Vaşinqton, 26 iyun (AZƏRTAC). İyunun 25-də Vaşinqtonda yerləşən tarixi “Army-Navy” klubunda Azərbaycan Respublikası Silahlı Qüvvələrinin yaranmasının 96-cı ildönümünə həsr olunmuş rəsmi ziyafət keçirilmişdir.

Ziyafətə ABŞ Müdafiə Departamentinin rəsmiləri, Birləşmiş Ştatlar ordusunun, hərbi hava, hərbi dəniz, dəniz piyadası, milli qvardiya və sahil mühafizəsi qüvvələrinin nümayəndələri, xarici ölkələrin Vaşinqtonda akkreditə olunmuş hərbi attaşeləri, ABŞ-ın Müdafiə Kəşfiyyatı Agentliyinin əməkdaşları iştirak etmişlər.

Tədbirin rəsmi açılış hissəsində hər iki ölkənin dövlət himni səsləndirildikdən sonra Azərbaycanın ABŞ-dakı səfiri Elin Süleymanov və hərbi attaşe, polkovnik Ağaverdi Quliyev qonaqları salamlayaraq, Silahlı Qüvvələrin yaranması tarixi, inkişaf yolu, beynəlxalq hərbi əməliyyatlarda iştirakı və ordunun cəmiyyətdə rolu barədə məlumat vermişlər.

Səfir Elin Süleymanov regionun üzləşdiyi təhlükəsizlik təhdidlərini qonaqlara xatırladaraq, sülhə və əmin-amanlığa dayaq olan Azərbaycan Silahlı Qüvvələrinin rolunu vurğulamışdır. O, xüsusilə qeyd etmişdir ki, Azərbaycan təhlükəsizliklə bağlı üzləşdiyi problemlərə baxmayaraq, müxtəlif dövlətlərlə birlikdə Əfqanıstan, İraq kimi ölkələrdə sabitliyə öz töhfəsini vermiş və gələcəkdə də həm regionda, həm də dünyanın digər yerlərində bu töhfənin davam etdirilməsi məqsədilə müdafiə və təhlükəsizlik sahəsində əməkdaşlığa önəm verəcəkdir. Eyni zamanda, səfir beynəlxalq ictimaiyyət və xüsusilə ABŞ-ın dünyada baş verən proseslərə, o cümlədən münaqişələrə münasibətdə prinsipial və davamlı mövqeyinin vacibliyini vurğulamışdır.

Səfir E.Süleymanov son hadisələrin Azərbaycan tərəfinin təhlükəsizlik, ərazi bütövlüyü və radikallığa qarşı olan qəti mövqeyinin düzgün və əsaslı olduğunu göstərdiyini demişdir.

Ziyafətdə ölkəmiz və onun Silahlı Qüvvələri barədə videomateriallar nümayiş etdirilmiş və Azərbaycan bəstəkarlarının əsərləri təqdim olunmuşdur.

Yusif Babanlı

AZƏRTAC-ın xüsusi müxbiri

Vaşinqton