Xaçmaz Reabilitasiya Mərkəzi əsaslı təmir və yenidənqurmadan sonra istifadəyə verilib VİDEO
Xaçmaz, 25 avqust, Elxan Yusifli, AZƏRTAC
Əmək və Əhalinin Sosial Müdafiəsi Nazirliyinin Xaçmaz Reabilitasiya Mərkəzi əsaslı təmir və yenidənqurmadan sonra istifadəyə verilib.
Müəssisənin açılışında Əmək və Əhalinin Sosial Müdafiəsi nazirinin müavini Hidayət Abdullayev, Xaçmaz Rayon İcra Hakimiyyətinin başçısı Elnur Rzayev, nazirliyin tabeliyindəki Dövlət Tibbi-Sosial Ekspertiza və Reabilitasiya Agentliyinin İdarə Heyətinin sədri Cavid Əbdül-Qədirov, mərkəzin əməkdaşları, əlilliyi olan şəxslər iştirak ediblər.
AZƏRTAC-ın bölgə müxbiri xəbər verir ki, Xaçmaz Reabilitasiya Mərkəzində əlilliyi olan şəxslərə keyfiyyətli reabilitasiya xidmətlərinin göstərilməsi üçün müasir tələblərə uyğun şərait yaradılıb. Burada müalicəvi bədən tərbiyəsi, kolonoterapiya, ozonoterapiya, elektrofarez və digər yeni prosedurlar tətbiq olunacaq. Mərkəzdə Xaçmaz və ətraf rayonlar üzrə il ərzində əlilliyi olan 600 şəxsə səmərəli fizioterapevtik üsulların tətbiqi əsasında bərpa müalicəsi xidmətləri göstəriləcək.
Müəssisənin açılışında Əmək və Əhalinin Sosial Müdafiəsi nazirinin müavini Hidayət Abdullayev çıxış edərək bildirib ki, Prezident İlham Əliyevin tapşırığına əsasən ölkəmizdə sosial proqramların daha da genişləndirilməsi, reabilitasiya infrastrukturunun müasirləşdirilməsi işləri geniş vüsət alıb. Ötən il nazirliyin Yevlax və Naftalan Reabilitasiya mərkəzləri, Mərdəkan Reabilitasiya Pansionatı, Protez-Ortopedik İstehsalat Mərkəzi əsaslı təmir və yenidənqurmadan sonra istifadəyə verilib. Bu istiqamətdə işlər davam edir.
Nazir müavini deyib ki, avqustun 11-də Lənkəran şəhərində, 18-də isə Şəki şəhərində Reabilitasiya mərkəzləri əsaslı təmir və yenidənqurmadan sonra istifadəyə verilib. Bu gün isə daha bir reabilitasiya müəssisəsi Xaçmaz şəhərində açılır. Beləliklə, avqust ayında artıq üçüncü reabilitasiya müəssisəsidir ki, istifadəyə verilir. Bu isə əlilliyi olan şəxslərin həm reabilitasiya imkanlarının artmasına, həm də onların müasir tələblərə uyğun bərpa-müalicə xidmətləri ilə təminatına imkan yaradır.
H.Abdullayev bu il Sumqayıt və Şirvan Reabilitasiya mərkəzlərinin, Şağan Reabilitasiya Pansionatının da əsaslı təmir və yenidənqurmadan sonra istifadəyə veriləcəyini deyib. Bildirib ki, 2020-ci ildə Qəbələ və Şəmkir rayonlarında Uşaq Reabilitasiya mərkəzlərinin açılması da planlaşdırılıb. Ümumilikdə, bu il nazirliyin yeni 8 reabilitasiya müəssisəsinin açılması nəticəsində hər il reabilitasiya xidmətləri ilə təmin edilənlərin sayı iki dəfə artaraq 28 minə çatacaq.
Xaçmaz Rayon İcra Hakimiyyətinin başçısı Elnur Rzayev rayonda belə bir müasir reabilitasiya ocağının yaradılmasının sosial sahəyə, həssas qruplara dövlət qayğısının daha bir əyani təzahürü olduğunu vurğulayıb.
Əlilliyi olan şəxslər çıxış edərək, onların sosial təminatının gücləndirilməsi sahəsində atılan addımlara, eyni zamanda, reabilitasiya infrastrukturunun müasir tələblərə uyğun qurulmasına görə Prezident İlham Əliyevə minnətdarlıqlarını ifadə ediblər.
Bölmənin digər xəbərləri
