QAN YADDAŞI
20 Yanvar şəhidlərinin xatirəsi anılmışdır
Bakı, 18 yanvar (AZƏRTAC). Yanvarın 18-də Azərbaycan Dövlət Pedaqoji Universitetində (ADPU) 20 Yanvar faciəsinin 23-cü ildönümünə həsr olunmuş anma mərasimi keçirilmişdir.
AZƏRTAC xəbər verir ki, əvvəlcə mərasim iştirakçıları Şəhidlər xiyabanına gələrək, ölkəmizin müstəqilliyi, ərazi bütövlüyü uğrunda canlarından keçərək, şəhidlik zirvəsinə ucalmış Vətən övladlarının xatirəsinə dərin ehtiramlarını bildirmiş, məzarları üzərinə gül-çiçək dəstələri düzmüşlər.
ADPU-da keçirilən tədbirdə şəhidlərimizin əziz xatirəsi bir dəqiqəlik sükutla yad edilmişdir.
Mərasimdə universitetin tərbiyə işləri üzrə prorektoru, professor Rafiq Baxşəliyev Azərbaycan tarixinin azadlıq mübarizəsinin və qəhrəmanlıq salnaməsinin parlaq səhifələrindən olan 20 Yanvar faciəsinin səbəblərindən və mahiyyətindən danışmışdır. Bildirmişdir ki, 1990-cı il yanvarın 19-dan 20-nə keçən gecə sovet ordusunun Azərbaycan xalqına qarşı həyata keçirdiyi terror aktı nəticəsində XX əsrdə bəşər tarixində ən ağır cinayətlərdən biri baş vermişdir. Həmin dəhşətli hadisələr Azərbaycanda baş qaldıran azadlıq hərəkatına qarşı yönəlmiş amansız bir aksiya idi. Xalqımızın gözünü qorxutmaq, əzmini qırmaq üçün keçmiş imperiya rəhbərliyinin, xüsusilə də Mixail Qorbaçovun əmri ilə Azərbaycana sovet ordusunun nizami qoşun hissələri yeridilmiş, nəticədə Bakıda 147 nəfər öldürülmüş, 800 nəfər yaralanmış, 841 nəfər isə qanunsuz olaraq həbs edilmişdir.
Qanlı Yanvar hadisələrinə siyasi-hüquqi qiymət verilməsində, faciənin günahkarlarının üzə çıxarılmasında, şəhidlərin adının əbədiləşdirilməsində ümummilli liderimiz Heydər Əliyevin əvəzsiz tarixi xidmətləri olduğunu deyən R.Baxşəliyev Azərbaycanın hərtərəfli blokadaya alındığı bir vaxtda ulu öndər Heydər Əliyevin Moskvada başda M.Qorbaçov olmaqla, sovet rəhbərliyini kəskin ittiham edən bəyanat verməsini və xalqımızın səsini bütün dünyaya çatdırmasını xüsusi vurğulamışdır. O, ulu öndərin hakimiyyətdə olduğu dövrdə şəhidlərin xatirəsinin anılması ilə bağlı verdiyi fərman və sərəncamları qeyd etmiş, bu siyasi xəttin hazırda Prezident İlham Əliyev tərəfindən məqsədyönlü şəkildə davam etdirildiyini diqqətə çatdırmışdır.
Universitetin “Ümumi tarix kafedrası”nın dosenti Səmayə Mustafayeva Qanlı Yanvar hadisələri baş verməzdən qabaq dünyada, eləcə də Azərbaycanda gedən siyasi proseslərdən, qırğına gətirib çıxaran səbəblərdən və insanlığa sığışmayan acı nəticələrindən, azadlığımız və müstəqilliyimiz uğrunda şəhid olmuş həmvətənlərimizin fədakarlıqlarından bəhs edən məruzə ilə çıxış etmişdir.
20 Yanvar faciəsinin qəhrəmanlıq və şəhidlik zirvəsi kimi xalqımızın qan yaddaşına əbədi həkk olunduğunu bildirən ADPU-nun dosenti, şair Oqtay Rza qanlı qırğınlarda ali təhsil ocağının da tələbələrinin həlak olduğunu vurğulamış, şəhidlərimizə həsr etdiyi şeirlərini səsləndirmişdir.