Xaçmaz, 29 dekabr, Elxan Yusifli, AZƏRTAC

Ölkə üzrə ən iri heyvandarlıq təsərrüfatlarından sayılan “Yalama Aqropark”da bu il 473 ton ət, 8410 ton süd istehsal olunub.

AZƏRTAC-ın bölgə müxbiri xəbər verir ki, Xaçmaz rayonunun Yalama qəsəbəsində ölkə üzrə yaradılmış ilk aqroparkda saxlanılan heyvanların sayı 3135 başa çatdırılıb.

“Yalama Aqropark” heyvanların baş sayına görə ölkə üzrə fəaliyyət göstərən ən iri heyvandarlıq təsərrüfatlarından biridir. Heyvandarlıq təsərrüfatında Avstriya və Almaniyadan gətirilmiş “Simmental” cinsli inəklər bəslənilir.

2022-ci ildə aqroparkın heyvandarlıq kompleksində 1303 buzov doğulub. Sağılan inəklərin sayı min başa yaxındır. Aqroparkdan il ərzində ümumilikdə 1246 heyvan satılıb ki, bunlardan da 241 başı damazlıq düyədir.

Heyvandarlıq təsərrüfatının baytar həkimi Fərid Osmanlı bildirib ki, aqroparkda südlük-ətlik istiqamətli heyvanlar saxlanılır. Bu heyvanlarda südün keyfiyyəti göstəricilərinə görə digər cinslərdən fərqlənir. İstehsal edilən südün yağlılıq dərəcəsi 4,2 faiz və daha yuxarı olduğundan tərəfdaş emal müəssisələri tərəfindən kərə yağı istehsalında geniş tətbiq olunur. Stabil keyfiyyətli süd istehsalı ölkəmizin süd məhsullarına tələbatının ödənilməsində əhəmiyyətli rol oynayır.

"Simmental" cinsin ətlik keyfiyyəti yüksəkdir. Kökəldilmiş cöngələr 18 aylıqda 500 kiloqrama, 24 aylıqda 650 kiloqrama çatır. Yaxşı yemləmə və bəsləmə şəraitində 900-1100 qram sutkalıq çəki artımı əldə etmək mümkündür. Təmiz ət çıxarı 50-55 faiz olur.

Qarşıya qoyulan tapşırığa uyğun olaraq “Yalama Aqropark”ın əkin sahələri 3 dəfə artırılıb, eyni zamanda, istehsal genişləndirilib. Xaçmaz rayonunun İstisu qəsəbəsində Dövlət Ehtiyat Fondu torpaqlarından 956 hektar sahə uzunmüddətli icarəyə götürülərək əkin dövriyyəsinə qatılıb.

“Yalama Aqropark” MMC-nin əkinçilik xidmətinin rəhbəri Rza Rzayev bildirib ki, müəssisənin əkin dövriyyəsinə cəlb etdiyi torpaq sahəsi 1500 hektara çatdırılıb. Onun 830 hektarı pivot suvarma sistemi ilə təmin edilib. Hazırda daha 20 hektarda müasir suvarma sisteminin qurulması işləri aparılır.

Əkin sahələrində heyvandarlıq təsərrüfatının yem tələbatını ödəmək üçün taxıl və qarğıdalı bitkisinin, həmçinin digər yem bitkilərinin əkin həcmi genişləndirilib. Təsərrüfatda 280 hektar dən qarğıdalı, 130 hektar silosluq qarğıdalı, 200 hektar qarışıq senaj, 642 hektar arpa, 232 hektar yonca, 8 hektar gülül (vika) əkilib.