Bakı, 9 noyabr (AZƏRTAC). 9 noyabr - Azərbaycan Dövlət Bayrağı günüdür. Müasir müstəqil Azərbaycan dövlətinin rəmzlərindən biri də üçrəngli bayrağımızdır. Himnimiz, gerbimiz kimi bayrağımız da müstəqillik tariximizin varislik ənənəsinin təsdiqidir. Dövlət bayrağımız 1918-ci il noyabrın 9-da Azərbaycan Xalq Cümhuriyyəti Hökumətinin iclasında qəbul edilmiş və 1920-ci il aprelin 28-də bolşevik Rusiyasının işğalından sonra Azərbaycan Parlamentinin binası üzərindən endirilmişdir. Həmin bayraq bir də 70 ildən sonra 1990-cı il noyabrın 17-də Naxçıvan Muxtar Respublikası Ali Məclisinin sədri, ulu öndər Heydər Əliyevin təşəbbüsü və rəhbərliyi ilə keçirilən sessiyada Muxtar Respublikanın dövlət bayrağı kimi qəbul edilmişdir. Beləliklə də Azərbaycanın üçrəngli bayrağı rəsmi olaraq Naxçıvan Ali Sovetinin binası üzərində dalğalanmağa başlamışdır. Eyni zamanda, Naxçıvan Muxtar Respublikası Ali Məclisi Azərbaycan SSR Ali Soveti qarşısında üçrəngli bayrağımızın Azərbaycanın rəsmi dövlət rəmzi kimi tanınması haqqında vəsatət qaldırmışdır. Azərbaycan Respublikası Ali Soveti həmin vəsatət əsasında 1991-ci il fevralın 5-də “Azərbaycan Respublikasının Dövlət bayrağı haqqında” Qanun qəbul etmiş, bununla da üçrəngli bayrağımız ölkə səviyyəsində xalqımızın istiqlal rəmzi kimi rəsmən təsdiqlənmişdir.

Buna baxmayaraq, ölkədə siyasi proseslərin gedişi Azərbaycanı müstəqilliyini yenidən itirməsi təhlükəsi ilə üz-üzə qoymuşdu. Ulu öndər Heydər Əliyevin 1993-cü ilin iyununda xalqın təkidli tələbi ilə hakimiyyətə qayıdışı və həyata keçirdiyi daxili və xarici siyasət nəticəsində respublikamızda anarxiyanın, özbaşınalığın qarşısı alınmış, ictimai-siyasi sabitlik təmin edilmiş, ölkənin parçalanmasına yönəlmiş separatçı cəhdlər uğursuzluğa düçar olmuşdur. Üçrəngli bayrağımızın ikinci dəfə dövlət rəmzi kimi təsbit edilməsi də ulu öndərin rəhbərliyi ilə hazırlanan, 1995-ci ildə ümumxalq referendumu ilə qəbul edilmiş Azərbaycan Konstitusiyasında da öz əksini tapmışdır.

Ümummilli liderin bizə ərməğan qoyduğu müasir müstəqil Azərbaycanda onun siyasi xəttini uğurla davam etdirən Prezident İlham Əliyev də ölkəmizin milli dövlət rəmzlərini uca tutur və bu ruhu cəmiyyətə aşılayır. Dövlətimizin başçısının milli ideallara bağlılığı həm də üçrəngli bayrağımıza münasibətdə də açıq-aydın görünür. “Azərbaycan Respublikasının Dövlət bayrağı haqqında Əsasnamə”yə edilmiş əlavə və dəyişikliklərin təsdiqlənməsi, “Azərbaycan Respublikası Dövlət bayrağının istifadəsi qaydaları haqqında” Qanunun imzalanması da bu yüksək ehtiramın ifadəsidir.

Prezident İlham Əliyevin 2009-cu il noyabrın 17-də imzaladığı digər bir Sərəncamla Azərbaycanın üçrəngli bayrağının ilk dəfə rəsmi ucaldığı 9 noyabr (1918-ci il) tarixi Azərbaycan Respublikasının Dövlət Bayrağı Günü kimi təsis edilmişdir. Hələ ötən əsrin əvvəllərində ucaldılmış üçrəngli bayrağımıza və ümumən dövlət rəmzlərimizə göstərilən bu münasibət ölkəmizdə milli həmrəyliyi, azərbaycançılıq məfkurəsi ətrafında sıx birləşməyi, gənc nəslin vətənpərvərlik ruhunda tərbiyə edilməsini, dövlət rəmzlərinə hörmət və ehtiramı təmin etmək məramından irəli gəlir. Artıq bu ildən etibarən noyabrın 9-u hər il respublikamızda Dövlət Bayrağı Günü kimi qeyd olunacaqdır.

2010-cu il sentyabrın 1-də Bakının Bayıl qəsəbəsində - Hərbi Dəniz Qüvvələrinin bazası yaxınlığında Dövlət Bayrağı Meydanının təntənəli açılışı Prezident İlham Əliyevin bir daha dövlət rəmzlərimizə verdiyi dəyərin bariz nümunəsidir. Üçrəngli bayrağımıza xüsusi ehtiram göstərən dövlətimizin başçısı Azərbaycan tarixində ilk dəfə ölçülərinə və görülən işin həcminə görə seçilən Dövlət Bayrağı Meydanının tikintisini daim nəzarətdə saxlamış, inşaat işlərinin yüksək keyfiyyətlə aparılmasına dair tapşırıq və tövsiyələrini vermişdir. Məhz bu meydanda ən uca zirvədə dalğalanan üçrəngli bayrağımız Azərbaycanın gələcəyə doğru inamla addımlamasının bir təcəssümüdür.

“Türkləşmək, müasirləşmək, islamlaşmaq” şüarına əsaslanan üçrəngli bayrağımızdakı amallara sadiqliyini nümayiş etdirən dövlətimizin başçısı daxili və xarici siyasətində də hər zaman Azərbaycanın milli maraqlarına önəm vermişdir. Respublikamızın iqtisadi inkişafının təmin edilməsi ilə yanaşı, Prezident İlham Əliyevin həyata keçirdiyi siyasətin əsas qayəsini milli kimliyin qorunması ilə müasir ənənələrin ölkəmizdə tətbiqinin vəhdəti təşkil edir. Bu istiqamətdə Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri Mehriban xanım Əliyevanın da gördüyü işlər danılmazdır. “İlahi səs” kimi qəbul edilən muğamımızın YUNESKO tərəfindən Bəşəriyyətin Şifahi və Qeyri-maddi Mədəni İrsinin şah əsəri kimi tanınması, respublikamızda muğam müsabiqələrinin, həmçinin beynəlxalq muğam festivallarının keçirilməsi, Beynəlxalq Muğam Mərkəzinin yaradılması, hazırda Xalça muzeyinin tikintisi, dini ocaqların bərpası, Azərbaycanın gələcəyi olan uşaqlara diqqət və qayğı məhz Mehriban xanım Əliyevanın milli dəyərlərimizə verdiyi qiymətin təzahürüdür.

Prezident İlham Əliyevin yeritdiyi qətiyyətli və ardıcıl siyasət nəticəsində daim inkişafda olan respublikamız dünya dövlətləri arasında da sayılıb-seçilən yerini tutmuşdur. Ölkəmizdə gedən geniş abadlıq-quruculuq işləri, iqtisadi inkişaf, sosial rifahın təmin edilməsi, məktəblərin, xəstəxanaların, ictimai obyektlərin, idman mərkəzlərinin tikilməsi, yeni yolların salınması və s. bu istiqamətdə atılmış addımların görünən bir hissəsidir. Bu gün hər bir azərbaycanlı ölkəmizin iqtisadi inkişafının rəmzinə çevrilən üçrəngli bayrağımızın dünya dövlətlərinin bayraqları arasında ən uca zirvədə dalğalanması ilə qürur duyur. BMT, ATƏT, AŞ, İKT, YUNESKO kimi nüfuzlu beynəlxalq təşkilatların üzvü olan Azərbaycan iqtisadi inkişafa nail olmaqla yanaşı, dövlət rəmzlərini də uca tutur. Dövlət Bayrağı Meydanında Prezident İlham Əliyevin nitqində dediyi sözlər bunun əyani təsdiqidir: “Bakı şəhərində belə möhtəşəm meydanın yaradılması doğrudan da böyük hadisədir. Bizim bayrağımız qürur mənbəyimizdir! Bizim bayrağımız canımızdır, ürəyimizdir! Bu gün Azərbaycanın hər bir yerində dövlət bayrağı dalğalanır. Azərbaycan ərazi bütövlüyünü bərpa edəndən sonra milli dövlət bayrağımız bu gün hələ də işğal altında olan torpaqlarda qaldırılacaqdır. Bizim bayrağımız Dağlıq Qarabağda, Xankəndidə, Şuşada dalğalanacaqdır! O günü biz hər an öz işimizlə yaxınlaşdırmalıyıq və yaxınlaşdırırıq”.

Prezident İlham Əliyevin Azərbaycanın milli maraqlarını əsas tutaraq həyata keçirdiyi uğurlu daxili və xarici siyasət, həmçinin ordu quruculuğu sahəsində görülən işlər bu ülvi arzunun tezliklə gerçəkləşəcəyinə birmənalı əminlik yaradır. Bu arzu ətrafında yumruq tək birləşən Azərbaycan xalqı, bayramın mübarək!

C.Rüstəmov,

G.Əmirova

AZƏRTAC-ın müxbirləri