-cu ildə də Azərbaycanda bütün sahələrdə, o cümlədən siyasi, iqtisadi və sosial sahələrdə dayanıqlı inkişafa nail olunduğunu, ilin əvvəlində qarşıya qoyulmuş bütün vəzifələrin uğurla icra edildiyini, bütövlükdə keçən ilin ölkədə dərin islahatlar ili olduğunu qeyd edib. Ölkənin 2019-cu il üzrə makroiqtisadi göstəricilərindən bəhs edən səfir bu il yanvarın 21-24-də Davos şəhərində keçirilmiş Dünya İqtisadi Forumunun Azərbaycan Respublikası Hökumətinin strateji baxışını (“Government long-term vision”) 10-cu yerə, hökumətin sabitlik təmin etmək bacarığını 11-ci yerə layiq görməsinin məhz ötən il əldə olunmuş nailiyyətlərlə sıx bağlı olduğunu diqqətə çatdırıb.

Azərbaycanın regionda irimiqyaslı enerji layihələrinin əsas təşəbbüskarı və iştirakçısı kimi çıxış etdiyini bildirən A.Məhərrəmov Avropa İttifaqının enerji təhlükəsizliyinə əhəmiyyətli töhfə verəcək TAP qaz boru kəmərinin 2020-ci ildə tamamlanmasının nəzərdə tutulduğunu qeyd edib. 2019-cu ildə Azərbaycanın bir sıra mötəbər beynəlxalq tədbirə ev sahibliyi etdiyi, Bakıda Qoşulmama Hərəkatının Zirvə Görüşünün keçirildiyi və Azərbaycanın BMT-dən sonra ikinci böyük beynəlxalq təsisata sədrlik edəcəyi diqqətə çatdırılıb. Ötən il Azərbaycanla İspaniya arasında dostluq, qarşılıqlı hörmət və dəstək əsasında qurulmuş münasibətlərin uğurla davam etdiyi bildirilərək il ərzində bir sıra mühüm tədbirlərin təşkil olunduğu qeyd edilib.

Ermənistanın təcavüzkar siyasəti nəticəsində Azərbaycan ərazisinin 20 faizinin - Dağlıq Qarabağ və yeddi ətraf rayonun hələ də işğal altında saxlanılmasının regionda sülh və təhlükəsizliyə ən böyük təhdid kimi qalmaqda davam etdiyini bildirən səfir münaqişənin tarixi, həqiqətləri, nəticələri, həlli ilə bağlı Ermənistanın apardığı qeyri-konstruktiv siyasət barədə seminar iştirakçılarına ətraflı məlumat verib. Xüsusi vurğulanıb ki, Ermənistanın azərbaycanlılara qarşı apardığı soyqırımı və etnik təmizləmə siyasəti nəticəsində 1 milyondan artıq soydaşımız qaçqın və məcburi köçkünə çevrilərək doğma yurdlarından didərgin düşüb. Məhz milli mənsubiyyətinə görə azərbaycanlılara qarşı 1992-ci il fevralın 26-da Xocalı şəhərində törədilmiş soyqırımı nəticəsində 613 nəfər, o cümlədən 106 qadın, 63 uşaq, 70 qoca qətlə yetirilib, 1275 dinc sakin əsir götürülüb, 155 nəfər itkin düşüb.

A.Məhərrəmov bu il fevralın 9-da Azərbaycan Respublikası Milli Məclisinə keçirilmiş növbədənkənar seçkilərin ölkənin demokratik inkişafı yolunda növbəti önəmli mərhələnin təzahürü olduğunu bildirib. Qeyd edilib ki, seçkilər Azərbaycan Respublikasının Konstitusiyası, Seçki Məcəlləsi və Azərbaycanın beynəlxalq öhdəliklərinə tam uyğun olaraq baş tutub.

Səfir diqqətə çatdırıb ki, Ermənistanın təcavüzü nəticəsində Azərbaycanda mövcud 125 seçki dairəsindən 7-nin ərazisinin tamamilə, 3-nün isə qismən işğal edilməsi səbəbindən, həmin ərazilərdən didərgin salınmış məcburi köçkünlərin konstitusion səsvermə hüquqlarından istifadə etmələri üçün ölkə ərazisində 523 seçki məntəqəsi yaradılıb. Xüsusi vurğulanıb ki, seçki prosesi Azərbaycan tərəfinin dəvəti ilə ölkəyə gəlmiş 883 beynəlxalq və 78 minədək yerli müşahidəçi tərəfindən izlənilib, həm beynəlxalq, həm də yerli müşahidəçilərin mütləq əksəriyyəti seçkilərin azad, demokratik və şəffaf şəraitdə keçdiyini təsbit ediblər.

2020-ci ildə Azərbaycanın müxtəlif formatlı beynəlxalq və ikitərəfli platformalarda çoxşaxəli əlaqələrinin genişləndirilməsi ilə dövlətin rifah və qüdrətinin möhkəmləndirilməsinə yönələn və milli maraqlara əsaslanan müstəqil xarici siyasət kursunun davam etdiriləcəyi vurğulanıb.

Çıxışdan sonra tədbirdə iştirak edən müəllim və tələbələrin mövzu ilə bağlı sualları cavablandırılıb.

Ölkəmizə aid fotoşəkillərdən ibarət təqdimat və ölkəmizi təbliğ etdirən video nümayiş etdirilib. FESEI-nin rəhbərliyi və tələbələr seminarın maraqlı keçdiyini və onlarda xoş təəssürat yaratdığını bildiriblər. Fondun prezidenti Xose Mariya Alveres de Eulate i Penyaranda etdiyi geniş məzmunlu çıxışa və təqdimata görə səfir A.Məhərrəmova təşəkkürünü bildirib.

Nigar Cəfərli

AZƏRTAC-ın xüsusi müxbiri

Madrid