BAKIDA SƏRBƏST GÜLƏŞ ÜZRƏ 45-Cİ AVROPA ÇEMPİONATI BAŞA ÇATMIŞDIR
Mayın 4-də Bakı İdman-Konsert Kompleksində sərbəst güləş üzrə 45-ci Avropa çempionatının son görüşləri keçirilmişdir. İdmançılar dörd çəki dərəcəsində medallar uğrunda mübarizə aparmışlar.
Ölkəmizin paytaxtında ilk dəfə keçirilən, Avropanın 25 ölkəsindən 150-dən çox idmançının iştirak etdiyi bu mötəbər yarışda Azərbaycan idmançıları bütün çəki dərəcələrində təmsil olunmuşdular. Mayın 3-də Nazim Əlicanov (55 kiloqram) qızıl, Elman Əsgərov (66 kiloqram) gümüş medallar qazanmışdılar.
Mayın 4-də isə 60 kiloqram çəki dərəcəsində üçüncü yer uğrunda mübarizə aparan Arif Abdullayev Belarus idmançısı ilə çətin görüşün son saniyələrində rəqibinə qalib gəldi. Qızıl medala isə Ukrayna idmançısını məğlubiyyətə uğradan Türkiyə güləşçisi Arif Kama sahib oldu. Türkiyənin digər iki idmançısı - Fatih Çakıroğlu (96 kiloqram) və Zəkəriyyə Güclü (120 kiloqram) bürünc medallara layiq görüldülər.
Macarıstan idmançısı Arpad Ritter (74 kiloqram), Rusiya güləşçiləri Kuramaqamed Kuramaqamedov (96 kiloqram) və David Musulbes (120 kiloqram) öz çəki dərəcələrində fəxri kürsünün ən yüksək pilləsinə qalxdılar.
Komanda hesabında birinci yerə Rusiya, ikinci yerə Gürcüstan, üçüncü yerə isə Türkiyə idmançıları çıxdılar.
Avropa Güləş Federasiyasının prezidenti Tsen Tsenov Azərbaycan Milli Olimpiya Komitəsinin Prezidenti, Milli Məclisin deputatı İlham Əliyevə Beynəlxalq Güləş Federasiyasının fəxri medalını və 45-ci çempionatın xatirə medalını, gənclər, idman və turizm naziri Əbülfəz Qarayevə və Azərbaycan Güləş Federasiyasının prezidenti Abbas Abbasova 45-ci çempionatın xatirə medallarını təqdim etdi.
Dağıstan hökuməti sədrinin birinci müavini Gitinməhəmməd Hacıməhəmmədov MOK-un prezidenti İlham Əliyevə dostluq rəmzi olan xatirə kuboku hədiyyə etdi.
Azərbaycan Güləş Federasiyasının prezidenti Abbas Abbasov Beynəlxalq və Avropa güləş federasiyalarının üzvlərinə, hakimlərə və məşqçilərə bu mötəbər yarışın fəxri medallarını təqdim etdi.
Bununla da sərbəst güləş üzrə 45-ci Avropa çempionatı bağlı elan olundu.
X X X
Azərbaycan Milli Olimpiya Komitəsinin Prezidenti, Milli Məclisin deputatı İLHAM ƏLİYEV jurnalistlərə müsahibə verdi.
SUAL: İlham müəllim, üç gündür paytaxtımızın İdman Konsert-Kompleksində böyük bayram əhval-ruhiyyəsi hökm sürür. Güləşçilərimiz Avropa çempionatında 1 qızıl, 1 gümüş və 1 bürünc medala sahib oldular. Sizcə, bunu, böyük qələbə kimi qiymətləndirə bilərikmi?
CAVAB: Mən sizinlə razıyam. Hesab edirəm ki, bu çox böyük qələbədir. Bizim idmançılarımız çox yüksək səviyyəli görüşlər keçirdilər. Tamaşaçılar da bundan çox razıdırlar. Gördüyünüz kimi, üç gün ərzində bu idman sarayı dolu idi, çox böyük maraq var idi. Baxmayaraq ki, çempionatın gedişi televiziya kanalları ilə yayımlanırdı, lakin idman həvəskarları burada görüşləri canlı şəkildə izləyirdilər.
Əlbəttə, Azərbaycanda çox böyük idman bayramı idi. Biz istəyirdik ki, idmançılarımız daha çox qələbə qazansınlar. Belə də oldu - 1 qızıl, 1 gümüş, 1 bürünc medal çox böyük nəticədir. Avropa çempionatı kimi mötəbər yarışda belə uğurlar əldə etmək, əlbəttə, ölkənin idman potensialını göstərir. Ona görə mən bu nəticələrdən çox razıyam.
SUAL: 2003-cü ildən başlayaraq, belə yarışlar Afina yay olimpiya oyunlarına vəsiqə qazanmaq xarakteri daşıyacaqdır. Beynəlxalq Güləş Federasiyasının, Avropa Güləş Federasiyasının rəhbərliyi Bakıda keçirilən 45-ci çempionatın yüksək səviyyədə təşkil olunduğunu bildiriblər. Bu fakt gələcəkdə də Bakıda belə mötəbər yarışların keçirilməsinə əsas verə bilərmi?
CAVAB: Mən buna inanıram. Biz çox istəyirdik ki, bu Avropa çempionatı Azərbaycanda keçirilsin. 2000-ci ildə Sidney olimpiadası zamanı biz Beynəlxalq Güləş Federasiyasının prezidenti ilə bu barədə danışıqlar aparmışdıq. Sidneydə qərar qəbul olunmuşdu ki, 45-ci çempionat Azərbaycanda keçirilsin.
Əlbəttə, biz istəyirdik ki, tamaşaçılarımız belə gözəl, mötəbər idman yarışını canlı şəkildə izləyə bilsinlər. Amma eyni zamanda, biz hələ o vaxt düşünürdük ki, bu, Azərbaycanda böyük beynəlxalq yarışların keçirilməsi üçün əsas yarada bilər. Yəni yarışda iştirak edən idmançılar, qonaq kimi gələn insanlar, Beynəlxalq Güləş Federasiyasının məsul şəxsləri gözləri ilə görsünlər ki, Azərbaycanda idmanda böyük inkişaf var, ölkəmizdə böyük beynəlxalq yarışların keçirilməsi üçün hür cür şərait vardır. Ona görə mən ümidvaram ki, gələcəkdə Azərbaycanda dünya çempionatı da, lisenziya turnirləri də keçirilə bilər. Biz artıq bu istiqamətdə müxtəlif beynəlxalq federasiyalarla iş aparırıq, bir neçə federasiyaya belə sifarişlər göndərmişik ki, lisenziya turnirləri Azərbaycanda keçirilsin. Baxarıq, hansı mümkün olacaqsa, onu da edəcəyik.
Mən bu çempionatın keçirilməsindən çox razıyam. Burada təşkilat işləri çox yaxşı qurulmuşdur. Avropa Güləş Federasiyasının prezidenti cənab Tsen Tsenov, Beynəlxalq Güləş Federasiyasının birinci vitse-prezidenti cənab Martinetti bu gün də, dünən də mənə dəfələrlə deyirdilər ki, Azərbaycanda dünya çempionatını keçirmək olar. Hətta bəziləri də deyirdilər ki, bu baxımdan son beş il ərzində keçirilmiş Avropa və dünya çempionatları ilə müqayisə edəndə, əlbəttə, üstünlük Azərbaycanın tərəfindədir.
Mən fürsətdən istifadə edərək, çempionata hazırlıq işlərində iştirak edən bütün şəxslərə təşəkkürümü bildirirəm. Bilirsiniz, biz çox həyəcanlı idik, istəyirdik ki, çempionat yüksək səviyyədə keçsin. Eyni zamanda, çox istəyirdik ki, idmançılarımız yüksək nəticələr qazansınlar. Belə də oldu.
SUAL: Ötən il Azərbaycan Milli Olimpiya Komitəsinin prezidenti, Milli Məclisin deputatı İlham Əliyevin dediyi bir söz idman ictimaiyyətinin yaddaşına həkk olunubdur: “Afina Yay Olimpiya oyunlarına üç il yox, iki il qalıbdır”. Milli Olimpiya Komitəsinin qarşıdakı olimpiadaya hazırlıq sahəsində gördüyü işlər, gələcək planları barəsində nə deyərdiniz?
CAVAB: Hazırlıq işləri gedir. Mən böyük ümidlərlə yaşayıram. Bir neçə idman növündə çox yüksək nəticələr əldə etmək üçün gözəl imkanlarımız var. Mən əvvəlcədən hansısa vəd, proqnoz vermək istəmirəm. Amma hazırkı vəziyyət məni qane edir. İnanıram ki, növbəti iki il ərzində idmançılarımız öz səviyyələrini daha da artıracaq və biz Afinaya tam hazır vəziyyətdə gedəcəyik.
Foto Yaşar Xəlilovun və
İlqar Cəfərovundur
Bölmənin digər xəbərləri
