Biləsuvar, 30 sentyabr, İsmayıl Cəfərli, AZƏRTAC

İki həmkəndli, iki şəhid... Biri 24, digəri 38 yaşında. Bənzər taleləri ilə Vətən müharibəsinin şəhid qəhrəmanlarına çevrildilər. Anım günləri qeyd olunan şəhidlərin doğulduğu Biləsuvarın Çaylı kəndindəki ata evləri, məzarları ziyarət edilib.

AZƏRTAC xəbər verir ki, Vətən müharibəsində qanları ilə tarix yazaraq şəhidlik zirvəsinə yüksələn oğullarımızdan biri də müddətdən artıq hərbi qulluqçu Kamran Məmmədzadədir. Vətənpərvərliyi, qorxmazlığı ilə seçilən Kamran həqiqi hərbi xidmətdən sonra tank komandirliyi kursunu müvəffəqiyyətlə bitirib. Sevinib ki, hərb sirlərinə dərindən yiyələnəcək, müdafiəsində dayandığı Vətən torpaqlarının bütövlüyü uğrunda müharibə başlayarsa, yağılara qarşı qəhrəmanlıqla vuruşacaq. Anası Həcər xanım deyir ki, o, hər an döyüş əmrinin verilməsini gözləyirdi. 2020-ci il sentyabrın 27-də Kamran son dəfə ondan sevinc içərisində halallıq istəyib.

Şəhid Kamran Məmmədzadənin anası Həcər Məmmədova: “Dedi ki, ana, əlimdə bayraq irəli gedirəm, biz torpaqlarımızı düşməndən alacağıq. Sentyabrın 29-u ölüm xəbəri gəldi. Mən hələ də balamın qoxusunu onun əynindən çıxan paltarlarından alıram. Onun saatı, qolundakı bayrağını saxlamışam. O, bayraq uğrunda şəhid olub. Qolundakı saatına baxıram hər gün. Hər dəfə mən onun saatının zənginə dururam. Onun saatı hələ susmayıb, mən elə bilirəm balam hələ də ölməyib”.

Kamranın Füzuli və Cəbrayıl istiqamətlərində düşmənlə döyüşdüyündən xəbərsiz olan kiçik qardaşı Maqsud da Vətən müharibəsinə Murov istiqamətindən başlayıb.

“Mən döyüşdə olanda elə bilirdim qardaşım sağdır. Müharibədən sonra evə qayıdanda bilmişəm ki, qardaşım şəhid olub. Mən öz qardaşımla fəxr edirəm”, - deyə Maqsud bildirib.

Bənzər taleyi Kamranın həmkəndlisi gizir Elməddin Babayev də yaşayıb. Elməddin artıq 15 il idi ki, Vətənin keşiyində dayanırdı. Peşəkar tank komandiri kimi böyük təlimlərdən dəfələrlə qalib çıxmışdı. Vətən müharibəsinin ilk günündən düşmənin illərdi yaratdığı keçilməz sədləri darmadağın edərək Tərtərdən Suqovuşana qədər şərəfli döyüş yolu keçib.

Şəhid Elməddin Babayevin anası Cəmilə Babayeva deyib ki, oğlu vətənpərvər, Vətənini, torpağını, ailəsini sevən biri idi: “O, bu günü gözləyirdi. Deyirdi ki, müharibə olan kimi düşmənin üzərinə gedəcəyəm. Bu yolda yeri gələrsə, şəhid olacağam. Ona da nail oldu, arzusuna çatdı. Düşmənlərə 3 gün ərzində qan uddurdu. Bu gün onun ildönümüdür. Mən onunla fəxr edirəm. Fəxr edirəm ki, belə qəhrəman oğlum var”.

Mənalı ömür yolları və şəhadətləri ilə bənzər olan şəhid Kamran Məmmədzadə ölümündən sonra “Vətən uğrunda”, “Cəbrayılın azad olunmasına görə”, “Füzulinin azad olunmasına görə”, “Cəsur döyüşçü” medalları, şəhid gizir Elməddin Babayev isə ölümündən sonra “Vətən uğrunda”, “Suqovuşanın azad olunmasına görə” və “Cəsur döyüşçü” medalları ilə təltif olunub.