Görmə qabiliyyəti məhdud və valideynlərini itirmiş uşaqlar üçün İnformasiya Mərkəzi yaradılıb
Bakı, 6 dekabr, AZƏRTAC
Firudin bəy Köçərli adına Respublika Uşaq Kitabxanasında görmə qabiliyyəti məhdud və valideynlərini itirmiş uşaqlar üçün dil kursları və İnformasiya Mərkəzi yaradılıb.
AZƏRTAC xəbər verir ki, təqdimat mərasimində kitabxananın direktoru Şəhla Qəmbərova layihənin əhəmiyyətindən danışıb. Bildirilib ki, məqsəd bu kateqoriyadan olan uşaqların cəmiyyətə tam, səmərəli inteqrasiyasına dəstək verməkdir. Onların öz həmyaşıdları ilə davamlı ünsiyyətini təşkil etmək üçün belə bir mərkəzin yaradılmasına ehtiyac var idi.
“Gənc Ana və Uşaqların Maarifləndirmə” İctimai Birliyinin sədri, layihənin rəhbəri Nigar Aslanova mərkəzin yaradılmasında əməyi olan hər kəsə təşəkkürünü bildirib.
Tədbirdə çıxış edən Milli Məclisin deputatları Məlahət İbrahimqızı, İlham Məmmədov və başqaları həyata keçirilən layihəni yüksək qiymətləndirərək mərkəzin fəaliyyətinə uğurlar arzulayıblar.
Qeyd edək ki, görmə qabiliyyəti məhdud və valideynlərini itirmiş uşaqlar üçün dil kursları və İnformasiya Mərkəzi Əmək və Əhalinin Sosial Müdafiəsi, Mədəniyyət və Turizm nazirlikləri, Türkiyə Əməkdaşlıq və İnkişaf Agentliyinin Bakı ofisi ilə əməkdaşlıq çərçivəsində yaradılıb.
Bölmənin digər xəbərləri
