Belqrad, 13 iyun, AZƏRTAC

Belqrad Universitetinin filologiya fakültəsində fəaliyyət göstərən Azərbaycan Dili və Mədəniyyəti Mərkəzində Ulu Öndər Heydər Əliyevin anadan olmasının 100 illik yubileyinə həsr olunan “Heydər Əliyev və dil siyasəti” mövzusunda konfrans keçirilib.

AZƏRTAC xəbər verir ki, əvvəlcə konfrans iştirakçılarının bir qrupu Belqraddakı Taşmaydan parkında Ümummilli Lider Heydər Əliyevin və görkəmli serb yazıçısı Milorad Paviçin abidələrini ziyarət ediblər.

Azərbaycan Dillər Universitetinin nümayəndə heyətinin, Belqrad Universitetində təhsil alan azərbaycanlı tələbələrin iştirak etdiyi konfransda Azərbaycan Dili və Mədəniyyəti Mərkəzinin rəhbəri Günel Babanlı Azərbaycan və Serbiya arasında ədəbi-mədəni əlaqələrdən bəhs edib.

Sonra ADU-nun rektoru, akademik Kamal Abdullayevin konfrans iştirakçılarına ünvanladığı təbrik məktubu oxunub.

Azərbaycanın Serbiyadakı səfirliyinin ikinci katibi Elvin Əlizadə iki dost ölkə arasındakı mədəni əlaqələrin qurulmasının tarixi, inkişaf mərhələləri və bugünkü vəziyyəti barədə danışıb.

Belqradda fəaliyyət göstərən Yunus Əmrə İnstitutunun direktoru Dinser Şahin oğuz dilləri qrupuna daxil olan Azərbaycan və türk dillərinin ortaq elementləri və mədəniyyətlərinin oxşar cəhətləri barədə məlumat verib.

Belqrad Universitetinin Şərqşünaslıq kafedrasının müdiri, professor Ema Milykoviç isə universitetlərarası əlaqələrdən bəhs edib. Universitetin professoru, türkoloq Kseniya Aykut Azərbaycan Dili və Mədəniyyəti Mərkəzinin 5 il ərzində gördüyü işlərdən ətraflı danışıb.

ADU-da fəaliyyət göstərən Serb Dili və Mədəniyyəti Mərkəzinin rəhbəri, dosent Lalə Məcidova videomüraciətində bu illər ərzində serb və Azərbaycan dillərinə tərcümə olunan kitablardan, mərkəzlərin qarşılıqlı əməkdaşlığından bəhs edib.

Belqradda fəaliyyət göstərən Serbiya-Azərbaycan Ticarət Palatasının direktor müavini Biserka Yevtimiyeviç Azərbaycan Dili və Mədəniyyəti Mərkəzinin tələbələrinə, Serbiyada təhsil alan azərbaycanlı tələbələrə yaradılan təqaüd proqramı haqqında məlumat verib.

Azərbaycan Dillər Universitetinin Regionşünaslıq kafedrasının müdiri, professor Sevdagül Əliyeva “Heydər Əliyevin dil siyasəti” mövzusunda təqdimatında Azərbaycan dilinin inkişaf mərhələləri, məhz Ulu Öndər Heydər Əliyevin sayəsində sovet dövründə belə, dövlət dilimizin inkişaf etdirilməsindən bəhs edib.

ADU-nun Fəlsəfə və İctimai elmlər kafedrasının dosenti Şükufə Cabbarova “Azərbaycan dili və mədəniyyəti” adlı məruzəsində Ümummilli Lider Heydər Əliyevin milli dilin inkişafı və mədəniyyətimizin tərənnümündə dilin əsas vasitə olmasından danışıb.

BDU-nun Hüquq fakültəsinin, Cinayət hüququ kafedrasının dosenti Səkinəxanım Rzayeva isə "Rəsmi dilin qanuni əsasları” adlı məruzəsində Ulu Öndər Heydər Əliyevin Azərbaycan dilinin rəsmiləşdirilməsi barədə gördüyü tədbirlər haqqında məlumat verib.

Konfransda Azərbaycan haqqında, hər iki ölkə arasında münasibətlərə həsr olunan videoçarxlar nümayiş olunub. Eləcə də Günel Babanlının serb dilinə tərcümə olunmuş subtitrlərlə hazırladığı Ulu Öndər Heydər Əliyevin Azərbaycan dili haqqında söylədiyi unudulmaz çıxışlarından, onun yaratdığı siyasətin layiqli davamçısı Prezident İlham Əliyevin Azərbaycan dilinin saflığı və qorunması ilə əlaqədar qəbul etdiyi qərar və qanunların əks olunduğu videoçarx nümayiş edilib.

Konfransın bədii hissəsində Belqrad Milli Opera teatrının ilk xanım sofranosu, Belqraddakı Azərbaycan Mədəniyyət Mərkəzinin rəhbəri Jasmina Trumbetaş Azərbaycan musiqisi və mədəniyyətini təbliğ edən ilk azərbaycanlı xanım, mərhum Zərifə Əlizadənin gördüyü işlər haqqında danışıb. Sonra musiqisi Müslim Maqomayev, sözləri Nəbi Xəzriyə aid olan “Azərbaycan” və musiqisi Niyazi, sözləri isə İslam Səfərliyə aid olan “Arzu” mahnıları ifa edilib.

Belqrad Universitetində təhsil alan tələbələr Taleh Ələkbərli (serb dilində), Katarina Miletiç (Azərbaycan dilində) dahi siyasətçi Heydər Əliyevin ən çox sevdiyi Səməd Vurğunun “Azərbaycan” şeirini səsləndiriblər. Tələbələrdən Vidadi Quluzadə (serb dilində), Mariya Rodovanoviç (Azərbaycan dilində) Heydər Əliyev Fondunun vitse-prezidenti Leyla Əliyevanın öz babasına, Ulu Öndər Heydər Əliyevin əziz xatirəsinə həsr etdiyi “Elegiya” şeirini səsləndiriblər.

Nihad Budaqov

AZƏRTAC-ın xüsusi müxbiri

Belqrad