QAN YADDAŞI
“20 Yanvar - xalqımızın qəhrəmanlıq salnaməsidir” mövzusunda toplantı keçirilmişdir
Bakı, 18 yanvar (AZƏRTAC). Yanvarın 18-də Azərbaycan Dövlət Bədən Tərbiyəsi və İdman Akademiyasında 20 Yanvar faciəsinin 23-cü ildönümü ilə əlaqədar toplantı keçirilmişdir. “20 Yanvar - xalqımızın qəhrəmanlıq salnaməsidir” mövzusunda təşkil edilən tədbirin məqsədi xalqımıza qarşı törədilmiş qanlı hadisənin növbəti ildönümünün anılması və tarixi faktların gənclərə çatdırılmasıdır.
AZƏRTAC xəbər verir ki, əvvəlcə toplantı iştirakçıları akademiyanın foyesində 20 Yanvar faciəsinə həsr olunmuş rəsm sərgisi ilə tanış olmuşlar.
Sonra şəhidlərin xatirəsi bir dəqiqəlik sükutla yad edilmiş və Azərbaycanın dövlət himni səsləndirilmişdir.
Toplantıda çıxış edən gənclər və idman nazirinin müavini İntiqam Babayev 20 Yanvar faciəsinin xalqımızın yaddaşında dərin iz buraxdığını diqqətə çatdırmışdır. Bildirmişdir ki, gənclərimiz qəhrəmanlarını tanımalı və onların xatirəsini əziz tutmalıdırlar. Dəhşətli 20 yanvar gecəsində xalqımız qəhrəmanlığını və azadlıq uğrunda mübarizə əzmini bir daha bütün dünyaya bəyan etmişdir. Hadisələrə hüquqi-siyasi qiymət verilməsində, cinayətkarların adının xalqa bəyan edilməsində ümummilli liderimiz Heydər Əliyevin tarixi xidmətləri olmuşdur. Hazırda 20 Yanvar şəhidlərinin ailələrinə dövlətimiz tərəfindən yüksək diqqət və qayğı göstərilir.
Azərbaycan Dövlət Bədən Tərbiyəsi və İdman Akademiyasının rektoru Ağacan Abıyev demişdir ki, keçmiş sovet hökuməti 23 il əvvəl Bakıda qanlı aksiya törətməklə xalqımızın milli azadlıq hərəkatını boğmağa çalışmışdı. Lakin Azərbaycan xalqı əsl qəhrəmanlıq nümayiş etdirərək təpədən-dırnağadək silahlanmış düşmən ordusunun qabağından qaçmadı. Xalqımız qanı bahasına müstəqilliyini əldə etdi.
A.Abıyev vurğulamışdır ki, 20 Yanvar hadisələri bir çox siyasi xadimlərin də əsl simasını açdı. Onların əksəriyyəti faciə baş verən zaman qaçıb gizləndi. Lakin xalqımızın ümummilli lideri Heydər Əliyev o qanlı-qadalı gündə heç kimdən qorxmadan, özünün və ailəsinin həyatını təhlükə qarşısında qoyaraq Azərbaycanın Moskvadakı daimi nümayəndəliyinə gəlmiş və burada keçirdiyi mətbuat konfransında kəskin bəyanat verərək qanlı aksiyanın təşkilatçılarını və icraçılarını ittiham etmişdi.
Çıxış edən Milli Məclisin deputatları Sevinc Hüseynova, Fuad Muradov, YAP Gənclər Birliyinin sədri Seymur Orucov, Azərbaycan Tələbə Gənclər Təşkilatları İttifaqının sədri Şahin İsmayılov və digərləri şəhidlərin xatirəsinin dövlət səviyyəsində ehtiramla yad edildiyini nəzərə çarpdırmış, onların ailə üzvlərinə diqqət və qayğı göstərildiyini vurğulamışlar.
Toplantıda gənclər mövzu ətrafında fikir mübadiləsi aparmışlar.