Azərbaycan musiqisi Pekini fəth etmişdir VİDEO
Pekin, 25 yanvar (AZƏRTAC). Yanvarın 24-də Çin Xalq Respublikasının paytaxtı Pekində Azərbaycan klassik musiqisindən ibarət “Çin-Azərbaycan dostluq konserti” adlı proqram təqdim edilmişdir.
Ölkəmizin Çindəki səfirliyinin Azərbaycan mədəniyyətinin, incəsənətinin bu ölkədə tanıdılması istiqamətində işinin davamı olaraq səfir Lətif Qəndilovun ötən ilin noyabrında Çinin mədəniyyət nazirinin müavini ilə görüşündə əldə olunmuş razılığa əsasən təşkil olunan bu konsertdə Çin Milli Opera və Rəqs Dram Teatrının simfonik orkestrinə Azərbaycanın Xalq Artisti, professor Yalçın Adıgözəlov dirijorluq etmişdir.
Bundan əvvəl ABŞ, İngiltərə, İtaliya, Avstriya, Belçika, Braziliya və digər ölkələrdə uğurlu konsert proqramı ilə çıxış etmiş maestro Yalçın Adıgözəlov bu dəfə fərqli sivilizasiya mərkəzi olan Çin tamaşaçısının qarşısına çıxırdı. Bu konsertin digər vacib məqamlarından biri də o idi ki, çinli musiqisevərlər üçün klassik Azərbaycan musiqisi ilə yaxından tanış olmaq baxımından ilk dəfə belə böyük fürsət yaranırdı. Konsertin proqramına Azərbaycanın dünya şöhrətli bəstəkarları Üzeyir Hacıbəylinin, Fikrət Əmirovun, Qara Qarayevin, Niyazinin, Soltan Hacıbəyovun əsərləri daxil idi. Konsertə hazırlıq məqsədi ilə bir neçə gün gərgin məşqlər keçirilmişdi.
Çin paytaxtının ən möhtəşəm salonlarından olan Pekin Konsert Salonunda təşkil edilən konsertdən əvvəl Azərbaycanın Çindəki səfiri Lətif Qəndilov və Çin Mədəniyyət Nazirliyinin beynəlxalq əməkdaşlıq departamentinin direktoru Sie Cinyinq çıxış edərək iki ölkə arasında mədəni əlaqələrin tarixi, hazırkı vəziyyəti barədə danışmışlar. Qeyd olunmuşdur ki, bu cür layihələr xalqlarımızın bir-birinin mədəniyyəti ilə tanış olmaları baxımından çox vacibdir. Bu həm də azərbaycanlı və çinli musiqiçilərin əməkdaşlığı nəticəsində ərsəyə gələn ilk konsert proqramıdır. Bu cur layihələrin hər iki tərəfin mədəniyyətinə töhfə verdiyi qeyd olunmuşdur.
Sonra Şərqdə klassik musiqinin banisi, dahi Üzeyir Hacıbəylinin “Koroğlu” operasından üvertura ilə konsertin açılışı olmuşdur. Çin milli musiqi alətləri olan arhu və pipadan istifadə olunması ölməz əsərə fərqli bir ruh vermişdir. Konsertdə, həmçinin Fikrət Əmirovun “Azərbaycan” kapriçiosu və “Nəsimi” baletindən süita, Qara Qarayevin “Yeddi gözəl” baletindən süita, Soltan Hacıbəyovun “Karvan” simfonik lövhəsi, Azərbaycan Dövlət Musiqili Teatrının solisti, Əməkdar Artist Nərgiz Kərimovanın ifasında Üzeyir Hacıbəylinin, Fikrət Əmirovun və Niyazinin dünya şöhrətli əsərləri səslənmişdir.
Konsert salonunu dolduran min nəfərdən çox çinli musiqisevərin, Türkiyənin, Xorvatiyanın, Albaniyanın, İsrailin, Özbəkistanın, Türkmənistanın, Filippinin, Əlcəzairin Pekindəki səfirlərinin, diplomatların, Çin Xarici İşlər Nazirliyinin məsul əməkdaşlarının sürəkli alqışları ilə müşayiət olunan proqramın sonunda Çin folklor motivləri əsasında hazırlanmış musiqi nömrəsi, Çinli vokalçı U Pan və Nərgiz Kərimovanın dueti ilə başa çatmışdır.
Konsert barədə təəssüratlarını AZƏRTAC-ın xüsusi müxbiri ilə bölüşən professor Yalçın Adıgözəlov demişdir: “Bu axşam böyük məsuliyyət və həyəcan hissi yaşadıq. Məsuliyyət bizim üzərimizə düşdü. Çin torpağında - qədim tarixi və zəngin mədəniyyəti, gözəl ənənələri olan bir ölkədə Azərbaycan musiqisini ilk dəfə təbliğ etmək həqiqətən böyük bir məsuliyyətdir. Konserti izlədiniz, tamaşaçıların alqışlarını duydunuz, məncə, biz bu gün böyük uğur qazandıq. Nərgiz Kərimovanın maraqlı ifası, Çinli solistlərin konsertə qoşulması, habelə orkestrdəki Çin milli musiqi alətləri - bütün bunlar şübhəsiz, konsertə yeni ab-hava gətirdi. Çox mürəkkəb bir proqram idi. Biz proqramı tərtib edərkən üstünlüyü Azərbaycan musiqisinin incilərinə verdik. Ümidvaram ki, bu konsert son olmayacaq, gələcəkdə bu cür layihələr davam edəcək, bundan da gözəl konsertlər təşkil olunacaqdır”.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
