Bakı, 20 noyabr, AZƏRTAC

BMT-nin miqrasiya agentliyi olan Beynəlxalq Miqrasiya Təşkilatı (BMqT) Dövlət Miqrasiya Xidməti (DMX) ilə sıx əməkdaşlıq çərçivəsində Azərbaycan hökumətinə 2019-2024-cü illər üzrə ölkəmizin miqrasiya strategiyasının hazırlanmasına dəstəyini verməkdədir. Həmin strategiyanın miqrasiya sahəsində qlobal səviyyədə müəyyənləşdirilən prinsiplərlə, eləcə də BMT-nin 2030-cu il gündəliyi və bu ilin dekabrında qəbul olunması gözlənilən nizamlı, təhlükəsiz və tənzimlənən miqrasiya üzrə qlobal kompakt sənədi ilə uyğunluq təşkil etməsi hədəflənir.

Beynəlxalq Miqrasiya Təşkilatının Bakıdakı nümayəndəliyindən AZƏRTAC-a bildiriblər ki, bununla əlaqədar, BMqT DMX ilə birgə, Avropa İttifaqının dəstəyi ilə Azərbaycan hökumətinə 2019-2024-cü illər üzrə ölkəmizin miqrasiya strategiyasının hazırlanmasına verdiyi dəstək çərçivəsində noyabrın 21-də strategiyanın hədəflədiyi məqsədləri cəmiyyətə təqdim etmək, həmçinin bu sənədin tətbiqi ilə bağlı müzakirələrin aparılması məqsədilə qurumlararası müzakirələr təşkil edəcək.

Müzakirələrdə dövlət qurumlarının, müxtəlif ölkələrin Azərbaycandakı səfirliklərinin nümayəndələrinin, beynəlxalq və qeyri-hökumət təşkilatlarının təmsilçilərinin iştirakı gözlənilir.

Həmçinin müzakirələrdə Azərbaycanın hazırlanmaqda olan miqrasiya strategiyasında qarşıya qoyulan məqsədlərin 2030-cu il gündəliyi və qlobal kompakt sənədi ilə uyğunluğu mövzusunda BMqT və DMX-nin mütəxəssislərinin təqdimatlarla çıxış etmələri gözlənilir.