8 Noyabr tarixi Prezident İlham Əliyevin gərgin fəaliyyətinin Zəfər zirvəsidir
Bakı, 8 noyabr, AZƏRTAC
Dörd il əvvəl şanlı Azərbaycan Ordusu Müzəffər Ali Baş Komandan, Prezident İlham Əliyevin rəhbərliyi ilə tarixi torpaqlarımızı işğaldan azad etməklə, ölkəmizin ərazi bütövlüyünü, suverenliyini və tarixi ədaləti bərpa etdi. Çünki torpaqlarımızın düşməndən azad edilməsi və Azərbaycanın bütün sərhədləri boyunca bayrağımızın dalğalanması bütün dövrlərdə dövlət siyasətinin mütləq prioriteti və strateji hədəfi olub.
Bu fikirləri AZƏRTAC-a açıqlamasında Milli Məclisin deputatı Tamam Cəfərova deyib.
O bildirib ki, möhtəşəm Zəfərimizlə Azərbaycanın dövlətçilik, hərbi-siyasi, müstəqillik tarixinə yeni qəhrəmanlıq salnaməsi yazılıb. Bu möhtəşəm Qələbə xalqın öz Lideri ilə həmrəy olduğunu dünyaya nümayiş etdirdi.
Dövlətimizin başçısı müdrik və uzaqgörən siyasəti, qətiyyəti, iradəsi ilə xalqına verdiyi bütün vədləri yerinə yetirmək iqtidarında olduğunu sübut etdi, göstərdi ki, Onun sözü imzası qədər keçərlidir və nəyi, necə, nə vaxt etmək lazımdır yaxşı bilir.
“Bu gün əminliklə deyə bilərik ki, biz çox xoşbəxt xalqıq. Biz Prezident İlham Əliyevin reallığa çevirdiyi bu unudulmaz tarixin şahidləriyik. Bu möhtəşəm qələbədən ötən dörd il ərzində Azərbaycan Prezidenti, Müzəffər Ali Baş Komandan İlham Əliyevin uğurlu diplomatik səyləri nəticəsində dünya yaranmış yeni reallığı və “Qarabağ Azərbaycandır” həqiqətini artıq qəbul edib”, - deyə deputat vurğulayıb.
T.Cəfərova qeyd edib ki, Vətən müharibəsində azərbaycanlı kimliyi, vətən mənsubiyyəti etnik çərçivələri aşaraq bütün Azərbaycan xalqını bir yumruq kimi birləşdirdi. Prezident, Müzəffər Ali Baş Komandan İlham Əliyevin Ermənistan silahlı qüvvələrinin döyüş aktivliyinin qarşısını almaq, mülki əhalinin təhlükəsizliyini təmin etmək məqsədilə Azərbaycan Ordusuna bütün cəbhəboyu əks-hücuma keçmək barədə əmrini xalqımız həsrətlə gözləyirdi. Düşməni torpaqlarımızdan qovub çıxarmaq uğrunda bir yumruq kimi birləşən xalqımız həm öz möhtəşəm birliyi ilə, həm də bu birlikdən qaynaqlanan gücü ilə, Ali Baş Komandanın ifadəsi ilə desək, düşmənin başını əzdi.
“Azərbaycan Ordusunun sentyabrın 27-də Qarabağda başladığı uğurlu əks-hücum əməliyyatı nəticəsində noyabrın 9-dək 5 şəhər, 4 qəsəbə və 286 kənd işğaldan azad edildi. 44 günlük Vətən müharibəsində qazanılmış tarixi Qələbədə dövlət-ordu-xalq həmrəyliyinin əyani təzahürünün şahidi olduq. Xalqın güc və birlik rəmzinə çevrilmiş “dəmir yumruq” öz gücünü və şücaətini bütün dünyaya göstərdi. Ermənistanın işğalçılıq siyasətinə son qoyuldu. Qəhrəman hərbçilərimizin şücaəti, rəşadəti hesabına, şəhidlərimizin qanı-canı bahasına bütün dünya Azərbaycanın şanlı Qələbəsinin şahidi oldu. Müxtəlif dairələrdən olan müntəzəm təzyiq və təhdidlərə rəğmən Azərbaycan öz haqq savaşında Zəfər çaldı. Bu Zəfər sayəsində “Ermənistanın güclü ordusu var” və “erməni xalqı döyüşkən xalqdır” kimi miflərə birdəfəlik son qoyuldu”, - deyə T.Cəfərova bildirib.
Vətən müharibəsi dövründə informasiya cəbhəsində aparılan mübarizəni xüsusi qeyd edən deputat vurğulayıb: “Prezident, Müzəffər Ali Baş Komandan İlham Əliyev xarici mətbuata müsahibələrində xüsusi peşəkar və vətənpərvər ritorikası ilə xalqın xüsusi rəğbətini qazandı. Dövlətimizin başçısının dünyanın məşhur telekanallarına, xəbər agentliklərinə verdiyi müsahibələrində faktlara söykənərək danışması, qələbəmizə, Azərbaycan xalqının xoş gələcəyinə hesablanmış ifadələri bizi itkilər qarşısında sönməməyə, əksinə qürurla durmağa ruhlandırdı. Vətəndaşlar müharibə dövründə Prezidentin simasında artıq ölkəni idarə edən rəsmi şəxslə bərabər, doğma insan, xalqının yenilməz övladını görürdülər”.
T.Cəfərova qeyd edib ki, Azərbaycanın qəti və prinsipial mövqeyi sayəsində tarixi ərazilərimizdə heç bir “boz zona”nın qalmasına imkan verilməyib, Azərbaycan Respublikasının konstitusiya quruluşu və suverenliyi tam bərpa edilib. Bu istiqamətdə həyata keçirilən antiterror əməliyyatları olduqca mühüm əhəmiyyət kəsb edir. Eyni zamanda, onu da qeyd etməliyik ki, Laçın rayonunun Həkəri çayı üzərində “Laçın” sərhəd-buraxılış məntəqəsinin qurulması Şuşa Zəfərindən sonra əldə edilmiş ən böyük və əhəmiyyətli hərbi-siyasi qələbə kimi Azərbaycan tarixinə qızıl hərflərlə yazılıb.
“8 noyabr tarixi Prezident İlham Əliyevin 20 illik gərgin fəaliyyətinin zəfər zirvəsidir. Dövlətimizin başçısının qəti və prinsipial mövqeyi, xalqa inamı Azərbaycanı daha böyük zirvələrə aparır və həm də dünyanın müxtəlif yerlərində yaşayan azərbaycanlılarını bir-birinə qırılmaz tellərlə bağlayır.
Əminik ki, 44 gündə ruhumuza hakim olan bu həmrəylik və möhkəm birlik vətənimizin bundan sonra da etibarlı müdafiəsində və həyata keçirilən genişmiqyaslı quruculuq işlərində də öz bəhrəsini verəcək”, - deyən Tamam Cəfərova fikirlərini yekunlaşdırıb.
Bölmənin digər xəbərləri
