20 Yanvar faciəsinin ildönümü Ağcabədidə silsilə tədbirlərlə qeyd olunmuşdur
Ağcabədi, 21 yanvar (AZƏRTAC). 20 Yanvar faciəsinin ildönümü Ağcabədi rayonunda da geniş qeyd olunmuşdur. Rayonun idarə və təşkilatlarında, təhsil və mədəniyyət müəssisələrində yığıncaq və konfranslar keçirilmiş, foto və rəsm sərgiləri nümayiş etdirilmişdir.
Yanvarın 20-də rayon ictimaiyyəti, ağsaqqallar, gənclər, ziyalılar, əmək kollektivlərinin nümayəndələri, Qarabağ müharibəsi veteranları şəhidlər xiyabanına gələrək Vətənimizin müstəqilliyi və ərazi bütövlüyü uğrunda həlak olanların məzarları üzərinə və 20 Yanvar qurbanlarının xatirəsinə ucaldılmış abidə kompleksi önünə çiçək dəstələri düzmüşlər.
Tədbir Qarabağ Muğam Mərkəzində davam etdirilmişdir. Mərasim iştirakçıları burada təşkil edilmiş sərgidə şəhər incəsənət məktəbi şagirdlərinin 20 Yanvar faciəsi ilə bağlı rəsmlərinə baxmışlar.
Çıxış edənlər Azərbaycanın azadlığı və ərazi bütövlüyü uğrunda aparılan mübarizədən, 1990-cı il yanvarın 20-də baş verən hadisələrdən, faciəyə siyasi-hüquqi qiymət verilməsində, şəhidlərin adının əbədiləşdirilməsində ümummilli lider Heydər Əliyevin xidmətlərindən danışmışlar.
Daha sonra 20 Yanvar faciəsini əks etdirən video-film göstərilmiş, məktəblilərin hazırladığı ədəbi-bədii kompozisiya nümayiş olunmuşdur.
Bölmənin digər xəbərləri
