20 Yanvar faciəsi Azərbaycan xalqına və insanlığa qarşı törədilmiş cinayətdir
Astara, 18 yanvar (AZƏRTAC). Yanvarın 18-də Yeni Azərbaycan Partiyası (YAP) Astara rayon təşkilatında 20 Yanvar faciəsinin 23-cü ildönümünə həsr olunmuş “20 Yanvar faciəsi Azərbaycan xalqına və insanlığa qarşı törədilmiş cinayətdir” mövzusunda “dəyirmi masa” keçirilmişdir.
AZƏRTAC xəbər verir ki, tədbir iştirakçıları 20 Yanvar faciəsi qurbanlarının xatirəsini bir dəqiqəlik sükutla yad etmişlər.
Toplantıda çıxış edən YAP Astara rayon təşkilatının sədr əvəzi Faiq Həsənov 23 il əvvəl imperiya ordusunun Bakıda törətdiyi qanlı cinayətləri yada salaraq 20 Yanvar faciəsinə hüquqi və siyasi qiymətin verilməsində ümummilli lider Heydər Əliyevin xidmətlərini yüksək qiymətləndirmişdir.
Heydər Əliyev Mərkəzinin direktoru Gülnarə Məcidova mövzu ilə bağlı məruzə etmişdir.
“Dəyirmi masa”da çıxış edənlər Qara Yanvar günlərində qızıl qanları ilə xalqımızın qəhrəmanlıq tarixinə parlaq səhifələr yazaraq şəhidlik zirvəsinə ucalan istiqlal mücahidlərinin xatirəsinin xalqımız tərəfindən həmişə böyük məhəbbətlə anıldığını bildirmişdir.
Bu böyük faciəyə hələ Moskva şəhərində yaşadığı dövrdə ilk etirazını bildirən və hadisəyə dəqiq qiymət verən ümummilli lider Heydər Əliyevin söylədiyi “20 Yanvar Azərbaycan tarixinin təkcə qanlı səhifəsi deyil, həm də şanlı səhifəsidir” sözləri diqqətə çatdırılmışdır.
Bölmənin digər xəbərləri
