Bakı, 10 yanvar, AZƏRTAC

“Dörd ildən artıq müddətdir ki, Azərbaycan xalqının həyatı, dünyanın ölkəmizə münasibəti tamamilə dəyişib. 44 günlük Vətən müharibəsi zamanı həm gücümüzü, həm birliyimizi, həm də haqlı olduğumuzu hər kəsə sərgilədik. Heç bir təzyiq, heç bir qeyri-qanuni əməl, heç bir vandallıq bizi dayandırmadı. Üç il sonra yenidən sentyabrda biz missiyamızı tamamladıq. Bütöv, konstitusiya quruluşu tam bərpa edilmiş Azərbaycanın uzaqgörən Prezidenti, rəşadətli Ordusu və məğrur xalqı hər şeyə rəğmən öz istəyinə nail oldu. Hazırda hər birimiz o torpaqlara atdığımız hər addımda şəhidlərimizi dərin ehtiramla yad edir, döyüşçülərimizə minnətdarlığımızı ifadə edirik. Ölkə başçısının da dediyi kimi, azad edilmiş ərazilərə neçə dəfə getdiyimizdən asılı olmayaraq hər dəfə oralara qədəm qoyduqca ilk dəfəki sevinci, qüruru duyuruq”.

Bunu AZƏRTAC-a müsahibəsində “Böyük Qayıdış” Gənclər Təşkilatı İctimai Birliyinin sədr müavini, Xüsusi Təyinatlı Qüvvələrin ehtiyatda olan zabiti, Aprel döyüşlərinin qazisi Əhliyyət Mehdiyev deyib.

O, fikirlərinə belə davam edib: “Təəssüflər olsun ki, Ermənistan hələ də reallığı qəbul edə bilmir. Ölkəmizi gizlin və aşkar qəbul edə bilməyən ölkələr və şəxslər Ermənistanın sözün əsl mənasında ağılsız xülyalarla yaşayan bir qrup rəhbər şəxsinə səhv istiqamət verir, onları silahlandırır, yeni müharibəyə, münaqişəyə cəlb edir. Elə Vətən müharibəsindən sonra da bir neçə dəfə biz buna şahid olduq. Təxribatlar dayanmadı, amma hər dəfə suyu süzülə-süzülə geri dönən onlar oldular. Son dövrlərdə də elə Laçın istiqamətində mövqelərimizin atəşə tutulması təxribatları onu göstərir ki, onlar həqiqəti qəbul etməkdə, məğlubiyyətə boyun əyməkdə, şərtlərə əməl etməkdə çətinlik çəkirlər. Onlar silahlanırsa, əvəzində biz də hərbi və təhlükəsizlik məsələlərinə daha çox vəsait sərf edirik. Nə qədər şərtlərlə razılaşmasalar da biz öz istəklərimizə çatırıq. Ötən il Qazaxın dörd kəndinin qaytarılması hadisəsini buna misal göstərmək olar. Növbəti hədəf Zəngəzur dəhlizinin açılması, Qərbi Azərbaycandan olan vətəndaşların öz dədə-baba yurdlarına dönməsidir. 44 günə 30 illik işğala son qoyan bir ölkə buna da nail olacaq.

Onu da qeyd etmək istəyirəm ki, Azərbaycan bölgədə söz sahibi olsa da, təhlükə mənbəyi deyil. Sülh, əmin-amanlıq və humanizm dəyərlərinə kifayət qədər üstünlük verən və bunları öz yanaşmamızda tətbiq edən ölkəyik. Ümid edirik ki, qarşı tərəfin müttəfiqlərinin, onları münaqişəyə çəkən tərəflərin bir-bir sıradan çıxması onları daha dərindən düşünməyə və daha ağıllı qərarlar verməyə sövq edəcək. Əks halda silahlanma və revanş niyyəti onlar üçün yaxşı sonluqla nəticələnməyəcək. Azərbaycanın igid oğulları Vətən keşiyində ayıq-sayıq dayanmağa və ölkəmizi istənilən təhdidlərdən qorumağa hazırdırlar. İnanırıq ki, çox keçmədən Qarabağa qayıdışın sevincini yaşadığımız kimi Qərbi Azərbaycana da geri dönüşün xoşbəxtliyini dadacağıq”.