20 Yanvar faciəsinin 24-cü ildönümü Bolqarıstanda silsilə tədbirlərlə qeyd edilmişdir
Sofiya, 21 yanvar (AZƏRTAC). Azərbaycan Respublikasının Bolqarıstandakı səfirliyində 20 Yanvar faciəsinin 24-cü ildönümü ilə əlaqədar anım mərasimi keçirilmişdir.
Səfirlikdən AZƏRTAC-a bildirmişlər ki, tədbirdə Bolqarıstan ictimaiyyətinin nümayəndələri, bu ölkədə yaşayan azərbaycanlılar iştirak etmişlər.
Əvvəlcə faciə qurbanlarının xatirəsi bir dəqiqəlik sükutla yad olunmuşdur.
Səfir Emil Kərimov mərasimdə çıxış edərək Qanlı Yanvar faciəsi barədə ətraflı məlumat vermişdir. Bildirilmişdir ki, 1990-cı il yanvarın 19-dan 20-nə keçən gecə sovet imperiyası kommunist rejimini saxlamaq, Azərbaycan xalqının milli azadlıq hərəkatını boğmaq üçün xüsusi hazırlanmış hərbi birləşmələr vasitəsilə silahsız, dinc əhaliyə qarşı xüsusi qəddarlıqla qətllər törətmişdir.
Səfir vurğulamışdır ki, bu qanlı faciəyə dərhal münasibət bildirən yeganə şəxsiyyət Azərbaycan xalqının ümummilli lideri Heydər Əliyev olmuşdur. Ulu Öndər özünün və yaxınlarının həyatını təhlükədə qoyaraq Azərbaycanın Moskvadakı nümayəndəliyinə gələrək bu hadisəni törədənləri kəskin şəkildə tənqid etmiş, sovet hökumətinin humanizmə və hüquqi dövlət quruculuğu prinsiplərinə zidd hərəkətləri barədə dünya ictimaiyyətini məlumatlandırmışdır.
Həmin gün Azərbaycanın Bolqarıstandakı səfirliyi tərəfindən Sofiya Universiteti nəzdində fəaliyyət göstərən Azərbaycan Dili və Mədəniyyəti Mərkəzində 20 Yanvar faciəsi ilə əlaqədar tədbir keçirilmişdir.
Tədbirdə Sofiya Universitetinin rəhbər və müəllim heyəti, Azərbaycanda 1950-1970-ci illərdə təhsil almış bolqarıstanlı ziyalılar, səfirliyin əməkdaşları, bu ölkədə yaşayan azərbaycanlılar və KİV nümayəndələri iştirak etmişlər.
Burada da 20 Yanvar şəhidlərinin xatirəsi bir dəqiqəlik sükutla yad edilmişdir.
Səfir Emil Kərimov qonaqları salamlamış, Azərbaycan xalqının Müstəqillik uğrunda mübarizəsini boğmaq məqsədilə dağılmaqda olan Sovet imperiyasının yanvarın 19-da Bakıya qoşun yeridərək silahsız və dinc əhaliyə qarşı əsrin görünməmiş qırğınını törətdiyi barədə məlumat vermişdir. Diplomat qeyd etmişdir ki, sovet ordusunun əsgərləri əhaliyə divan tutmuş, günahsız insanları amansızlıqla qətlə yetirmişdir. Bir gecədə yüzlərlə azərbaycanlı yaralanmış və itkin düşmüşdür. Bütün bunlara baxmayaraq onlar xalqın müstəqillik və azadlıq iradəsini qıra bilməmişlər. Yüzlərlə insan Azərbaycanın müstəqilliyi və azadlığı yolunda şəhid olmuşdur.
E.Kərimov ümummilli lider Heydər Əliyevin 20 Yanvar faciəsinin dünya ictimaiyyətinə çatdırılması istiqamətində böyük işlər gördüyünü bildirmiş, faciəyə siyasi-hüquqi qiymətin yalnız Ulu Öndərin yenidən hakimiyyətə qayıtmasından sonra verildiyini vurğulamışdır.
Səfir qanlı faciədən 24 il keçməsinə baxmayaraq, xalqımızın və dövlətimizin öz şəhidlərini heç zaman unutmadığını, daim onların xatirəsini əbədiləşdirmək məqsədilə müxtəlif tədbirlər həyata keçirdiyini qeyd etmişdir.
Tədbirdə çıxış edən Şərq Dilləri və Mədəniyyəti Mərkəzinin müdiri, professor A.Fedotov, Bolqarıstan Milli Radiosunun müxbiri xanım V.Dvoretskaya, ölkəmizdə 1950-1970-ci illərdə təhsil almış professor G.Georgiyev və professor Ç.Hakov Bakıda olduqları müddətdə Şəhidlər xiyabanını ziyarət etdiklərini və sovet ordusu tərəfindən Azərbaycan xalqının azadlıq istəyinə qarşı törədilmiş qanlı cinayəti pislədiklərini bildirmişlər.
Azərbaycan Dili və Mədəniyyəti Mərkəzinin rəhbəri xanım S.Şıgayeva və Bolqarıstanda yaşayan Azərbaycan diasporunun nümayəndələri çıxışlarında Vətəndən uzaqda yaşadıqlarına baxmayaraq, bu qanlı faciəni xatırladıqlarını və onu heç vaxt unutmayacaqlarını vurğulamışlar.
Tədbirin sonunda “Lider” televiziyasının istehsalı olan “Qanlı Yanvara aparan yol” adlı sənədli film nümayiş edilmişdir.
Qanlı Yanvar faciəsi ilə bağlı səfirlik tərəfindən hazırlanan mətbuat məlumatı Bolqarıstanın dövlət qurumları, bu ölkədə akkreditə olunan diplomatik korpus və beynəlxalq təşkilatların nümayəndəlikləri arasında yayılmışdır.
İqbal Hacıyev
AZƏRTAC-ın xüsusi müxbiri
Sofiya
Bölmənin digər xəbərləri
