20 Yanvar – şəhidliyə gedən yolun zirvəsidir
Ağsu, 16 yanvar (AZƏRTAC). Ağsu mərkəzi rayon kitabxanasında 20 Yanvar faciəsinin 23-cü ildönümü ilə əlaqədar “20 Yanvar - şəhidliyə gedən yolun zirvəsidir” mövzusunda “dəyirmi masa” keçirilmişdir.
AZƏRTAC xəbər verir ki, tədbirdə rayon ziyalıları, 20 Yanvar faciəsinin şəhidləri, gənclər iştirak etmişdir. “Dəyirmi masa”da “Azərbaycanda milli azadlıq hərəkatında 20 Yanvar hadisələrinin rolu”, “20 Yanvar faciəsinin günahkarları”, “20 Yanvar şəhidləri və gənclərin hərbi vətənpərvərlik tərbiyəsində onun rolu” mövzularında çıxışlar olmuş, fikir mübadiləsi aparılmışdır.
20 Yanvar hadisələrində 147 nəfər əliyalın insan qətlə yetirildiyini, 744 nəfərin yaralandığını diqqətə çatdıran natiqlər bu faciənin başda Mixail Qorbaçov olmaqla, keçmiş sovet imperiyasının xalqımızın azadlıq uğrunda mübarizəsinə qarşı yönəldilmiş bir qəsd olduğunu bildirmişlər. Qeyd edilmişdir ki, telestudiyanın enerji blokunun partladılaraq Azərbaycanın dünyadan təcrid edildiyi bir vaxtda xalqımızın qəhrəman oğlu, ümummilli liderimiz Heydər Əliyev həyatını təhlükəyə qoyaraq Moskvada bu vəhşiliyə qarşı çıxmış və onun əsl siyasi qiymətini vermişdir.
“Dəyirmi masa” iştirakçıları 20 Yanvar faciəsini xalqımızın azadlıq uğrunda mübarizə tarixinin qanlı səhifəsi kimi səciyyələndirərək bu günün heç vaxt unudulmayacağını vurğulamışlar.
Axırda iştirakçılar 20 Yanvar hadisələri haqqında sənədli filmə baxmış, hazırlanmış kitab sərgisi ilə tanış olmuşlar.
Bölmənin digər xəbərləri
