Azad olunan torpaqlarda açıq dərs: Hüşün məktəbliləri Şuşada Zəfər ruhunu yaşadılar FOTO VİDEO
Ağdaş, 5 noyabr, Rəşad Türkoğlu, AZƏRTAC
Ağdaş rayonunun şəhid Cavanşir Şirinov adına Hüşün kənd tam orta məktəbinin şagirdləri Zəfər günü ərəfəsində işğaldan azad edilən ərazilərdə, o cümlədən Şuşa şəhərində səfərdə olublar. Qələbə əzmi və qürur hissi ilə yola çıxan məktəblilər qədim mədəniyyət paytaxtımızda, tariximizin şahidi olan Cıdır düzündə açıq dərsdə iştirak ediblər.
AZƏRTAC-ın bölgə müxbiri Hüşün kənd tam orta məktəbində olub, şagirdlərin səfər təəssüratlarını öyrənib.
Məktəbin həyətində bizi mənalı və duyğulu bir mənzərə qarşıladı: birinci sinif şagirdləri Zəfər bayramına hazırlaşır, hərbi geyimdə sıraya düzülmüşdülər. Hər baxışda qürur, hər addımda sevinc, həyəcan hiss olunurdu.
Şagirdlərlə həmsöhbət olmaq üçün siniflərə doğru irəliləyirik. Bu, elə dərs vaxtının başlanmasına təsadüf edir. Məktəbin direktoru Rüfət müəllim dərs jurnalını götürərək sinif otağına gedir. O, həm də tarix müəllimidir. Onun hər cümləsində Vətən sevgisi, tarixə sədaqət duyulurdu. Dərs bitdikdən sonra şagirdlərlə söhbət edirik - hamısının gözündə bir parıltı var. Qürurludurlar, eyni zamanda, Azərbaycan əsgərinə minnətdardırlar…
Məktəbli Billur Nəsrullayeva səfər təəssüratlarını bölüşərək deyir: “Şuşa səfəri hər bir dəqiqəsi, hər bir anı ilə çox möhtəşəm və yadda qalan idi. Xüsusilə Cıdır düzündə keçirdiyimiz açıq dərs çox maraqlı oldu. Biz uzun illərdir Şuşa haqqında ancaq dərsliklərdə oxuyurduq, amma onu canlı görmək, o dağların havasını udmaq, qayaların səssizliyini dinləmək tamam başqa hisslər yaşatdı. Sanki tarix kitabının səhifələri bizim qarşımızda açıldı. Bu dərs həyatımız boyu unudulmayacaq”.
Onun sinif yoldaşı Reyhan Paşayeva da eyni həyəcanla danışır. “Səfər zamanı bir çox kəndləri, şəhərləri, dağıdılmış, lakin yenidən dirçələn əraziləri gördük. Hər anımız dəyərlidir, amma ən çox Cıdır düzündəki açıq dərsimiz yaddaqalan oldu. Burada öyrəndiklərimizi praktik şəkildə möhkəmləndirdik. Şuşaya səfər bizim biliklərimizi dərinləşdirdi, Vətən sevgimizi isə daha da böyütdü”, - deyə o əlavə edir.
Səfərdə məktəbin dil-ədəbiyyat müəllimi Əsmər Bayramova da iştirak edib. Onun üçün bu yol həm müəllim, həm də vətəndaş kimi ən dərin duyğuları yaşadan səfər olub: “Özümə söz vermişdim ki, Qarabağa ilk səfərimi ailəmlə yox, məhz şagirdlərimlə edəcəyəm. Bir gün sinifdə söhbət zamanı dedim: “Zəfər Günümüzü niyə məhz Zəfərin yazıldığı torpaqda - Şuşada qeyd etməyək?”. Bu fikir uşaqlarda böyük sevinc yaratdı. Direktorumuz da təşəbbüsü dəstəklədi və səfər reallaşdı. Biz Şuşanı sadəcə gəzintiyə çıxmaq üçün deyil, onun tarixini, ədəbiyyatını, coğrafiyasını və mədəniyyətini canlı öyrənmək üçün ziyarət etdik. Məqsəd uşaqlarda milli kimliyi, qəhrəmanlıq və Vətənə məhəbbət hissini daha da gücləndirmək idi. Düşünürəm ki, bu məqsədə çatdıq”.
Əsmər müəllim əlavə edir ki, səfərdən sonra şagirdlərin baxışları dəyişib: “Bu səfər sadəcə bir dərs deyildi, o, şagirdlərə Vətən sevgisi də aşıladı. Bu duyğu torpaq sevgisindən, Qələbənin yaratdığı fəxarət hissindən, azadlıq sevinci ilə yoğrulmuş ruhdan doğmuşdu. İndi onlar Qarabağ haqqında danışanda sanki doğma kəndlərindən söz açırlar. Şeirləri daha duyğulu, çıxışları daha təsirli olur. Çünki Qarabağın tarixini artıq xəritədə, kitablarda deyil, elə o torpaqlarda öyrənə bilirlər”.
Məktəbin direktoru Rüfət Məmmədov isə vurğulayır ki, təhsilin əsas məqsədi yalnız bilik vermək deyil, eyni zamanda, Vətəninə, dövlətinə, xalqına bağlı, məsuliyyətli gənclər yetişdirməkdir: “Biz elə bir mühit formalaşdırmalıyıq ki, şagird həm biliyə yiyələnsin, həm də milli kimliyini dərindən dərk etsin. Bu istiqamətdə apardığımız sistemli işin nəticəsidir ki, məktəbimizdə vətənpərvər, öz xalqına və dövlətinə bağlı gənclik formalaşır”.
Öyrənirik ki, bu cür təşəbbüslər gələcəkdə də davam etdiriləcək. Rüfət müəllim bildirir ki, məktəbin planına əsasən, növbəti illərdə digər siniflər üçün də azad edilmiş torpaqlara maarifləndirici səfərlər təşkil olunacaq. Məqsəd gəncləri tariximiz, mədəni irsimiz və azad yurdlarımızla daha yaxından tanış etmək, onlarda Vətən sevgisini daha da dərinləşdirməkdir. Şuşada keçirilən bu açıq dərs şagirdlərin yaddaşında həm də Zəfərin nəfəsini hiss etdikləri unudulmaz bir təcrübə kimi yadda qalıb.
Bölmənin digər xəbərləri
