20 Yanvar faciəsi hər zaman AŞPA-nın diqqət mərkəzində olacaqdır
Bakı, 20 yanvar (AZƏRTAC). İyirmi Yanvar faciəsi hər zaman Avropa Şurası Parlament Assambleyasının diqqət mərkəzində olmuş, bununla bağlı müvafiq qətnamələr qəbul edilmişdir. Bu qətliam bundan sonra da qurumun diqqət mərkəzində olacaqdır.
AZƏRTAC xəbər verir ki, bunu jurnalistlərə Milli Məclisin deputatı, Azərbaycanın Avropa Şurası Parlament Assambleyasındakı (AŞPA) nümayəndə heyətinin rəhbəri Səməd Seyidov demişdir.
S.Seyidov bildirmişdir ki, Azərbaycanın Avropa Şurasındakı sədrliyi dövrü ilə bağlı fəaliyyət planı hazırlanır. Bu istiqamətdə Avropa Şurası ilə konstruktiv iş gedir. O demişdir ki, tədbirlər planı və digər sənədlər Azərbaycanın sədrliyindən əvvəl qəbul olunacaqdır. Eyni zamanda, bu, Azərbaycan və Avropa Şurası əlaqələrinin inkişafına dəstək olacaqdır.
S.Seyidov qeyd etmişdir ki, AŞPA-nın qış sessiyasının gündəliyində Azərbaycanla birbaşa bağlı məsələnin müzakirəsi yoxdur. Ancaq bütün sessiyalar bizim üçün çox vacibdir. Ona görə ki, cari il mayın sonundan başlayaraq iyun ayından Azərbaycan artıq Avropa Şurasının Nazirlər Komitəsinə sədrlik edəcək və bu ilin sonuna qədər sədrlik Azərbaycanda olacaqdır.
Milli Məclisin deputatı vurğulamışdır ki, yanvar sessiyası bizim üçün əhəmiyyətlidir. Ona görə ki, AŞPA-nın yeni prezidenti və siyasi partiyaların yeni rəhbərləri seçiləcək və Azərbaycan hər bir seçkidə öz fəal mövqeyini bildirəcəkdir.
Bölmənin digər xəbərləri
