Ailəsi həkim olmasını istəsə də o, hərb sahəsini seçdi – şəhid mayorun ömür yolu VİDEO
Ağdam, 24 oktyabr, AZƏRTAC
Xalqımız Vətən müharibəsinin Qələbəsini öz qanları ilə tarixin səhifəsinə əbədi həkk edənləri heç zaman unutmayacaq. Azərbaycanın ərazi bütövlüyü uğrunda canını əsirgəməyərək ölümün gözünə dik baxan qəhrəman Vətən oğullarından biri də mayor Novruz Əsgərovdur.
AZƏRTAC-ın müxbiri xəbər verir ki, Novruz Əsgərov 1980-ci il dekabrın 1-də Ağdam rayonunun Quzanlı qəsəbəsində anadan olub. Ailəsi orta məktəbdə nizam-intizamı, oxumağı ilə fərqlənən Novruzun həkim olmasını istəsələr də o, hərb sahəsini seçib, canından çox sevdiyi Vətənə xidmət edib, 44 günlük Vətən müharibəsində torpaqlarımızın azadlığı uğrunda şəhidlik zirvəsinə yüksəlib.
Bacısı Esmira Quliyeva Novruz haqqında xatirələrini bölüşərək deyib: “Novruz uşaqlıqdan çox fəal idi. Müəllimləri həmişə ondan razılıq edirdilər. Orta məktəb attestatında bütün qiymətləri əla idi. Eyni zamanda, musiqi məktəbinə gedirdi, gözəl tar çalırdı. İdmanla da məşğul idi. Biz onun həkim olmağını istəyirdik. Amma o, hərbçi olmağı seçdi. Dedi ki, ən böyük arzusu itirilmiş torpaqları azad etməkdir. Novruz və digər hərbçilərimiz Prezidentimizin ətrafında yumruq kimi birləşərək, işğalda olan torpaqlarımızı bizə qaytardılar. Mən qardaşımla qürur duyuram. Mən Novruz da daxil olmaqla bütün şəhidlərimizlə fəxr edirəm ki, onlar bizə torpaqlarımızı qaytardılar”.
Qardaşı Qədir Quliyev Novruzun uşaqlıqdan vətənpərvər olduğunu, hərbiyə maraq göstərdiyini bildirib: “Novruz çox vətənpərvər oğlan idi. Uşaqlıqdan hərbiyə marağı var idi. Torpaqlarımızın işğal altında olması onun hərbi sahəni seçməsinə səbəb oldu. 1997-ci ildə Bakı Ali Birləşmiş Komandanlıq Məktəbinə daxil olub. 2001-ci ildə hərbi təhsilini başa vurub və ona diplomu Ulu Öndər Heydər Əliyev təqdim edib. Novruz həmin vaxtdan zabit kimi Vətənə xidmət edib. Şərəfli hərbi xidmət keçib. 2016-cı il Aprel döyüşlərində iştirak edib. Sentyabrın 28-də Suqovuşan-Talış kəndi istiqamətində şəhidlik zirvəsinə yüksəlib. Novruz kimi oğlanların hesabına 30 il işğal altında qalan torpaqlarımız azad olundu. Bu gün Azərbaycan xalqının başı ucadır”.
Mayor Novruz Əsgərov Azərbaycan Prezidentinin sərəncamlarına əsasən ölümündən sonra 3-cü dərəcəli “Rəşadət” ordeni, “Vətən uğrunda”, “Hərbi xidmətlərə görə”, “Suqovuşanın azad olunmasına görə” görə medalları ilə təltif edilib.
Bölmənin digər xəbərləri
