20 Yanvar faciəsinin ildönümünə həsr olunmuş anma tədbiri keçirilmişdir
Bakı, 18 yanvar (AZƏRTAC). Yanvarın 18-də Azərbaycan Bəstəkarlar və Rəssamlar ittifaqlarının birgə təşkilatçılığı ilə 20 Yanvar faciəsinin 23-cü ildönümünə həsr olunmuş anma tədbiri keçirilmişdir.
AZƏRTAC xəbər verir ki, tədbir iştirakçıları əvvəlcə Bəstəkarlar İttifaqının foyesində hazırlanmış rəssamlar Rövşən Məmmədovun, Rəfael Muradovun, Oqtay Quliyevin və Bayram Qasımxanlının əsərlərindən ibarət sərgi ilə tanış olmuşlar.
Azərbaycan Bəstəkarlar İttifaqının sədri, Xalq Artisti, professor Firəngiz Əlizadə xalqımızın azadlığı, ölkəmizin ərazi bütövlüyü uğrunda mübarizəyə qalxmış dinc əhaliyə divan tutulmasından, kütləvi terror nəticəsində günahsız insanların qətlə yetirilməsi və yaralanmasından, totalitar sovet rejiminin süqutu ərəfəsində onun cinayətkar mahiyyətindən danışmışdır. Bildirmişdir ki, həmin müdhiş gecədə həlak olan Vətən oğulları parlaq tariximizə qəhrəmanlıq səhifələri yazmışlar.
Firəngiz Əlizadə Azərbaycan bəstəkarlarının və musiqişünaslarının öz yaradıcılıqlarında faciəni və onun təsirlərini əks etdirdiklərini, bu mövzunun gələcəkdə də işlənəcəyini diqqətə çatdırmışdır.
Digər çıxışlarda da həmin müdhiş gecədə xalqımıza qarşı törədilən cinayətdən danışılmış, faciəli hadisənin Azərbaycan xalqının iradəsini, milli azadlıq uğrunda mübarizə əzmini qıra bilmədiyi vurğulanmışdır.
Sonra “Oazis” simli kvartetinin ifasında Azərbaycan və dünya bəstəkarlarının əsərləri səslənmişdir.
Bölmənin digər xəbərləri
