20 Yanvar faciəsi qurbanlarının əziz xatirəsi dərin ehtiramla anılmışdır
Bakı, 18 yanvar (AZƏRTAC). Azğınlaşmış sovet ordusunun erməni quldur dəstələri ilə birgə Azərbaycan xalqına qarşı qanlı terror aktı həyata keçirməsindən 23 il ötür.
Azərbaycanın azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi daxil olmuş bu tarix ölkəmizin hər yerində, bütün təşkilatlarda olduğu kimi, “Aşıq Şəmşir” Mədəniyyət Ocağı İctimai Birliyində (İB) də şəhidlərin əziz xatirəsi dərin ehtiramla qeyd olunmuşdur.
İB-dən AZƏRTAC-a bildirmişlər ki, bu münasibətlə keçirilmiş “20 Yanvar - şəhidlər unudulmur ” mövzusunda tədbirdə çıxış edənlər o qanlı şənbə gecəsində baş verən faciənin tarixi dərslərindən söhbət açmışlar. Bildirilmişdir ki, qədirbilən xalqımız bu qanlı faciədə həyatdan nakam getmiş övladlarına matəm saxlamaqla bərabər, eyni zamanda, onların şəhidlik zirvəsinə baxaraq başını dik tutmalıdır. Çünki Vətən və torpaq şəhidləri ilə ucalır.
Tədbir iştirakçıları Kəlbəcər rayon orta məktəblərinin şagirdləri ilə birgə Şəhidlər xiyabanını ziyarət etmiş, Azərbaycanın azadlığı yolunda canını fəda etmiş Vətən övladlarının məzarı üzərinə tər qərənfillər düzmüşlər.
Şəhidlər xiyabanını ziyarət zamanı məktəblilərə 20 Yanvar faciəsi haqqında ətraflı məlumat verilmiş, onlara İctimai Birliyin hazırladığı informativ bukletlər paylanılmışdır.
Bölmənin digər xəbərləri
