Müstəqillik Günü münasibətilə Azərbaycanın Qətərdəki səfirliyi rəsmi qəbul təşkil edib VİDEO
Bakı, 28 may, AZƏRTAC
28 May- Müstəqillik Günü münasibətilə Azərbaycanın Qətərdəki səfirliyi Doha şəhərindəki “JW Marriott Marquis” mehmanxanasında rəsmi qəbul təşkil edib.
Səfirlikdən AZƏRTAC-a bildirilib ki, tədbirdə Qətərin dövlət qurumlarını təmsil edən bir sıra rəhbər şəxslər, o cümlədən Dövlət naziri və Qətər Milli Kitabxanasının prezidenti Hamad Bin Abdulaziz Əl-Kuvari, Xarici İşlər Nazirliyinin protokol idarəsinin rəisi İbrahim Faxro və yerli ictimaiyyətin bir sıra nümayəndələri, iş adamları, nüfuzlu KİV-lərin təmsilçiləri, o cümlədən ölkədə akkreditə olunmuş diplomatik korpusun rəhbərləri, Qətərdə yaşayan azərbaycanlılar iştirak ediblər.
Hər iki ölkənin Dövlət himnləri səsləndirildikdən sonra açıq elan olunan tədbirdə Qətər dövləti adından ticarət və sənaye naziri Şeyx Mohammad bin Hamad bin Qasem Əl Abdullah Al Tani bayram münasibətilə Azərbaycan Prezidentini və Azərbaycan xalqını təbrik edib.
Azərbaycan Qətərdəki səfiri Rəşad İsmayılov çıxış edərək Şərqdə ilk dəfə demokratik dövlət dəyərlərini yaratmış Azərbaycan Xalq Cümhuriyyətinin istiqlaliyyətimizi elan etməsi ilə xalqımızın müstəqillik əzmini nümayiş etdirməsindən, həmçinin yeni tarixi şəraitdə öz dövlət müstəqilliyini bərpa etməsindən danışıb. Səfir, ümummilli lider Heydər Əliyevin müdrik rəhbərliyi ilə ölkəmizin suverenliyinin qətiyyətlə qorunub möhkəmləndirildiyini diqqətə çatdırıb, Ulu Öndərin əzmkar səyləri ilə Azərbaycanın davamlı inkişaf strategiyasının əsasının qoyulduğunu bildirib. Prezident İlham Əliyevin rəhbərliyi altında ölkəmizin daxili və xarici siyasətində əldə edilmiş möhtəşəm uğurlardan danışıb, Azərbaycanın bütün istiqamətlər üzrə sürətlə tərəqqi etdiyini qeyd edib.
R.İsmayılov 2020-ci ilin payızında Müzəffər Ali Baş Komandan İlham Əliyevin rəhbərliyi ilə Azərbaycan Ordusunun 44 günlük Vətən müharibəsində torpaqlarımızın otuz illik işğalına son qoyduğunu bildirib, həmçinin İkinci Qarabağ müharibəsinin bizim şanlı tariximiz olduğunu vurğulayıb.
Səfir Prezident İlham Əliyevin Sərəncamı ilə 2022-ci ilin Azərbaycanda “Şuşa İli”nin elan edildiyini və bununla əlaqədar ölkəmizdə və onun hüdudlarından kənarda silsilə tədbirlərin keçirilməkdə olduğunu diqqətə çatdırıb.
Azərbaycan-Qətər münasibətlərindən danışan diplomat hər iki ölkə liderləri arasında dostluq münasibətlərinin yüksək səviyyədə olduğunu, qarşılıqlı səfərlərin həyata keçirildiyini, iqtisadi, ticarət, mədəniyyət və turizm əlaqələrinin getdikcə inkişaf etdiyini, həmçinin BMT, İƏT və Qoşulmama Hərəkatı kimi beynəlxalq təşkilatlarda faydalı əməkdaşlığın davam etdiyini bildirib.
Sonra Azərbaycanın tarixi, mədəniyyəti, iqtisadi inkişafı və uğurlarından bəhs edən filmin nümayiş olunub.
Sonra tədbir iştirakçılarına ziyafət verilib.
Tədbirdə iştirak edən qonaqlara ölkəmizin turizmi, tarixi və mədəniyyətini təbliğ edən ərəb dilində kitab və “İrs” jurnalları, o cümlədən milli kəlağayılar və Azərbaycan çayı hədiyyə olunub.
Tədbir keçirilən gün axşam saat 18:00-dan etibarən Doha şəhərindəki “Al Jaber Twin Tower- Century Marina” əkiz qüllələrinin üzərində dahi bəstəkar Üzeyir Hacıbəylinin Koroğlu uvertürasının sədaları altında Müzəffər Ali Baş Komandan, Prezident İlham Əliyevin və Qətər Əmiri Şeyx Təmim Bin Hamad Al Taninin şəkilləri, ölkəmizin dövlət rəmzi olan bayraq, Azərbaycan ordusunun zəfər simvolu kimi tanınan “Xarıbülbül” loqosu və “Happy Independence Day” yazısı əks olunan sözlə işıqlandırılıb.
Bölmənin digər xəbərləri
